Сүл җилмүдт «Эрүл-менд харлһн» гидг келн-улсин төсвин медлд таңһчин селәдт шин эмнлһс тосхгдҗ, кергсләр теткгдҗ, әмтнә төлә сән таал тогтагдҗана. «Земск эмч/фельдшер» гидг шаңһа көтлвр батлгдсна ашт эрүл-менд харлһна көдләчнр селән һазрт көдлхәр ирҗәнә. Дәкәд селәнә эмнлһст көдлҗәдг эрүл-менд харлһна көдләчнриг урмдулҗ дөңнхин төлә немр демин мөңг өгдг болв. Цуг эн эв-арһс селәнә улс сән чинртә эмнлһ авч, төрскн һазртан торад бәәхд туслҗана.

Әрәсән Президент Владимир Путин Федеральн хургт кесн Илгәврт ах үйин улсин эрүл-менд батруллһна, ачта амрлһнд һарсн медәтнрин бәәдл-җирһл соньн болҗ, эдн олна керг-үүлдврмүдт орлцхиг урмдуллһна төлә немр келн-улсин төсв батлхин тускар келсн билә. Терүнә медлд медәтнр чик авг-бәрцәр бәәҗ, спортар соньмсхин, билг-эрдмән делгрүлҗ, олн зүсн үүл бәрҗ цаган сергмҗтәһәр давулхин, баһчудла харһҗ дамшлтарн хувалцхин төлә керг-үүлдврмүд күцәгдхмн гиҗ зуралгдҗана.

«Медрл.Лектор» гидг Цугәрәсән марһанд Хальмг Таңһчас 32 күн эрлһән орулҗ, ниицәнә медлд сурһулин керг-үүлдврмүдт орлцх зөв авх санаһан медүлв. Мана орн-нутгин регион болһнас ут тоодан 19610 күн терүнд орлцҗана. Ноха сарин 20-әс авн үкр сарин 14 күртл болх региональн девсңд 1500 бөдүн күн болн оютн орлцҗана. Марһанд орлцачнр «Медрл» гидг Әрәсән олна ниицәнә бәәрн әңгүдин дөңгәр региондан лекцс умшҗ, онлайн кевәр болх күүндврт шинҗләчнрлә харһҗ, бийиннь тускар келҗ өгхмн.

Целинн района Найнтахн селәнд ик-бичкн уга медицинск эгч Валентина Дарбаковаг күндлнә, эн түрүн дуудврар дарунь күрч ирәд, дөңгән күргхәр адһна. Тәвн шаху җилдән селәнә эмнлһнд көдлҗәдг Валентина Сянцаковна күн болһниг сәәнәр медҗ, кен ямаран гемтәһинь, кенд кезә ямаран шинҗллт кехинь, эмнлһ авхинь цугинь тоод авч, цаглань эмчд бийән үзүлхиг некнә. Бийнь эн Найнтахн селәнд өсәд-боссмн, тегәд тааста эрдмәрн төрскн һазртан ирҗ көдләд, олнд тусан күргҗ, олн җилин эргцд үнн-чик седклтәһәр үүлдҗ йовхнь бахмҗта йовдл мөн.

Маңһдур мана орн-нутгт эрүл-менд харлһна көдләчнр сән өдрин байран темдглхмн. Эрүл-менд харлһна көдләчин эрдм кезә чигн ик дааврта, күндтә болн тоомсрта гиҗ тоолгдна. Өцклдүр Элстд болсн байрин хургт таңһчин эрүл-менд харлһна халхд үнн-чик седклтәһәр көдлҗ йовх улсин ач-тусинь темдглҗ олн ачлвр бәрүлҗ өгв.

Баһ Дөрвдә района Тундутово селәнә эмнлһнд давсн җилин хаврас авн баахн эмч Каарун Надежда көдлҗәнә. Энд нидн олна дамшлтын эмчин офис (ОВОП) секгдсмн, тегәд Баһ Дөрвдә района эмнлһнд көдлҗәсн Надежда Сергеевна нааран ирв. Ик сурһуль төгсәснә хөөн эн «Земск эмч» гидг көтлврин халхар района эмнлһнд күч-көлснә хаалһан эклсмн. Долан җилдән района эмнлһнд көдләд, баахн эмч ах үүрмүдәсн дамшлт хоршаҗ авв. Эмч насарн баахн болв чигн кергән йилһән сәәнәр меддг, әмтнлә тевчңгү болн килмҗтә, цаһан седклтә күн болҗахиг селәнә бәәрн улс дарунь медәд, күндлҗ энүг тевчнә.

«Эрүл-менд харлһн» гидг келн-улсин төсвин «Хальмг Таңһчин эрүл-менд харлһна түрүн халхин шинрүллһн» гидг региональн төсвин медлд нидн намр Үстин района Цаһан Амн селәнд поликлиникин ясвр эклсмн. Хальмг Таңһчин Толһач Хаска Бату эмнлһнд бат ясвр кеҗ, әмтнд сән таал тогталһна төр чаңһар бүрткнә. Ясврин көдлмш эн җилин чилгчәр төгсх зөвтә бәәсмн, болв тосхачнр болзгаснь урд цугинь кеҗ дуусв.

Элст балһснд бәәдг Аршина Анна бичкнәсн авн өөмхдән дурта. Эднә өрк-бүл Ростовск мүҗин Зимовниковск района Конезавод селәнд бәәдг билә. Тенд бәәрн бичкдүд зуни цагт һолд өөмәд, бийснь усчдг дассмн. Эдн дерин һадриг салькнд делсәд, терүг олзлҗ өөмдг дассиг Анна Борисовна ода инәҗ тодлна.

Җил болһн цуг нарт-делкәд скандинавск йовлһна Өдр темдглгднә. Эн җил энүг хөн сарин 18-д болн 19-д темдглв, тегәд хойр өдрин туршарт цуг нарт-делкәд әмтн цуглрад, шишлң тайг һартан авад, хамдан йовһар йовв. Мана орн-нутгт эн өдр арвн җил хооран темдглгддг болв. Мана таңһчд скандинавск йовлһар соньмсдг улсин то җил ирвәс икдәд йовхнь темдгтә.

П.Жемчуевин нертә таңһчин эмнлһн «Эрүл-менд харлһн» гидг келн-улсин төсвин медлд өдгә цага кергсләр теткгдв. Ут тоодан 20 һар кергсл углҗ тәвгдв, эннь УЗИ, ИВЛ аппаратмуд, шишлң орн, күнд гемтә улст дөң күрглһнә болн эднә эрүл-менд батруллһна кергслмүд мөн.