Урҗ өдрәс авн Элстд коронавирусн гемәс саглуллһна тәрлһ келһнә һурвн мобильн комплекс үүлддг болв. Эдн хотл балһсна төвд «Элст» гиичлүрин, барун үзгт көлгн-күчнә зи хулддг рынкин болн «Гипер-Магнит» лавкин өөр зогсҗана. Вакциниг хадһлхин төлә шишлң киитрүләч углҗ тәвгдсн бәәнә. Комплекс болһнд эмчнр бәәнә, эдн тәрлһ авхар ирсн улсин эрүл-мендин бәәдл шинҗлнә. Эмчд бийән үзүлснә хөөн дор ормднь тәрлһ авч болҗана. Гиичлүрин өөр зогсҗадг мобильн комплекст түрүн өдр 110 күн тәрлһ авв. Ямр нег кергәр йовсн улс паспорт болн СНИЛС бәәдг болхла тәрлһ авч чадв. Мобильн комплекс өрүн 10 часас авн асхн 17 час күртл зогсна, тегәд көдлдг улст үдин хотдан һарч бас дарунь тәрлһ авч болҗана.
Хальмг Таңһчин эрүл-менд харлһна министерствин то-дигәр, сүл хонгт мана таңһчд дәкәд 20 күн гемтв. Ут тоодан пандемий эклснәс авн 20136 күн коронавирусн гемәр гемтснь илдкгдв. Ода райодын эмнлһсин улд секгдсн госпитальмуд хаагдсн бәәнә, зуг Элстд 3 госпиталь үүлдҗәнә. Тенд ода 260 күн эмнлһ авчана. Гемнь күнд кевәр давҗах 10 күүнәс һурвнь ИВЛ-аппаратд бәәнә. Һундл төрхд, 320 күн эн гемәс иштә сәәһән хәәв. Гемнь гиигнәр болн медмҗән угаһар давҗах 653 күн гертән эмнлһ авчана.
Шидр мана таңһчур коронавирусн гемәс саглуллһна вакцин дәкәд авч ирв, тегәд тәрлһ авх саната улс цуһар терүг кеҗ чадҗана. Таңһчд бәәдг улсин 60 процентнь тәрлһ авхла бидн дарунь эн гемиг диилҗ чадхвидн. Сүл кесн то-дигәр мана таңһчд 12 миңһн һар күн тәрлһ авв. Тегәд цаг олад, мобильн комплекст эс гиҗ поликлиникд тәрлһ авх кергтә.
Мана зәңгч

Урҗ өдр Хальмг Таңһчин эрүл-менд харлһна министрин дарук Оксана Курдюкова, Элст балһсна поликлиникин ах эмчин дарук Китан Ольга болн олна эрүл-мендин региональн төвин һардач Очра Галина олнд зәңгллһнә эв-арһсин көдләчнрлә харһҗ коронавирусн гемәс саглуллһна тәрлһнә керг-үүлдврмүд бүрдәлһнә тускар келҗ өгв.

Хальмгин эмчнр гүлгн гемәр гемтә залу күүнд геснднь бәәсн хавдриг уга кев. Месллһ кесн цагт гемнь түгәд, элкнә цусн гүүдг судцнд харшлтан күргснь медгдв. Тегәд онкологуд П.Жемчуевин нертә таңһчин эмнлһнә судцна хирургудыг дарунь дуудад, элкнә судцнд урһсн хавдриг уга келһнә месллһ түрүн болҗ кев.

Шидр П.Жемчуевин нертә таңһчин эмнлһнә гүлгн гемтә улст амбулаторн дөң күрглһнә төвин (ЦАОП) эмчнр Целинн районд одҗ бәәрн әмтнә эрүл-менд шинҗлв. Эн керг-үүлдвр «Гүлгн гемәс хөрлһн» гидг федеральн көтлврин медлд бүрдәгдв.

Хальмг Таңһчин эрүл-менд харлһна министерствин то-дигәр, сүл хонгт дәкәд 21 күүнд коронавирусн гем илдкгдв. Пандемий эклснәс авн мана таңһчд ут тоодан 20 миңһн шаху күн эн хальдврта гемәр гемтв. Теднәснь 19044 күн эдгв. Һундл төрхд, COVID-19 гемәс иштә мана таңһчд 313 күн сәәһән хәәв. Ода таңһчин госпитальмудт 324 күн эмнлһ авчана. Теднәснь ик зунь П.Жемчуевин нертә таңһчин эмнлһнд бәәнә. Яшкульд – 9 болн Баһ Дөрвд селәнд 10 күн эмчнрин хәләврт кергтә эмнлһ авчана, наадк райодын эмнлһст үүлдҗәсн госпитальмуд хаагдв. Гемнь күнд кевәр давҗадг 16 күүнәс 13-нь күнд бәәдлд тусад, ИВЛ-аппаратар кииһән авчана. Гемнь гиигнәр давҗах 882 күн гертән амбулаторн кевәр эмнлһ авч, эрүл-менд харлһна көдләчнрин селвгәр эм ууҗана.
Одахн Әрәсән эрүл-менд харлһна министерств регионмудла коронавирусн гемин туст тогтсн бәәдлин төрәр селвлцә давулсн билә. Терүнд таңһчин эрүл-менд харлһна министрин дарук Оксана Курдюкова болн зәңгллһнә-шинҗллтин төвин һардач Натыра Бадм орлцҗ, регионд эпидемиологическ бәәдл ямаран болҗахин тускар тооцаһан өгв. Мана таңһчд коронавирусн гемәр гемтсн улсин төлә 424 орм бүрдәгдсн бәәнә, ода терүнәснь һурвн зун һар орм олзлгдҗана. Таңһчин әмтн коронавирусн гемәс саглуллһна тәрлһ авчана. Одахн мана таңһчур «Гам-Ковид-Вак» гидг вакцинә 400 доз авч ирсн билә. Мөрн сарин эклцәр дәкәд 3 миңһн доз авч ирхмн, тегәд тәрлһ авхар бичгдсн улс цуһар терүг авч чадхмн.
Таңһчд коронавирусн гемәс хөрлһнә бачм штабин шиидврәр хаслһна диг-даран мөрн сарин 11 күртл утдулгдсн билә. Министерствсин болн ведомствсин хамцу көдлмшч багмуд олн-әмтн цуглрдг һазрт болн олна көлгнд бүртклһнә керг-үүлдврмүд давулҗ, Роспотребнадзорин санитарн некврмүд яһҗ күцәгдҗәхиг бүрткнә. Сүл өдрмүдт эпидемиологическ бәәдл ясрҗадг болв чигн саглуллһна некврмүдиг күцәх кергтәг мартхмн биш.

ДООҖАН Наталья

Мана таңһчд коронавирусн гемәр гемтсн түрүн күн илдкгдснәс авн дигтә җил болв. Тер цагас авн җилин туршарт таңһчин эрүл-менд харлһна көдләчнр эн хальдврта гемәр гемтсн улст дөңгән күргҗ, күнд-күчр таалд көдлҗәнә. Гемтә улсин то икдәд бәәхлә таңһчин эмнлһсин улд ут тоодан 6 госпиталь үүлддг болв. Сүл цагт эпидемиологическ бәәдл ясрҗахас иштә кесгнь үүлдврән зогсаһад, урдк кевәрн әмтнд медицинск дөң күрглһнә халхар көдлдг болв. Мана таңһчд 200 миңһн күүнә эрүл-менд шинҗлгдҗ, коронавирусн гем илдкҗ авхин төлә 170 миңһн ПЦР-шинҗллт кегдв. Пандемий эклсн цагас авн мана таңһчд ут тоодан 19859 күн эн хальдврта гемәр гемтв, теднәснь 18978 күн эдгв.

Шидр Хальмг Таңһчин правительствин Ахлачин негдгч дарук – финансин министр Шурһчин Очрин һардврт болсн селвлцәнд «Хальмг Таңһчин түрүн медицинск дөң күрглһнә халхиг ясруллһн» гидг региональн көтлврин медлд райодт олн дамшлтын эмчнрин офисмуд (ВОП) тосхлһна төр хәләгдв. Селвлцәнд таңһчин эрүл-менд харлһна, финансин, һазрин болн өлг-эдин хәрлцәнә министерствсин болн ФОМС-ин территориальн әңгин һардачнр орлцв.

П.Жемчуевин нертә таңһчин эмнлһнә барин цергллт зәңглсәр, моһа сарин 30-д Троицкое селәнд Целинн района стационарн әңгин улд бәәрн улсиг онкологуд хәләхмн. Таңһчин эмнлһнә гүлгн гемтә улст амбулаторн дөң күрглһнә төвин маммолог болн онкохирург селәнә улсин эрүл-мендин бәәдл шинҗлҗ, эдниг соньмсулҗах төрмүдәр цәәлһвр өгхмн.

Моһа сарин 20-әс авн мана орн-нутгт коронавирусн гемәс саглуллһна тәрлһ авлһна тускар цәәлһврин керг-үүлдвр эклв. Эпидемиологическ бәәдл ясрхин төлә мана орн-нутгин әмтнә 60 процентнь тәрлһ авх зөвтә болҗана. Тегәд әмтнд эн тәрлһнә тускар медүләд, терүг келһн әәмшг уга болн туста болҗахиг цәәлһҗәнә. Одахн Әрәсән Президент эн төрәр селвлцә давулҗ, мана орн-нутгт 6 сай күн тәрлһ авв гив. Бийнь В.Путин шидр бас тәрлһ авв. Мана таңһчд ода деерән 10 миңһн һар күн тәрлһ авсн бәәнә, эн керг-үүлдвр цаарандан давҗана.

Моһа сарин 24-д цуг нарт-делкәд садв гемәс хөрлһнә Өдр темдглгднә. Садв гем әәмшгтә болн хальдврта гем болна. Тегәд терүнәс саглуллһна, гемтә улсин эрүл-менд батруллһна, әмтн дунд эн гемин тускар цәәлһврин көдлмш давуллһна төрт ик оньг өггднә. Мана таңһчд эн хальдврта гемәр гемтсн улсин то җил ирвәс баһрҗадг болв чигн терүнәс хөрлһнә керг ик чинр зүүнә.