2023 җиләс авн мана орн-нутгт һарсн нилхдин эрүл-мендин бәәдл шинҗллһнә керг-үүлдвр эклсмн. Терүнә йовудт урднь тавн күнд гем илдкҗ авдг бәәсмн, ода болхла 36 гем эртәр илдкҗ авгдҗана. Мана таңһчд эн җилин эклцәс авн 913 нилхд гүн шинҗллт кегдв.

Давсн долан хонгт мана таңһчд «Эрүл-менд бәәтн!» гидг керг-үүлдврин дарани девсң эклв. Яшалтан района Ульяновское болн Яшалта селәдт эмчнр хамгин түрүнд одв. Эн өдр ут тоодан 106 күн эмчнрт ирәд, эрүл-мендин бәәдлән шинҗлв, эмнлһнә туст сүв-селвг авв.

Хальмг Таңһчин Толһач Хаска Батун седвәрәр 2024 җилин зунар мана таңһчд түрүн болҗ «Эрүл-менд бәәтн!» гидг керг-үүлдвр бүрдәгдсн билә. Терүнә йовудт эмчнр таңһчин райодар йовҗ, селәнә әмтнә эрүл-мендин бәәдл шинҗлҗ, эмнлһнә туст дөң күргсн билә. Шидр Хальмг Таңһчин эрүл-менд харлһна министр Саран Булат олнд зәңгллһнә эв-арһсин көдләчнрлә харһад, урднь болсн керг-үүлдврин ашин болн эн җил ямаран шинрлтс орулгдсна тускар келҗ өгв.

Яшкулин района әмтнә социальн теткврин комплексн төвин социальн көдләч Аван Кермн төрскн Чилгр селәнд арвн долан җилдән һанцарн бәәдг медәтнрт, гемтә-шалтгта улст дөң күргҗ, үнн-чик седклтәһәр көдлсмн. Эн җил социальн көдләчин сән өдрлә Кермн Деглеевнан ач-тус темдгләд, «Хальмг Таңһчин әмтнә социальн харслтын ачта көдләч» гидг өөдән нерн зүүлһгдсмн. Хамдан көдлҗ йовсн үүрмүднь, нег һазра улс болн өрк-бүлнь байринь хувалцҗ, ачлвр авснлань цаһан седкләсн йөрәв.

П.Жемчуевин нертә таңһчин эмнлһнә көдләчнр цергә шишлң керг-үүлдврт орлцачнрин эмнлһнә болн эрүл-менд батруллһна кергт ик тәвцән орулҗана. Шав авсн цергчнр эмнлһнә әңгүдт өөдән чинртә эмнлһ авна, кергтә болхла эднд месллһ кенә болн реабилитацин керг-үүлдврмүд давулна. Цергә шишлң керг-үүлдвр эклснәс авн таңһчин эмнлһнә көдләчнр миңһн һар цергчд дөңгән күргв. Одахн Хальмг Таңһчин эрүл-менд харлһна министр Саран Булат болн «Дәәч» гидг цергә болн спортивн белдврин төвин әңгин һардач, ЭГС-ин депутат Чумуда Николай таңһчин эмнлһнә ах эмч Чумпинә Саглрла харһад, СВО-д орлцачнрт дөң күрглһнә төрәр күүндв.

Эн җилин үвләр Хальмг Таңһчин Толһач Хаска Батун седвәрәр таңһчин селәдәр «Эрүл-менд бәәтн!» гидг керг-үүлдвр күцәмҗтә кевәр бүрдәгдҗ давулгдв. Хол селәдт бәәдг улс эрүл-мендин бәәдлән шинҗлҗ, эмчнрт бийән үзүлҗ, олн зүсн гемиг эртәснь илдкҗ цаглань эмнлһ авхин төлә мергҗлтнр район болһнд одв. Элст балһсна поликлиникин Троицкое селәнд үүлддг 5-ч тойгта терапевтическ әңгд бас эн керг-үүлдвр давулгдсн билә.

Шидр П.Жемчуевин нертә таңһчин эмнлһнд Хальмг Таңһчин ачта эмч, Әрәсән эрүл-менд харлһна йилһән сән көдләч Нина Опиеваг ончта өөнләнь йөрәв. Нина Ивановна эн эмнлһнд 1987 җиләс авн көдлҗәнә, үүрмүд дунд эн ик күндллһ олҗ, байн дамшлтта болн өөдән мергҗлттә эмч болҗ тоолгдна.

Җил болһн мөрн сарин 20-д мана орн-нутгт эврә сән дурар цусан өгдг улсин төлә Келн-улсин өдр болна. Цусан өгч әм аврдг улст, цус авдг бүрдәцсин көдләчнрт нерәдҗ эн өдр зарлсмн. Әрәсәд җил болһн ут тоодан күсдундур сай күн цус керглнә. Зеткртә йовдлд шав авсн, күнд гемәр гемтсн, цаһан төр болсн, бачм бәәдлд көдлсн улст цусн кергтә болна.

Элстин медәтнрин болн гемтә-шалтгта улсин гер-интернатд дөчн һар җилдән көдлҗәдг медицинск эгч Улана Ирина эрдмдән итклтә, өөдән мергҗлттә болн байн дамшлтта көдләч мөн. 1983 җиләс авн Ирина Улюмджиевна эн социальн бүрдәцд үнн-чик седклтәһәр көдлҗ, өнчн медәтнрт килмҗән тусхаҗ, цаһан седклән нерәдҗ, бүлән үгәрн эдгәҗ түшг болна. Эн җил Улана Иринад «Әрәсән әмтнә социальн харслтын ачта көдләч» гидг шаңһа ачлврар ачлҗ, күч-көлсинь темдглв.

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн» гидг керг-үүлдврин түрүн девсң төгсв. Лу сарин 12-ас авн моһа сарин 19 күртл эмчнрин багмуд таңһчин селәдәр йовад, бәәрн әмтнә эрүл-менд шинҗлв.