Билгтә бичкдүд дунд җилин туршарт олн-зүсн марһас бүрдәгднә. Шидр Элстд зургуд зурлһар бичкдүд дунд марһан болв. «Хамдан – нег нутг» гиҗ нерәдгдсн марһанд олн күүкд-көвүд орлцв.

Басңга Баатрин нертә Келн-улсин театр дарани нарт-делкән наадмд одад ирв. «У Троицы» гиҗ нерәдгдсн театрмудын эн хәләврт Хальмг театр «Я – Будда» гидг наадан үзүлв.

«КТК – билгтә бичкдүдт» гидг көтлвр таңһчд олн җилдән үүлдҗәнә. Энүнд давсн җилд Москваһас көгҗмин багш Валерия Кузнецова ирҗ орлцсн билә. Көгҗмин багш билгтә бичкдүдт мастер-класс өгснь цугтад тодлгдла.

Е. Толкачевин нертә бичкдүдин бииһин «Тюльпанчик» ансамбль Ростов-на-Дону балһснд билг-эрдмән үзүлв.

Санкт-Петербург балһснд бииһин спортар нарт-делкән марһан болсмн. «DANCE MASTER CUP 2024» гиҗ тер нерәдгдлә.

Төрскән харсгч Алдр дән эклсн мөчн сарин 22 өдриг угтад, Элстд көгҗмин-шүлгләнә наадн әмтнә оньгт тусхагдв. Манҗин Аркадин нертә Хальмг госфилармоня, Басңга Баатрин нертә Келн-улсин театрин артистнр дән эклсн өдриг тодлулад, дәәнд әмнәсн хаһцсн зөргтә баатрмудын санлд терүгән нерәдв. Эн үүлдврт «Академия талантов» гидг сойлд болн билг-эрдмд дөң болдг төвин бичкн артистнр бас орлцв.

Орс географин ниицәнә кемҗәнд Хальмг ик сурһулин болн Крымин ик сурһулин нөкцлт делгрҗәнә.

Селән һазрт бәәдг улсин җирһлин таал ясрулхин төлә мана орн-нутгт олн зүсн шаңһа көтлвр батлгдсн бәәнә. Теднә негнь әмтнә седвәр дөңнҗ, ямр нег төсв күцәлһнд шаңһа хазнас дөң күрглһнә көтлвр болна. Эн көтлврт орлцад, әмтн селәндән сән кец-таал тогталһна, бичкдүд нааддг эс гиҗ спортивн талвң тосхлһна, нег һазра улсин санл мөңкрүллһнә керг-үүлдврмүд күцәнә. Болв седвәр татсн улс бийснь болн селәнә муниципальн бүрдәц бас эврә демән күргҗ, төсв күцәлһнд мөңгән немх зөвтә.

Целинн района Найнтахн селәнд ик-бичкн уга медицинск эгч Валентина Дарбаковаг күндлнә, эн түрүн дуудврар дарунь күрч ирәд, дөңгән күргхәр адһна. Тәвн шаху җилдән селәнә эмнлһнд көдлҗәдг Валентина Сянцаковна күн болһниг сәәнәр медҗ, кен ямаран гемтәһинь, кенд кезә ямаран шинҗллт кехинь, эмнлһ авхинь цугинь тоод авч, цаглань эмчд бийән үзүлхиг некнә. Бийнь эн Найнтахн селәнд өсәд-боссмн, тегәд тааста эрдмәрн төрскн һазртан ирҗ көдләд, олнд тусан күргҗ, олн җилин эргцд үнн-чик седклтәһәр үүлдҗ йовхнь бахмҗта йовдл мөн.

Җил ирвәс мана таңһчд амрлһна кемиг тустаһар давулх саната бичкдүдин то өсәд бәәнә. «Демографь» гидг келн-улсин төсвин «Хальмг Таңһчд күч-көлс харлһна, таал ясруллһна болн әмтиг көдлмшәр тетклһнд туслһн» гидг көтлврин йовудт җил болһн насни дигт күрәд уга бичкдүд цаг зуур көдлмшәр теткгднә. Эдн амрлһна кемд күнд биш көдлмш кеҗ, мөңг олна. Нурһлҗ эдн сурһулин улд үүлддг лагерьмүдт, дегтрин саңд көдлнә, эргднк һазриг хог-богас цеврлнә, санлын самбрмудыг ширдҗ сәәхрүлнә, ветеранмудт социальн дөң күргнә.