Күн болһн өркән өндәлһсн цагтан дурта иньгтәһән олн җилдән ниитә бәәһәд, ачнр-зеенрән босхад, хамдан көгшрхин тускар санна. Седклд туссн иньг итклтә түшг болхла, хойр күн нег-негнәннь авг-бәрц болн заң сәәнәр медҗ байр-зовлңган әдл хувалцдг болхла эдн эрк биш олн җилдән хөвтә җирһл эдлҗ бәәхнь маһд уга. Яшкулин района Хар Толһа селәнд бәәдг Николай Александрович болн Александра Ивановна Араевихн (зургт) шидр алтн хүрмән темдглв. Эдн тәвн җил хооран өрк-бүлән өндәлһәд, эн җилмүдин эргцд нег-негндән түшг болҗ, ниитә бәәнә.

Эн җил сурһулян төгсәсн арвтнр дунд ЕГЭ шүүвр өгсн кемлә 200 балл эс гиҗ тер тоод өөрхн балл хоршасн сурһульчнр баһ биш. Тедн дунд И. Г. Карпенкон нертә Приютна лицейин төгсәһәч Софья Полежко райондан түрүн болҗ 200 балл хоршасн болҗана. Хойр кичәләр-химийәр болн орс келәр цуг даалһвриг чикәр күцәһәд, күүкн тиим кевәр хойр зууна болн хамгин өөдән ашт күрв.

Сеер деер һархла – седклин сергмҗ, көгшн күүнлә ду һархла – ухани сергмҗ, – гиҗ кезәңк келсн хара үг биш бәәнә. Хуучан медхин төләд мадн хальмг амн урн үгин зөөр меддг көгшдүдлә харһад күүндҗ кедү үнтә зөөр медҗ авнавидн. Зуг сүл цагт, һундл төрхд, кезәңк цага юм меддг көгшдүд җил ирвәс цөөкрәд йовна. Тедү дүңгә мадна хамгин түрүн керг – цецн медрлтә көгшдүдәс медсн үнтә зөөринь соңсҗ-бичүлҗ, хальмгиннь оюни өв байҗулҗ, дорас өсч йовх үйнртән хадһлҗ үзүлҗ медүлх зөвтәвидн.

Эн җил Хальмг Таңһчин автономин 105 җилин өөниг темдглсн биләвидн. Сүлд болн туг ямаран чигн нутгин һол темдгүд болҗ күндлгднә. Таңһчин сүлд залҗ тәвгдсн, туг өрггдсн ик бәәрнд байрин хургуд болна. Байрин өдрмүдлә таңһчин цуг балһсдар болн селәдәр шар туган делскҗ өргнәвидн. Сойлын болн спортын олн марһаст болн хәләврмүдт шар туган өргҗ орлцнавидн. Шар тугтан мөргәд, зальврад, эндр мана цергчнр дәәлдәнә һазрт хортнла дәәлдҗ йовна. Цуг мадна сүрә болн омг болҗах сүлд болн тугиг зурсн зурач Эрднин Бата далн җилин өөнән темдглв.

Одахн Әрәсән залврин кесн то-дигәр зуульчллһн делгрүлҗәдг орн-нутгин регионмуд дунд мана таңһч нүүрт һарв гисн байрта зәңг ирв.

Һаха сарин 1-әс авн Б.Б.Городовиковин нертә Хальмг ик сурһульд «Баатрмуд-08» региональн көтлврт орлцачнрин төлә шишлң сурһуль эклхмн.

Яшалтан района Ульяновское селәнд олн келн-улс ни-негн, нег-негнәннь сойл, авъяс күндлҗ ниитә бәәнә. Бәәрн улсин ик зунь месхетин түрг келн-улс болна. Эдн 80-ч җилмүдин чилгчәр болн 90-ч җилмүдин эклцәр нааран нүүҗ ирәд, энд батрад үлдв. Эдн хальмг теегт хөвән олҗ, энд өрк-бүлән өндәлһәд, күүкдтә, ачнр-зеенртә болад, тааста керг делгрүлҗ, олн җилин эргцд энд иҗлдв. Сүл җилмүдт селәнә муниципальн бүрдәцин һардвр болн бәәрн улс бәәсн һазриннь делгрлтин болн сән кец-таал тогталһна халхд аһу ик көдлмш күцәҗ гиҗ темдглх кергтә. Одахн көдлмшин халхар тиигәрән одхларн бидн Ульяновское селәнә муниципальн бүрдәцин толһач Анвар Усмановла күүндвидн.

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн!» гидг керг-үүлдврин һурвдгч девсң экләд, эмчнр Яшалтан, Көтчнрә, Лаганя, Сарпан, Приютна, Үстин болн Городовиковск райодт одв. Эн керг-үүлдврин йовудт эмчнр хол селәдин әмтнд күрч, олн зүсн шинҗллт кеҗ, эмнлһнә туст сүв-селвгән өгч, түрүн дөң күргҗәнә.

«Мини бизнес» төвд ресторатормудын төлә шишлң көтлвр экләд күцәгдҗәнә. Novikov Group бүрдәцин шинҗләч Евгения Лерман терүг давулҗана.

Иҗл һолас усар тетклһнә төсв цаарандан күцәгдҗәнә. Өдгә цагт болхла төсвин ирлцңгү бәрмт цаас белдҗәнә. Эн төсв күцәгдәд, таңһчин 70 процент иргнмүдиг цевр усар теткҗ болхмн. Тодлхас, эн төрт мадниг Әрәсән Президент Владимир Путин болн орн-нутгин залвр дөңнҗәнә.