Шаҗна нарт-делкән ик хургин йовудт олн зүсн керг-үүлдврмүд болхмн, терүнд кесг орн-нутгас болн Әрәсән регионмудас гиичнр ирхмн гиҗ күләгдҗәнә. Ик чинртә хург өөдән кемҗәнд өргмҗтәһәр давхин, цуг харһлтс болн керг-үүлдврмүд дигтә-даратаһар бүрдәгдхин төлә эврә сән дурар үүлддг улсин дөң кергтә. Шидр «Калмыкия» зәңгллһнә агентствд болсн брифингд Хальмг Таңһчин баһчудын керг-төрин агентствин һардач Камиль Маркеев, волонтермудын көтлврин һардач Анхана Саглр, орн-нутгин сурһулин көтлврмүдин һардач Татьяна Играчёва болн таңһчин баһчудын Төвин ах мергҗлт Джоджинә Инесса орлцад, шаҗна ик хургт эврә сән дурар дөң болх улсин үүлдврин тускар келҗ өгв.

Кезәнәс авн хальмгудын өвкнр тууҗин йовудт Бурхн Багшин номд иткҗ йовсмн. Оюни герл болҗ, эн шаҗн әмтнд җирһлин түшг болҗ йовла. Ах үйин улсин җирһлин авъясмуд, сойл, тууль шиңгрсн бурхн-шаҗна ном даңгин әмдрлин урмд болҗ, уралан көтлҗ йовла. Ода чигн мадна җирһлд эн номин герл тусан күргәд йовна. Кесг зууһад җилмүдин туршарт учрсн әәмшгтә болн һашута тоотыг дааҗ һарад, мана аавнр-ээҗнр, теднә өмнк үйнр келән, сойлан, тууҗан, шаҗан хадһлад, маднд күргҗ авч ирсн болдг. Ода цуг тер зөөриг чикәр олзлҗ, җирһлдән һардвр кеҗ эндрк үйнрт дасхсн деерән хөөтк үйнртән тер зөөриг үлдәхин тускар мана зәңгч гевш Тензин Чойдакла күүндвр кесмн.

Шидр Улсин фронтын Хальмг Таңһчд үүлддг әңгд Хальмг Таңһчин залврин Ахлач –таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан даалһврар энүнә дарук Мамина Ольга, Целинн района болн Элст балһсна әмтиг көдлмшәр тетклһнә цергллтсин һардачнр Лозуткан Николай болн Сумьяна Белла «Сарпа» дуудврта цергчд ГАЗель тамһта көлг болн бензинәр көдлдг көрә бәрүлҗ өгв. Улсин фронтын КРО-н зүүцүләч Гецела Зурһан шишлң көлг бәрүлҗ өглһнд бас орлцв.

Хальмг Таңһчд амрлһна өдрмүдт, һаха сарин 13-д болн 14-д, райодын болн селәдин муниципальн бүрдәцсин депутатнрин суңһвр болв. Тер мет Яшкулин болн Хар һазра райодын иргнмүд Хальмг Таңһчин Улсин Хуралын (Парламентин) депутатыг суңһв.

Яшкулин района Хар Толһа селәнд өсәд-боссн улс дунд цергә шишлң керг-үүлдврт орлцҗ, залу-зөрмгән үзүлҗ йовдг Төрскән харсачнр баһ биш бәәнә. һундл төрхд, эдн дунд ааһ-цусан асхч, әмән әрвллго цергә даалһвран үнн кевәр күцәсн нег һазра улс бас бәәхнь лавта. Энд өсәд, дунд сурһуль төгсәсн Аран Аркадий, Саңһҗин Евгений, Диджан Константин болн Нәәмнә Виктор баһ-дүүвр насндан әмнәсн хаһцад, олна санлд мөңкинд үлдв. Шидр селәнд эднд нерәдҗ санлын самбр секгдв.

Ик Буурла района Көвүд селәнд төрскн һазртан эңкр 400 шаху күн бәәнә. Эдн өвкнриннь санл тевчҗ, дорас өсч йовдг баһ үйнрт чик сурһмҗ өгч, тууҗан болн авъясан хадһлҗ отг-әәмгән делгрүлхәр шунна. Хөрн һар җил хооран селән күртл хату девскртә хаалһ тосхгдсмн, әмтнә гермүдт газ орулгдсмн. Селәнд эмнлһн, дунд сурһуль, сойлын Гер, поштын әңг болн лавк бәәнә. Көвүдәхн селәндән сән таал тогтахин төлә шаңһа көтлврмүдт орлцҗ, олн зүсн төсвс бәәдл-җирһлд тохраҗахнь темдгтә.

Һаха сарин 11-д мана орн-нутгт эрүл-дорул бәәлһнә Өдрт нерәдгдсн керг-үүлдврмүд болв. Хөрн җил хооран орс чонҗин седвәрәр эн өдр зарлгдсмн. Әрк-чаңһр уусн улс олн зүсн гемәр гемтҗ, аля-азд йовдл һарһна, өрк-бүлмүд чигн терүнәс көлтә тарна. Тегәд әркд авлгдсн улс му авцан хаяд, эрүл бәәҗ спортар соньмсад чик авг-бәрц батрулхд эн өдр болдг керг-үүлдврмүд туслх зөвтә.

Нарт-делкән шаҗна ик хург угтад, Элстин 160 җилин өөнд нерәдәд, хотл балһснд кесг тоотнь шинрүлгдҗәнә.
Пушкинә нертә уульнцд үүдәгч мастерской көдлмшән эклв. Чонкуша Петрин нертә билг-эрдмин колледжин оютнр соньн сәәхн зург экләд зурҗана. Эдн багш Куберлинә Андрейин һардврт терүгән күцәҗәнә.

Басңга Баатрин нертә Келн-улсин театр һаха сард дарани үүлдврән эклв. «Я - Будда» гидг көгҗмин поэман болн «Небесная защитница» гидг наадан райодын әмтнд үзүлхәр театр һарч йовв.

Шидр бидн келн-улсин хувцна Өдр темдглсн биләвидн. Хальмг Таңһчин Толһач Хаска Бату хальмг хувцна тускар ухан-тоолврарн хувалцв.
- Эндр келн-улсин хувцн өдгә цага дизайнермудын кегдлмүдт тохрагдҗана. Өдгә цага кев-янзта хальмг хувцна туск олн зүсн тоолвр бәәхиг меднәв. Мини тоолврар болхла, мана хувцн сольгдсн бийнь келн-улсин кев-янзта болх зөвтә гиҗ санҗанав. Өвкнриннь байн зөөриг ясрулҗ кеерүлдг дизайнермүдиг бидн дөңнҗәнәвидн. Келн-улсин хувциг өдгә цага кев-янзтаһар үүдәхин тускар эрдмчнрлә үүдәгч үүлдвр бүрдәхиг таңһчин экономикин болн хулд-гүүлгәнә министерствд даалһвр өгчәнәв, - гиҗ Бату Сергеевич келв.
Келн-улсин хувциг өмсәд бахтх кергтә гиҗ таңһчин Толһач нег һазра улст дуудвр кеҗ, терүнә чинрин тускар бичкдүдт цәәлһтн гив. «Хотын сәәнинь гиичд өг, хувцна сәәнинь эврән өмс» гиҗ мана өвкнр хара биш келдг бәәсиг Хаска Бату тодлулв.