Хальмг Таңһчин әмтиг көдлмшәр тетклһнә Төв таңһчин социальн делгрлтин, күч-көлснә болн көдлмшәр тетклһнә министерствин дөңгәр «Абилимпикс» таңһчин марһана йовудт гемтә-шалтгта баһчудын төлә көдлмшч ормсин яарм давулв. Эн керг-үүлдвр сән авъяст тохрв гиҗ келҗ болҗана, юңгад гихлә эн йисн җилин эргцд бүрдәгдҗәнә. Х.Кануковин нертә багшнрин колледжин улд болсн керг-үүлдврт таңһчин дунд шишлң сурһуль-эрдмин бүрдәцсиг эн җил төгсәҗәдг оютнр орлцв. Багшнрин колледжин һардач Җамбинә Татьяна керг-үүлдвриг секәд, эн яарм таңһчин бүрдәцсин элчнрт болн эн җил сурһулян төгсәҗәдг баһчудт туслхиг темдглв. «Мадн хоорнд күүнә улс уга, бидн цуһар ахнр-дүүнр болнавидн» гисн дуудвртаһар эн җил яармиг давулҗанавидн гиҗ Татьяна Николаевна зәңглв.

Давсн долан хонгин басң өдрлә «Негдсн Әрәсә» партин дөңнлтин штабд олна хург болв. Энд Өмн үзгин шаңһа дуһргт Әрәсән «Медрл» ниицәнә үүлдвриг өргҗүллһнә заллтын ахлач Александр Шматькола соньн күүндвр болв. Элстин болн райодын, селәдин, сурһульмудын дегтрин саңгудын һардачнр энүнд орлцв. Әрәсән «Медрл» ниицәнә Хальмг Таңһчин әңгин толһач Манҗин Элеонора харһлтыг нүр үгәр секв.

Хальмг Таңһчин Толһач Хаска Бату чадмг болн дамшлтта һардач, политикин олна үүлдәч Сергей Мироновла харһв.

Хальмгин Толһач Хаска Бату «Негдсн Әрәсә» партин хүүвин селвлцәнд орлцв. Терүнд нәәмдгч хуралтын Әрәсән Орн-нутгин Хүүвд партин үүлдврин ашинь дигләд, суңһврин керг-үүлдврин болн талдан төрмүд хәләгдв.

Эн өдрмүдт РАНХиГС-ин Президентск академин шаңһа залврин ик сурһулин көтлврт орлцачнр мана таңһчд ирсн бәәнә. Орн-нутгин регионмудын күцәгч болн зака үүдәгч бүрдәцсин, ик компаньсин элчнр, «Әрәсән нүүрләчнр» болн «Босхмҗин нүүрләчнр» марһасин дииләчнр регионд дамшлт хоршалһна йовудт мана таңһчин социальн-экономическ бәәдлиг шинҗләд, кесг харһлтст орлцҗана. Нег тиим харһлт шидр Б.Б.Городовиковин нертә Хальмг ик сурһульд болв. Терүнд гиичнр «Баатрмуд 08» сурһулин көтлврт орлцҗадг цергә шишлң керг-үүлдврин ветеранмудла харһад, чинртә төрмүдәр күүндәд, ухан-тоолврарн хувалцв.

Урҗ өдр Элстд Өмн үзгин цергә дуһргин бүрдәсн «Иргчин эв-арһс: Төрскндән цергллһнә халхар БПЛА-н олзллһн» нертә һәәхүл-наадм бүрдәгдв. Өмн үзгин цергә дуһргин заллтын, йосна, сурһуль-эрдмин, олна бүрдәцсин элчнр болн оютнр Элст балһсна бичкдүдин билг-эрдмин Бәәшңд цуглрв. Мел оютнрин төлә эн керг-үүлдвр бүрдәгдв гиҗ келх кергтә.

Хальмг Таңһчин Улсин Хуралын (Парламентин) Ахлач Артем Михайлов эн өдрмүдт Владимирск мүҗин Суздаль балһснд бәәнә. Тенд Артем Васильевич көдлмшч харһлтсин йовудт «Открытие» гидг дунд сурһульд одв.

Сүл җилмүдт Хальмг Таңһчин барун үзгин райодт буудян элвг урһц хурагдҗана. Өдгә цагт мана таңһчд 247, 7 миңһн гектар аһу һазрт намрин тәрән тәргдсн бәәнә. Тәрәнә ик зунь үвлин сармудт сәәнәр хадһлгдв. Эн җилин үвләр цасн орад, һазр чиг авад, сән урһц авлһнд туслҗана.

Одахн Манҗин Аркадин нертә Хальмг филармоня бәәшңд Хальмг ик сурһулин үүдәгч студьсин байрин концерт болв. Оютнрин билг-эрдмиг таңһчд бәәтхә, орн-нутгин талдан регионмудт бас икәр таасна. «Бумбин орн» ансамблин болн Хальмг ик сурһулин талдан үүдәгч бүрдәцсин артистнр җил ирвәс мергҗлтән өөдлүлҗ, хальмг болн талдан олн келн- улсин ду-би үзүлҗ, мана сойлла болн билг-эрдмлә миңһәд әмтиг таньлдулна.

Крым Әрәсән ханьд орсн цагас авн 12 җил давв. Ода эн тоха арл болн Севастополь балһсн Әрәсән ни-негн бүлд делгрлтин хаалһд йовна. «Крымск хавр» нертә керг-үүлдвр Хальмг Таңһчд бас болв. Моһа сарин 18-д Диилврин паркд тууҗлгч чинртә эн йовдлд нерәдгдсн концертд олн улс цуглрҗ ирв. «Мана Крымск хавр» гидг байрин керг-үүлдвр эдниг Хамцулв.