Шин җилин байрин амрлһна өдрмүдт полицин көдләчнр өдр-сө уга көдләд, әәмшг уга бәәдл тогтав. Өдгә амр биш цагт полицин көдлмшинь өөдәнәр үнләд, эн җилин туула сарин 1-әс авн таңһчин ППС-ин көдләчнр сар болһн 10 миңһн арслң немр дем авхмн. Шидр Хальмгин Толһач Хаска Бату ирлцңгү зәрлг һарһв. Тодлхд, 2023 җиләс авн полицин әңгүдин дааврта көдләчнр сар болһн тавн миңһн арслң авдг болв, тер мет җилин йовудт ончрсн әңгин дааврта көдләч 50 миңһн арслңга демәр темдглгднә.

Урҗ өдр күч-көлснә шин җил эклв. Төрскн һазрин делгрлтин төлә цуһар седклән тәвҗ көдлхәр зүткчәнә.
Эн җил усна сурвлҗна тосхлтын, малын хот белдлһнә шин көтлвр күцәлһнә болн талдан чинртә төрмүд хаһлгдх зөвтә. Тер мет Хальмг Таңһчин делгрлтин шишлң көтлвр цаарандан күцәгдхмн.

Туула сарин 5-д Элст балһснд бәәдг Светлана Зулаевна Бамбышева 100 җилин ончта өөнән өргәр темдглҗ, олн ачнр-зеенрән, элгн-садан цуглулв. Хальмг Таңһчин Толһач Хаска Бату нәәрин күндтә гиич болад, ик ачта ээҗиг өөнләнь йөрәҗ, өнр-өсклң өрк-бүлин байринь хувалцв.

Өрк-бүлд үрн һархла ончта йовдл болдгнь мөн. Шин җилин эклцәр Элст балһснд бәәдг олн үртә Калмыковихнә өрк-бүлд туула сарин 1-д көвүн һарснь эк-эцкин болн дөрвн ах-эгчин төлә ик байр үүдәв.

Шидр Элстд Баатрмудын Аллейд ВДВ-н гвардейск нисәчнрин салу 83-ч багин тавдгч ротын командир, гвардин капитан, Әрәсән Баатр Лиҗин Мингияна һарсн өдрт нерәдсн митинг болв. Мингиян Владимирович цергә шишлң керг-үүлдврт орлцад, туурмҗарн ончрад әмнәсн хаһцв. Әрәсән Президентин зәрлгәс иштә Лиҗин Мингиянд Әрәсән Баатрин нерн зүүлһгдсн болдг.

Давсн җилин чилгчәр, бар сарин 28-д, Элстд «Буйслһн болн босхмҗ» бумблвин өөр тууҗин һашута өдрт нерәдсн санлын митинг болв. Найн негн җил хооран ик-бичкн уга цуг хальмгудыг хар гөрәр киитн Сиврүр күчәр нүүлһв.

Городовиковск района Веселое селәнд бәәдг Виктор Михайлович болн Зоя Степановна Кусковихн дөрвн көвүндән бичкнәснь авн чик сурһмҗ өгч, нег-негән хәләҗ, чик авг-бәрцәр бәәхиг болн хоорндан ниитә болхиг дасхсмн. Ууһн Виталий көвүнь ардасн һурвн дү дахулад, эк-эцкдән түшг болҗ, дүүнртән үлгүр болхар шундмн. Дүүнрнь ахасн үлгүр авх гиһәд, эн герин көдлмш кеҗ, мал асрҗ, эк-эцкдән нөкд болдмн. Цергә шишлң керг-үүлдвр эклхлә Виталий бооца батлв, энүнә үлгүрәр Максим бас ард үлдсн уга. Эцкнь көвүдиннь шиидвриг дөңнҗ, залу күн эрк биш Төрскән харсх зөвтә гиҗ келсмн.

Нертә бичәч болн шүлгч Җимбин Андрейин 100 җилин өөнд нерәдсн сурһульчнрин марһан Хальмг ик сурһульд болв. Бичәч, Төрскән харсгч Алдр дәәнә ветеран, мана хотл Элст балһсиг 1942 җилин чилгчәр сулдхсн баһ наста дәәч, дәкәд элгн-садтаһан хамдан тууврин зовлңла харһсн салдс эврә үүдәврмүдтән тер амр биш җирһлин тускар умшачнртан келҗ өгсмн.

Кен-негнәннь бәәдл-җирһлд баһ цагтнь үүдсн үр-иньглгч залһлдан насн ирх дутм геедрх бәәтхә нам җил ирвәс батрад-делгрәд йовдгнь нуувч биш. Зәрм улсин төлә үр- дүңгнь нам элгн-саднлань әдлхн өөрхн улс чигн болҗ тоолгдна биший. Шидр мана редакцин хайгар «Хальмг үннә» умшачнр Онтан Роза, Мацка Алла болн Бадендән Галина бичгән илгәҗ, эврә өөрхн нәәҗән йөрәх седклән медүлв:

Багшан бичә марттн,
Бичә терүг һундатн.
Терүнә седкл таднд
Терүг бичә марттн,
гиҗ хальмг улсин шүлгч Шугран Вера багшин чинринь өөдлүлҗ,күн болһна җирһлд эн күн онц орм эзлҗәхинь дәкн нег олнд тодлулҗ,эврә үүдәвртән бичсн болдг. Үзг-тамһ меддго шинкн сурһулин герин үүднә мөр алхҗ орҗ йовх бичкдүдиг цугтаһаснь түрүлҗ тосад,һартаснь көтләд медрлин хаалһд орулдгнь мел багш болҗана,цааранднь болхла арвн шаху җилин эргцд һаринь һанзһд, көлинь дөрәд күргх күсл зүүҗ, сурһульчнртан нүдн-амн болҗ, бүлән үгәрн седклинь халулҗ йовдгнь бас мел эн күн болна эсий. Тегәд йириндән чигн багшин ач-туснь тедү мет өөдәнәр үнлгдҗ, олна дунд күндллһ олснь тер.