Шидр Элстд Баатрмудын Аллейд ВДВ-н гвардейск нисәчнрин салу 83-ч багин тавдгч ротын командир, гвардин капитан, Әрәсән Баатр Лиҗин Мингияна һарсн өдрт нерәдсн митинг болв. Мингиян Владимирович цергә шишлң керг-үүлдврт орлцад, туурмҗарн ончрад әмнәсн хаһцв. Әрәсән Президентин зәрлгәс иштә Лиҗин Мингиянд Әрәсән Баатрин нерн зүүлһгдсн болдг.

Давсн җилин чилгчәр, бар сарин 28-д, Элстд «Буйслһн болн босхмҗ» бумблвин өөр тууҗин һашута өдрт нерәдсн санлын митинг болв. Найн негн җил хооран ик-бичкн уга цуг хальмгудыг хар гөрәр киитн Сиврүр күчәр нүүлһв.

Городовиковск района Веселое селәнд бәәдг Виктор Михайлович болн Зоя Степановна Кусковихн дөрвн көвүндән бичкнәснь авн чик сурһмҗ өгч, нег-негән хәләҗ, чик авг-бәрцәр бәәхиг болн хоорндан ниитә болхиг дасхсмн. Ууһн Виталий көвүнь ардасн һурвн дү дахулад, эк-эцкдән түшг болҗ, дүүнртән үлгүр болхар шундмн. Дүүнрнь ахасн үлгүр авх гиһәд, эн герин көдлмш кеҗ, мал асрҗ, эк-эцкдән нөкд болдмн. Цергә шишлң керг-үүлдвр эклхлә Виталий бооца батлв, энүнә үлгүрәр Максим бас ард үлдсн уга. Эцкнь көвүдиннь шиидвриг дөңнҗ, залу күн эрк биш Төрскән харсх зөвтә гиҗ келсмн.

Нертә бичәч болн шүлгч Җимбин Андрейин 100 җилин өөнд нерәдсн сурһульчнрин марһан Хальмг ик сурһульд болв. Бичәч, Төрскән харсгч Алдр дәәнә ветеран, мана хотл Элст балһсиг 1942 җилин чилгчәр сулдхсн баһ наста дәәч, дәкәд элгн-садтаһан хамдан тууврин зовлңла харһсн салдс эврә үүдәврмүдтән тер амр биш җирһлин тускар умшачнртан келҗ өгсмн.

Кен-негнәннь бәәдл-җирһлд баһ цагтнь үүдсн үр-иньглгч залһлдан насн ирх дутм геедрх бәәтхә нам җил ирвәс батрад-делгрәд йовдгнь нуувч биш. Зәрм улсин төлә үр- дүңгнь нам элгн-саднлань әдлхн өөрхн улс чигн болҗ тоолгдна биший. Шидр мана редакцин хайгар «Хальмг үннә» умшачнр Онтан Роза, Мацка Алла болн Бадендән Галина бичгән илгәҗ, эврә өөрхн нәәҗән йөрәх седклән медүлв:

Багшан бичә марттн,
Бичә терүг һундатн.
Терүнә седкл таднд
Терүг бичә марттн,
гиҗ хальмг улсин шүлгч Шугран Вера багшин чинринь өөдлүлҗ,күн болһна җирһлд эн күн онц орм эзлҗәхинь дәкн нег олнд тодлулҗ,эврә үүдәвртән бичсн болдг. Үзг-тамһ меддго шинкн сурһулин герин үүднә мөр алхҗ орҗ йовх бичкдүдиг цугтаһаснь түрүлҗ тосад,һартаснь көтләд медрлин хаалһд орулдгнь мел багш болҗана,цааранднь болхла арвн шаху җилин эргцд һаринь һанзһд, көлинь дөрәд күргх күсл зүүҗ, сурһульчнртан нүдн-амн болҗ, бүлән үгәрн седклинь халулҗ йовдгнь бас мел эн күн болна эсий. Тегәд йириндән чигн багшин ач-туснь тедү мет өөдәнәр үнлгдҗ, олна дунд күндллһ олснь тер.

Буур җил һарад, ботхн җил орҗах цагиг таңһчин әмтн байрин бәәдлд темдглв. Бурхн Багшин Алтн сүмд Зулын өдриг байрин мөргүлд орлцҗ темдглхәр цуглрҗ ирсн әмтиг Хальмг Таңһчин Шаҗн Лам Гевш Тензин Чойдак үнн седкләсн йөрәв.

Әрәсән Президент Владимир Путин, орн-нутгин залврин ахлач Михаил Мишустин, Федерацин Хүүвин ахлач Валентина Матвиенко, орн- нутгин залврин гешүд гемтә-шалтгта, өнчрсн бичкдүдин седклин санаһинь шин җилин өмн өргнд күцәҗ, «Күслин һацур» гидг керг-үүлдврт орлцв.

Шидр Элстд Хальмг Таңһчин Улсин Хуралын (Парламентин) 30 җилин өөнд нерәдгдсн байрин хург болв. Терүнд Хальмг Таңһчин Толһач Хаска Бату, таңһчин залврин Ахлач Босхмҗин Гилән, Әрәсән Орн-нутгин Хүүвин депутат Башанкан Бадм, РФ-н Хүүвин гешүд Борис Хачиров болн Байир Путеев, Хальмг Таңһчд ах федеральн инспектор Александр Беляев, урднь болн өдгә цагт үүлдҗәдг Улсин Хуралын депутатнр орлцв. Хальмг Таңһчин Улсин Хуралын Ахлач Артем Михайлов байрин хургиг нүр үгәр секв.

Санкт-Петербургас хол биш бәәдг Кингисепп балһснд дунд сурһульд физикин багшар көдлҗәсн цагтан Дольган Ханаев хөвән олад, Елена күүкнлә өрк-бүлән өндәлһв. Хөөннь баахн өрк-бүл Приморск крайин Чугуевск района Ленино селәнүр нүүһәд, бәәрн сурһульд багшлдг болв. 2022 җилд цергә шишлң керг-үүлдвр эклхлә, Еленан эцкнь эврә сән дурар терүнд орлцх шиидвр авв. Өөрхн элгн-саднь болн үүрмүднь бас бооца батлад, СВО-д орлцҗадгиг медәд, Дольган бас эврә сән дурар Приморск крайин цергә комиссариатд ирв. Багшар көдлҗәдг төләдән эн гертән үлдҗ чадх билә, зуг өвкнриннь залу-зөрмг авъясар эн Төрскнәннь харсачнрин зергләнд орх зөвтә гиҗ тоолв.