2025 җилин үкр сарин 14–д Тольятти балһснд «Хальмг тег. Иргчдән итклтәһәр» гидг нертә тууҗин болн сойлын ик чинртә керг-үүлдвр болв. Тайшин Петр орсин шаҗнд орсн цагас авн оюни чинртә эн керг-үүлдвр өөнин җил болҗадг болн хальмг теегт нүүдл улсин түрүн чонҗ секгдснә 300 җилин өөнлә ирлцүлҗ эн керг-үүлдвр күцәгдв.

Көтчнр селәнә сойлын герт байрин бәәдлд «Ингилән» бичкдүдин студин ончта өөнд нерәдсн олна орлцата нәр болв. Ода үлгүр болгч өөдән нер зүүҗәдг «Ингилән» 30 җилә өөндән нерәдсн байрин концерт үзүлв.

Эңкр мана лаганяхн
Эндрк көдлмшәрн туурна.
Хөөчнр, заһсчнр, тәрәчнр
Хөвтә нерән һарһна,

Давсн долан хонгин чилгчәр Хальмг Таңһчин Улсин Хуралын (Парламентин) дарани сессь болв. Таңһчд ах федеральн инспектор Александр Беляев, Хальмг Таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йосна, зарһин, бүртклһнә бүрдәцсин элчнр терүнә көдлмшт орлцв. Депутатнр ут тоодан арвн негн төр хәләһәд, зәрм закадт сольвр орулв, орн-нутгин закадын төсвс күцәлһиг дөңнв. Хамгин түрүнд депутатнр 2026 җилин болн 2027-2028 җилмүдин хазна төр хәләҗ, ирх һурвн җилд ямаран шаңһа көтлврмүд күцәгдхиг, кедү мөңгн терүнд йилһгдхиг шиидв.

«Негдсн Әрәсә» парть удан цагт эмнлһнд бәәдг бичкдүдиг дөңнхин төлә җил болһн «Корзинка храбрости» гидг буйнч седклин керг-үүлдвр бүрдәнә. Шидр Элст балһснд олна дөңнлтин штабин улд эн керг-үүлдвр эклв. Элст балһсна Хургин Ахлач Максим Сорокин, Хальмг Таңһчин Улсин Хуралын (Парламентин) депутат Пүрбән Олег, ЭГС-ин депутатнр Чумуда Николай болн Дорҗин Бадм дарани керг-үүлдвр секлһнд орлцад, бичкдүдт нерәдсн белгән авч ирв.

Шидр Элстд олна дөңнлтин штабд экин Өдр угтҗ «Мама – навигатор счастья» гидг соньн харһлт болв. Эн керг-үүлдвр «Негдсн Әрәсә» партин «Бат өрк-бүл» гидг төсв күцәлһнә йовудт бүрдәгдв. Хальмг Таңһчин Улсин Хуралын (Парламентин) депутат, партин төсвин региональн зүүцүләч Мацга Татьяна харһлтыг секәд, күүкд улсиг өөрдҗ йовх сән Өдрлә йөрәһәд, эднд бат эрүл-мендин бәәдл болн хөв-кишг дурдв.

Үкр сарин 13-14д Аһш балһснд Өмн үзгин дуһргин цергә шишлң керг-үүлдврин ветеранмудын харһлт болв. ЮФО-н нәәмн региона, тер мет ЛНР-ин, ДНР-ин, Запорожск болн Херсонск мүҗсин элчнр терүнд орлцв.

Одахн Хальмг Таңһчин элчнр «Бичкн төрскн – Әрәсән күчн» гидг Цугәрәсән муниципальн хургин региональн өдрмүдт орлцв. Сарпан района муниципальн бүрдәцин толһачин дарук Бембин Галина болн Целинн района һардврин аппаратын һардач Джунан Данара Ленинградск мүҗд болсн керг-үүлдврт орлцад, талдан регионмудын дамшлтла таньлдв, шин медрл хоршав. Эн керг-үүлдвр «Иргчин социальн политик: муниципалитетмүдиг ясрулдг шиидвр» гидг төрәр болв, тегәд регионмудын муниципальн йосна элчнр әмтнә социальн теткврин, баһчудын, спортын бүрдәцст одад, теднә көдлмшлә таньлдв.

Эн җилин үкр сарин 19-д Хальмгин нер туурсн ансамбль таңһчин селәдәр гастрольд һарч йовхмн. «Бамб цецг» ансамбль җил болһн селән һазрар һарч йовдг авъяс бәәсинь әмтн тодлна. Болв олн зүсн учрар таңһчин цуг һазрар эргҗ йовх таал эднд кесгәс нааран учрад уга бәәсмн. «Тюльпан, уралан!» гидг дуудвртаһар ансамбль эн керг-үүлдврән күцәҗәнә.

«Краса нации» гидг нертә нарт-делкән марһанд Яшкулин бичкн биичнр эврә билгәрн олн хәләһәчнриг өврүлв. Хәләврин жюри болхла биичнриг өөдәнәр үнлв.