Төрскән харсачин Өдр угтҗ Хальмг Таңһчин эрүл-менд харлһна министрин үүл дааҗадг Булат Сараев цергә шишлң керг-үүлдврт орлцач Ангелина Худиловала харһв.

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн» гидг керг-үүлдвр цааранднь райодар давулгдҗана. Эн долан хонгин эклцәр эмчнр Ик Буурла района Приманыч болн Ик Буурл селәдт одв. Һаза цаста болн салькта болв чигн селәнәхн эмчнрт бийән үзүлхәр адһв. Мадниг Приманыч селәнүр ирхд бәәрн сурһулин улд бүрдәгдсн керг-үүлдврт олн әмтн ирсиг үзвидн, бәәрн улсла зерглҗ хам-хоша бәәдг Баһ Буурл селәнә әмтн эн өдр бас эн керг-үүлдврт орлцхар ирв.

Хальмг Таңһчин Толһач Хаска Батун седвәрәр хойр җил дарандан «Эрүл-менд бәәтн» гидг керг-үүлдвр давулгдҗана. Давсн җилд эмчнр таңһчин селәдәр йовад, бәәрн улсин эрүл-менд шинҗләд, 3 миңһн һар күүнд дөңгән күргв. Эмчнрт бийән үзүлсн улсас 130 күн немр шинҗллт келһнд йовулгдв, 27 күүнд месллһ болн 193 күүкд күн маммографь кев. Гемтә-шалтгта улст эмчнр онц оньг тусхаһад, 17 күүнд гертнь одад эрүл-мендин бәәдлинь хәләһәд, эмнлһнә туст сүв-селвг өгв. Давсн җилд бүрдәгдсн керг-үүлдврин ашар терүг эн җил дәкәд давулҗ хол селәдт бәәдг әмтнд эрк биш күрч кергтә шинҗллт кех шиидвр батлгдсмн.

Целинн района Троицкое селәнд балһсна поликлиникин 5-ч әңгд «Земск эмч» гидг көтлврин медлд зурһан эмч ирҗ көдлҗәнә. Селәнә эмнлһнд цуг кергтә мергҗлтнр бәәдг төләд бәәрн улс эрүл-мендин бәәдлән шинҗләд, дарунь кергтә эмнлһ авна. Дәкәд хотл балһсна әмтн поликлиникд ямр нег эмчд ик чеерүд учрхла нааран ирҗ мергҗлтнрин сүв-севлг авч чадҗана. Әңг бат ясвр кегсдн бәәрнд бәәршлнә, энд өдгә цага кергсл углҗ тәвгдв, тегәд селәнә әмтнд дөң күрглһнә чинр кесг холванд өөдлв гиҗ келҗ болҗана.

Хальмг Таңһчин Толһач Хаска Батун седвәрәр «Эрүл-менд бәәтн» гидг керг-үүлдвр эклв. Терүнә медлд эмчнр таңһчин селәдт күрәд, бәәрн әмтнә эрүл-менд шинҗлҗ хәләһәд, эмнлһнә туст сүв-селвг өгхмн. Келхд, нидн эн керг-үүлдвр бас давулгдсн билә, терүнә йовудт ут тоодан 3 миңһн һар күн эмчд бийән үзүлсмн. Лу сарин 12-т эн керг-үүлдвр Целинн района Троицкое, Үстин района Цаһан Амн болн Эрдниевский селәдт эклв. Өцклдүр эмчнр Баһ Дөрвдә болн Яшалтан райодт одв.

Шидр Хальмг Таңһчин Толһач Хаска Батун зааврас иштә Светлана Кусьминова шишлң дөң күрглһнә «Сулда» төвин болн Занда Адудова Яшалтан района эмнлһнә ах эмчнрин үүлд батлгдв. Баахн болв чигн эдн байн дамшлтта, эрүл-менд харлһна халхд арвн һар җилдән көдлҗ йовна.

Хальмг Таңһч болн Луганск Улсин Республикин Антрацитовск район хоорнд батлгдсн нөкцлтин медлд Хальмгин эмчнрин баг һурвн дәкҗ тиигәрәр одад, бәәрн әмтнә эрүл-менд шинҗлсн билә. Эн керг-үүлдврмүдин ашт цаглань олн зүсн гем илдкҗ авад, кергтә эмнлһ давулад, зәрм улст месллһн чигн кегдв. Тер мет мана эмчнр олн зүсн төрәр сүв-селвгән өгч, дамшлтарн хувалцна. Т.Хахлынован нертә медицинск колледж болхла Антрацит балһсна медицинск коллледжлә иньгллтин залһлда батрулҗ, хамцу үүлдврин зура батлсн бәәнә. Шидр Антрацитовск районас мана таңһчур эмчнр ирәд, Хальмгин эмнлһсин үүлдврлә таньлдв, бәәрнколледжд одад оютнр өдгә цага эв-арһс олзлҗ, гүн медрл хоршаҗахинь үзв.

Өнчн-өвү, гемтә-шалтгта, җирһлин күнд таалд туссн улст, бичкдүдт болн медәтнрт цаһан седкләсн демән күргдг, килмҗән тусхаҗ эднә төрмүдт орлцдг әмтнд тернь эрк биш ик буйн болх гиҗ тоолгдна. Мана таңһчд өнчн медәтнрин болн эрмдгтә улсин гер-интернатд бәәдг улст дөңгән күргдг әмтн баһ биш. Эдн ямр нег керг-үүлдвр давулхд дем күргнә, әмтәхн хот-хол, хувц чигн авч ирнә. Баһ Дөрвдә өнчн медәтнрин болн эрмдгтә улсин гер-интернатд дөңгән күргдг улс бас бәәнә. Теднә негнь Цевгә Антонина болна.

Городовиковск районд бәәдг Иван Касьянов хаалһд учрсн зеткртә йовдлд, күнд шав авсна ашт П.Жемчуевин нертә таңһчин эмнлһнд тусв.

Хальмг Таңһчин залврин барин цергллтин зәңглсәр, шидр Приютное селәнд поликлиник тосхлһна төрәр көдлмшч селвлцән болв. Терүг Хальмг Таңһчин залврин Ахлач Босхмҗин Гилән һардҗ давулв. «Эрүл-менд харлһн» гидг келн-улсин төсвин «Эрүл-менд харлһна түрүн дөң күрглһнә халх делгрүллһн» гидг региональн төсвин халхар Приютна района эмнлһнә медлд эн селәнд шин поликлиник тосхгдх зөвтә.