Хальмг Таңһчин Улсин Хуралын (Парламентин) Ахлач Артем Михайлов болн депутат Җаңһан Чимид Ростовск мүҗин Усть-Донецк района Раздорская күүтрт Советин Союзин Баатр Делгә Эрднин 103 җилд нерәдгдсн санлын керг-үүлдврт орлцв. Төрскән харсгч Алдр дәәнд әмнәсн хаһцсн улсин санлын бумблвин өөр эклсн хургт бәәрн улс цуглрад, залу-зөрмг кевәр дәәлдҗ йовсн баатрмудыг тодлад, тагчг зогсв. Хургт орлцачнр Делгә Эрднин бумбд цецгүд тәвв. Артем Михайлов Хальмг Таңһчин Толһач Хаска Батун илгәсн Бичг олнд соңсхч умшв.

Шидр Түмнә мүҗд «Бичкн Төрскн – Әрәсән күчн» Цугәрәсән муниципальн хургин региона Өдрмүд болв. Әрәсән бәәрн залврин делгрлтин негдлтин (ВАРМСУ) седвәрәр болсн керг-үүлдврт орн-нутгин регионмудас ут тоодан 350 күн орлцв. Ик хургт муниципальн бүрдәцсин, орн-нутгин болн регионмудын йосна бүрдәцсин, парламентсин, олна ниицәсин элчнр цуглрв. Хальмг Таңһчас «Хальмг Таңһчин муниципальн бүрдәцсин хүүв» гидг негдлтин ахлач, Октябрьск района муниципальн бүрдәцин толһач Увшан Басң терүнд орлцв.

Хальмг Таңһч болн Луганск Улсин Республикин Антрацитовск район хоорнд нөкцлтин бооцан батлгдснас авн таңһчин эмнлһнә көдләчнр тиигәрән одад, бәәрн улст дөңгән күргнә. Таңһчин эмнлһнә эмчнрин баг Антрацитовск районд бәәдг 100 һар күүнә эрүл-менд шинҗләд, сүв-селвгән өгнә.

П.Жемчуевин нертә таңһчин эмнлһнә физиотерапевтическ әңгд өдгә цага кергсл углҗ тәвгдв. «Salus-Talent», «BTL-6000» болн «Piezo Wave» гидг сән һара кергслмүд олн зүсн гем учрсн кемд эмнлһнд туслна. Иим кергсл урднь энд уга бәәсмн, тегәд ода гемтә улст өөдән чинртә туслмҗ күргҗ, дарунь эдгхд туслх гиҗ әңгин эрүл-менд харлһна көдләчнр темдглнә.

Лаганя района Җалһа селәнд өнр-өсклң бүлд өсәд-боссн Мукөвүнә Жанна (зургт - барунь таласнь) олнд үлгүр болдмн. Бичкнәсн авн дүүнрән, аав-ээҗән арднь орҗ хәләдг билә. Жанна өсәд, гиҗгтә күүкн болад, йисн классан төрскн селәндән төгсәһәд, 10-11-ч классмудт Элстин багшин колледжин улд секгдсн лицейд сурад, цаһан мөңгн медаль авад энүг төгсәсн болдг.

Җилин дөрвн цаг болһн эврәһәрн сәәхн болдг. Намрин кемд хамтхасд шарлад-улаһад, нарна герлд модд алтн болҗ медгдәд нүднә хуҗр хаңһана. Эн җил намр дулан болад, эк-эцкнр бичкдүдән дахулад балһсна паркст амрчахиг үзҗ болхмн. Медәтнр чигн намрин цевр аһар киилҗ, уульнцст болн паркст бод-бод гиһәд йовдгнь үзгднә. Цуһар дулан өдрмүдт зогсчахд байрлҗ, киитртл герин һазак көдлмшән кеҗәнә, балһсна урһмлын эдл-ахун көдләчнр болхла цугинь ахулҗана.

2024 җилд таңһчин һардвр селәнә эдл-ахун мергҗлтнрлә хамдан мелиорац делгрүлхин болн малын хот кеҗ һарһхин туст шишлң көтлвр батлв. Терүг күцәлһнә йовудт 2030 җил күртл 17 миңһн гектар аһу һазр олзлад, малын хот кеҗ һарһлһиг икдүлҗ болхмн.

Шидр Хальмг Таңһчин Толһач Хаска Бату зун наста көгшә Манҗин Нинаг йөрәв.
Арвн зурһатадан Нина Горяевна экләд көдлв, тер цагт эцкнь болн ахнь фронтд дәәлдҗ йовсмн. Дәәнә цагиг болн Сиврин туувриг дааҗ һарад, дөрвн үрән өскәд, эндр йисн ач-зееһин болн нәәмн җич-зеенчин күцәмҗнь энүнә төлә бахмҗта болна.

Давсн долан хонгин чилгчәр Элстин политехникин колледжин 60 җилин ончта өөниг багшнр болн оютнр өргнәр темдглв.
Ода орн-нутгт хамгин түрүнд техникин халхар бат медрл өгх күсл тәвгдҗәнә, тиим даалһвриг орн-нутгин һардвр болн Әрәсән залвр өгчәнә. Яһад гихлә ода шин эв-арһсин, йоста биш ухалврин цаг ирҗ йовна. Тегәд техникин сурһуль-эрдмтә мергҗлтнр ода хамгин түрүнд керглгдҗәнә. Мана таңһчин залвр бас тиим неквр тәвҗәнә. Ода зәңгллһнә халхар көдлдг улс кергтә болҗана. Тер эрдмтә мергҗлтнриг Элстин политехникин колледжд дасхна, энд өдгә цагин лабораторьмуд болн компьютерин классмуд бәәнә, дамшлтта багшнр бат медрл өгнә.

Шидр Элстд 37 күн олн җилин туршарт эврә сән дурар цусан өгч, кесг күүнә әм аврсн төләдән «Әрәсән ачта донор» гидг нер зүүв. «Негдсн Әрәсә» партиг дөңнлһнә олна штабд болсн харһлтд ачта донормудыг ачлҗ, темдгинь бәрүлҗ өгв. Ачлвр авсн улс дунд УФСИН-ә, МЧС-ин, дотр-дундын кергүдин бүрдәцсин, эрүл-менд харлһна, сойлын көдләчнр, зарһин приставмуд болн таңһчин селәдин эгл улс билә.