Хальмг улсин Зулын байрт нерәдәд Элст балһсна һардвр «Йөрәл» гидг онлайн-марһа зарлсн билә. Шидр терүнд диилвр бәрсн сурһульчнриг ачллһна байрин керг-үүлдвр болв. Эднд хальмг улсин алдр дуулвр «Җаңһр» болн Диплом бәрүлҗ өггдв. Тер мет хальмг улсин авъясар эдниг шикр-балтаһар тоов.

Шидр Хальмг Таңһчин Толһач Хаска Бату «Әәмшг уга болн сән чинртә хаалһс» гидг келн-улсин төсвәр мана таңһчд кесг хаалһс тосхгдсна, ясгдсна тускар
келҗ, ирх җилд эн туст көдлмшән шунмһадулхвидн гиҗ темдглв. Эн келн-улсин төсвлә зерглҗ «Хальмг Таңһчд көлгн-күчнә комплексин болн хаалһин эдл-ахун
делгрлт» гидг көтлврәр таңһчин райодт бас шин хаалһс тосхгдҗана. Эн өдрмүдт Хар Һазра района Комсомольск селәнд хаалһ тосхлһна көдлмш төгсхдән
өөрдҗ йовна.

Хальмг Таңһч коронавирусн гемәр гемтсн улсин тооһин кемҗәһәр орн-нутгт 4-ч ормд бәәнә гиҗ таңһчин ах санитарн эмч Санҗин Җаңһр келв. Харм төрхд, сүл цагт өдр болһн зу һар күүнд эн хальдврта гем илдкгдҗәнә. Таңһчин сурһульмудт күүкд-көвүд ОРВИ гемәр гемнҗәхнь икдҗәнә, тиигәд 111 сурһульч эн гемәр гемтсн бәәнә. Роспотребнадзорин таңһчар үүлддг заллтын һардачин келсәр, коронавирусн гемәс хөрлһнә штабин сүүрт таңһчин сурһульмудын үүлдвр зогсалһна төр хәләгдхмн гиҗ зуралгдҗана. Тер цагт сурһульчнр үвлин амрлһнд цаг-болзгасн урд һархчигн биз. Таңһчин эрүл-менд харлһна министерствин то-дигәр, 13337 күн коронавирусар гемтв. Сүл хонгт дәкәд 105 күүнд эн гем илдкгдв. Таңһчин госпитальмудт 758 күн эмнлһ авчана. Теднәснь 70 күн 1-ч тойгта, 63 күн 4-ч тойгта болн 361 күн 3-ч тойгта госпитальд бәәнә. Хальмг ик сурһулин 8-ч тойгта общежитин улд секгдсн немр госпитальд 19 күн эмнлһ авсна хөөн эрүл-мендән батрулҗана. Дәкәд 52 күн Деед Яшкулин интернатд эмчнрин хәләврт немр эмнлһ авчана. Райодт үүлддг госпитальмудт бас эмнлһ авчах улсин то икдв. Тиигәд, Яшкульд ода
60, Көтчнрт 49 күн бәәнә. Күнд кевәр гемнь давҗах 22 күүнәс 12-нь ИВЛ-аппаратар кииһән авчана. Эн гемәс көлтә 177 күн сәәһән хәәв. Гемнь медмҗән угаһар болн гиигнәр давҗах 4347 күн гертән амбулаторн эмнлһ авчана. Пандемий эклсн цагас авн 10905 күн эдгв, сүл хонгт теднә тоод 119 күн немгдв. Таңһчин эрүл-менд харлһна министр Кикенә Юрийин келсәр, коронавирусн гемәс саглуллһна тәрлһиг олн әмтн авсна хөөн эпидемиологическ бәәдл ясрхмн. Ода деерән терүг зуг эрүл-менд харлһна, сурһуль-эрдмин болн социальн көдләчнр авчана. Болв терүг эврә сән дурар авх улсин то-диг тогтагдҗана. Олн әмтн хальдврта гемәс саглуллһна тәрлһ авад уга бәәтл цуһар санитарн некврмүд күцәҗ саглх зөвтә. Олн әмтн цуглрдг һазрт эрк биш чирәдән хааһул өмсх кергтә, ода деерән эн эв-арһ хамгин туста болҗана гиҗ министр темдглв.
БАТАН Сәәхлә

Баһ Дөрвд селәнд хөрн тавн җил хооран көгшдин болн гемтәшалтгта улсин гер-интернат секгдсмн. Түрүләд энд зуг зурһан күн билә, эндр болхла эн социальн бүрдәц 53 көгшдин төлә йоста эврә гернь болв. Социальн көдләчнр күн болһнд килмҗән тусхаҗ, эдниг арднь орҗ сәәнәр хәләҗ сүл өдр күртлнь өөрнь бәәнә. Энд бәәдг медәтнр гертән бәәснлә әдл бәәҗ, эднә төлә сән таал тогтаснд, эднә җирһлд байр-бахмҗ үүдәхин төлә соньн керг-үүлдврмүд бүрдәснд ханна. Шидр бидн эн социальн бүрдәцин һардач Манҗин Людмилад җиңнүләд, гер-интернатын өдр-бүрин тускар келҗ өгхиг сурвидн.

Пандемий эклснәс авн мана таңһчд коронавирусн гемәс хөрлһнә кергүүлдврмүд дару-дарунь давулгдна.Тиигәд хулд-гүүлгәнә, олн әмтн хот уудг объектсәр болн олна көлгн-күчнд ведомствс хоорндк көдлмшч багмуд бүртклһнә керг-үүлдврмүд күцәнә. Терүнә йовудт әмтн болн арһлачнр Роспотребнадзорин санитарн некврмүд ямр кевәр күцәҗәхиг шинҗлнә. Батлгдсн диг-дараһар эн көдлмшч багмуд хотл Элст балһснд болн таңһчин райодар бүртклһ кенә.

Әрәсән Президент Владимир Путинә даалһврар мана орн-нутгин цуг регионмудар коронавирусн гемәс саглуллһна тәрлһ келһнә керг-үүлдвр өргнәр күцәгдх зөвтә. Мана орн-нутгт кеҗ һарһгдсн «Спутник V» гидг вакцин өңгәр йилһгдҗәнә. Болв терүг шишлң таалд хадһлҗ зөөх неквр бәәдгәс иштә терүг дигтә-даратаһар регионмудар йовулҗана. Мана таңһчур чигн эн вакциниг авч ирсн бәәнә.

Давсн амрлһна өдрмүдт Хальмг Таңһчин Толһач Хаска Бату көдлмшин кергәр Көтчнрә районд ирв. Тенд Таңһчин Толһач тосхгдҗах социальн объектс бүрткҗ хәләв, Чапчан Арашин нертә тохма мал өскдг эдл-ахуд одв. Районд одснаннь тускар Бату Сергеевич социальн сетьд бичв.

Коронавирусн хальдврта гемәс хөрлһнә таңһчин бачм бәәдлин штабин шиидврәр Хальмг Таңһчд хаслһна диг-даран бар сарин 13 күртл утдулгдв. Тер мет 65 наснас ах улст гемәс саглҗ гертән бәәлһнә туст сүв-селвг өггдҗәнә. Оперштабин тоолврар, хаслһна диг-дарана дарук девсңд һархин төлә Роспотребнадзорин некврлә ирлцдг эпидемиологическ бәәдл тогтад уга.

П. Жемчуевин нертә таңһчин эмнлһнә эрүл-менд харлһна көдләчнр коронавирусас хөрлһнә кергт шунмһа кевәр орлцҗана. Энд үүлдҗәдг 3-ч тойгта госпитальд эн хальдврта гемәр күнд кевәр гемтсн улс эмнлһ авна. Эмнлһнә барин цергллтин зәңглсәр, хулһн сард эн госпиталин медлд немр әңг, Целинн района Деед Яшкуль селәнд санаторн сурһуль-интернатын улд, секгдсн билә. Энд әмтн госпитальд эмнлһ авсна хөөн эрүл-мендән батрулна.

Экин сән Өдр угтҗ Хальмг Таңһчин социальн делгрлтин, күч-көлснә болн көдлмшәр тетклһнә министерствд «Җилин сән гисн өрк-бүл» гидг Цугәрәсән марһанд диилвр бәрсн Улана Очрт болн Натальяд диплом бәрүлҗ өггдв. Эдн «Олн үртә өрк-бүл» гидг номинацд диилвр бәрв.