«Модн» гидг фабрик хальмг зурачнр Хаалһ Поваевала болн Байслң Эдняшевала хамдан «Халга&Модно» гидг төсв белдв. Зурачнр эврәннь зургудан эд деер буулһв. Терүнд хальмг улсин алдр «Җаңһр» дуулврин баатрмуд, хальмг теегин сәәхн йиртмҗ, темәд, гөрәсд зурата. Тер мет зургудыг дахулад тод бичгәр бичгдсн үгмүд бәәнә.

Давсн җилд Луганск Улсин Республикин Антрацитовск района гемтә-шалтгта бичкдүд мана таңһчур ирәд, эмнлһ авч эрүл-мендән батрулсн билә. Эн сарин чилгчәр эрмдгтә бичкдүдин дарани баг мана тал ирхмн гиҗ күләгдҗәнә.

Сурһулин җил угтҗ мана таңһчд «Бичкдүдиг сурһульд белдхд дөң болтн» гидг буйнч седклин керг-үүлдвр давуллһн сән авъяст тохрв. Җил болһн терүнә йовудт баһ тетквртә, олн үртә болн җирһлин күнд таалд туссн өрк-бүлмүдин бичкдүдиг сурһульднь кергтә эд-таврар теткнә, хувц-хунр хулдҗ өгнә.

Түрүн хальмг профессор Бадмин Батан нертә Баһ Дөрвдә гимназь таңһчин сән гисн сурһульмудын тоод орна, сурһульчнрнь таңһчин болн Цугәрәсән марһаст кезә чигн йилһрнә. Гимназин һурвн давхр гериг 1977 җилд тосхла, тегәд ода тәвн шаху җил болад хуучрад бәәсн гериг тосхачнр шинрүләд, эрс-ораһинь шинәс бүркәд таньҗ болшго кевәр сәәхрүлҗ хүврүлв.

Олн-зүсн үүлдвр амрлһна эн бәәрнд цуг таал цагин некврлә ирлцүлгдҗ күцәгдхм. Бурхн Багшин номд шүтдг олн келн улсин авъясмудын ул деер терүгинь әмтнд сән кевәр амрлһна цуг таалыг тогтадг тосхлтын өдгә цага янз олзлҗ кегдҗәнә. Ик иргчтә соньн эн төсвиг күцәлһнд 120 сай һар мөңгн һарһгдҗана.
Ноһан Дәрк бурхна паркиг бүрдәҗ цуг халхарнь ясрулгдҗ, эдлврт орулхин төлән тускар таңһчин ЖКХ-н болн энергетикин министрин дарук Хактан Сергей зәңглв. Ноһан Дәркин бурхна парк Лагань балһсна әмтнә амрлһна дәкн нег талвңгнь болхмн.

Хальмгт төрскн келнә өдрлә ирлцҗ келн улсин җирһлд ончта чинр зүүҗәх йовдлмуд болҗана. Хол өвкнрәс маднд зөөр болҗ заягдсн «Җаңһр» баатрлг дуулврин 585 җилин өөн темдглгдҗәнә. Хальмгудын хәәртә дуулврин өөнд нерәдҗ, олн керг-үүлдвр күцәгдҗәнә.

Намрин кем эклхлә гриппәс саглулҗ тәрлһнә керг-үүлдвр эклнә. Эн өдрмүдт таңһчд үүлддг социальн бүрдәцст бәәдг медәтнрт болн эрмдгтә улст тәрлһ кеҗәнә. Терүг 729 күүнд кехмн гиҗ зуралгдҗана.

Приютна района Воробьевка селән 150 җилин өөнән темдглв. Эн һазрт кесг үйин тууҗ әрүнәр хадһлгдҗ йовна. 1875 җилд энд селән бүрдәгдҗ орс чонҗ босхгдсмн. Урднь эн Бислүртә гиҗ нерәдгдҗәлә. Хальмг Таңһчин Толһач Хаска Бату селәнә әмтиг ончта өөнлә йөрәһәд, эн һазра баатрмудын нердиг зааһад, бәәдг улсин төрскнч седклин залмҗар Воробьевка селән делгрҗәхиг темдглв.

Шидр таңһчин Толһач Хаска Бату шатрин балһсн - Сити-чесст одад, бат ясврин йовудыг хәләв. Ясврин көдлмш гүргүдән орсн бәәнә.

Эн җил хальмг улсин «Җаңһр» баатрльг дуулврин 585 җилин өөн болҗана. Хальмг Таңһчин Толһач Хаска Батун темдглсәр, Хальмгин өрк-бүл болһнд, тер тоод Хасиковихнә бүлд, эн дуулвр онц чинр зүүдг үүдәвр болна.