Намрин кем эклхлә гриппәс саглулҗ тәрлһнә керг-үүлдвр эклнә. Эн өдрмүдт таңһчд үүлддг социальн бүрдәцст бәәдг медәтнрт болн эрмдгтә улст тәрлһ кеҗәнә. Терүг 729 күүнд кехмн гиҗ зуралгдҗана.

Приютна района Воробьевка селән 150 җилин өөнән темдглв. Эн һазрт кесг үйин тууҗ әрүнәр хадһлгдҗ йовна. 1875 җилд энд селән бүрдәгдҗ орс чонҗ босхгдсмн. Урднь эн Бислүртә гиҗ нерәдгдҗәлә. Хальмг Таңһчин Толһач Хаска Бату селәнә әмтиг ончта өөнлә йөрәһәд, эн һазра баатрмудын нердиг зааһад, бәәдг улсин төрскнч седклин залмҗар Воробьевка селән делгрҗәхиг темдглв.

Шидр таңһчин Толһач Хаска Бату шатрин балһсн - Сити-чесст одад, бат ясврин йовудыг хәләв. Ясврин көдлмш гүргүдән орсн бәәнә.

Эн җил хальмг улсин «Җаңһр» баатрльг дуулврин 585 җилин өөн болҗана. Хальмг Таңһчин Толһач Хаска Батун темдглсәр, Хальмгин өрк-бүл болһнд, тер тоод Хасиковихнә бүлд, эн дуулвр онц чинр зүүдг үүдәвр болна.

Хаска Бату региониг заллһна төвиг (ЦУР) һардсн Бадан Бадмла харһв. Урднь эн олна дөңнлтин штабин һардач болҗ көдлҗәсмн.

[b]Сән авъяст тохрсар зуни чилгчәр болн намрин эклцәр өрк-бүл болһн олн зүсн темс болн зер-земш эд-бод кеҗ, үвлд белднә. Шидр бидн Элст балһсна ар үзгт бәәдг базрт одад, темснә үнәр соньмсвидн. Амрлһна өдрлә әмтн нааран хулд кехәр олар ирсиг үзҗ болхмн. Кесгнь өрк-бүлән теҗәхин төлә сән чинртә болн кимд темс хулдҗ авхар хулдачнрла күүндҗ, альдас терүг авч ирсәр соньмсна. [/b

Мана таңһчин хотл Элст балһсн 160 җилин өөнән темдглхәр белдҗәнә. Ончта өөн угтҗ балһснд сән кец-таал тогталһна, шин хаалһс тосхлһна, бүрдәцсин болн гермүдин бат ясврин көдлмш кегдҗәнә. Шидр Элст балһсна һардврин толһачин дарук Довгопола Дмитрий болн балһсна һардврин сойлын заллтын һардач Эрднин Данзн олнд зәңгллһнә эв-арһсин көдләчнрлә харһад, өөнин керг-үүлдврмүдин тускар келҗ өгв.

«Негдсн Әрәсә» партин седвәрәр мана орн-нутгт «Әрәсән күчн» гидг спортын керг-үүлдвр зарлгдсн бәәнә. Терүнә йовудт нүднә харань муурсн улсин Цугәрәсән олна ниицәнә таңһчд үүлддг әңг шатрар болн дөөвәр марһа давулв.

Ноха сарин чилгчәр Москвад һурвн өдрин эргцд «Бичкндк цаг урмд өгнә» гидг көтлврин Цугәрәсән наадмин ашлгч девсң болв. Терүнә өмн моһа сарас авн така сар күртл холас орлцлһна керг-үүлдвр болв. Терүнә йовудт Әрәсән цуг регионмудын сурһульмудын кесг миңһн күүкн-көвүн эврә көтлврән бичәд, марһанд белдсн үүдәврән йовулсмн, жюри эднә билг-эрдминь үнлсмн.

Хальмгин хотл балһсн сүл цагт өңгән соляд, цуг тоотнь шинрүлгдәд, хаалһснь ясгдад шинрсн болҗана. Энд-тенд кегдҗәдг көдлмшин ашт олн җилдән нег кевәр бәәсн тоот ясгдҗ, шин бәәдл һарчана. Хотл балһсна өөнд болн бурхн-шаҗна үүлдәчнрин нарт-делкән ик цуглранд белдлһнлә ирлцҗәнә. Шинрүлин көдлмш Сиврин хөөн төрскн һазрурн ирсн әмтн цугтан балһсан босхч авчах цагиг тодлулҗана. «Родина» кинотеатрас һарч йовулгдсн әмтн тер бәәриг шинәс босхч авад, терүнд көдлмшин хөөн цуглрҗ ирәд, дуулад-бииләд муурсан мартҗ байрлдг билә. Өрүнднь босч авад, дәкнәс Элстән шин гермүдәр кеерүлхәр шундг билә. Эднә седкл, иргчин иткл Балакан Алексейин болн Чонкуша Петрин «Элстин вальст» мөңкинд тодлгдсмн.