«Медитации: размышления Его Святейшества Далай-Ламы» гидг альбом «Грэмми» көгҗмин мөрә авх марһана ашлгч девсңд орсн зәңг шидр ирв. Җил болһн эн мөрән аш диглгднә. Эн җилд җирн нәәмдгч кемдән болҗадг мөрән ашлгч үүлдвртнь Дала Ламин көгҗмин альбом заагдснь йир соньн болв. «Лучшая аудиокнига и повествовательная запись» гидг әңгд Дала Ламин төсв темдглгдҗәнә. Җил болһн болдг мөрән дииләчнриг Лос-Анджелес балһснд 2026 җилин лу сарин 1-д ачлхмн.

Хальмгин «Җаңһр» наадһасин театрин артистк Эльза Сельвина Әрәсән театрин үүлдәчнрин Ниицәнә төсвд орлцхмн.
«Творческий практикум. Звенигород СТД РФ» гиҗ нерәдгдсн нарт-делкән сурһуль-эрдмин гидг төсвд орлцх зөв хальмг артистк Эльза Сельвинад учрв.
«Нарт-делкән сурһулин лабораторь» гидг көтлврт кесг орн-нутгин театрин артистнр орлцҗана. «Творческий практикум. Звенигород СТД РФ» гиҗ нерәдгдсн эн керг-үүлдвр бар сарин 8-әс авн 14 күртл болхмн.

Чиңһс хан нарта орчлңла мендлсн цагас нааран 863 җил болҗана. Җил болһн Моңһлд үкр сарин 21-д энүнә һарсн өдр темдглнә. Эннь моңһл келн-улсин йоста бахмҗин өдр болна.

Көтчнрә района Тугтн селәнд бәәдг олн үртә Бурлыка Нина отг-әәмгтән күндтә, көдлмшч, әмтнлә ээлтә күүкд күн гиҗ тоолгдна. Виктор Богаевич авальтаһан эдн 47 җилдән ни-негн бәәнә, эдн дөрвн үрән асрсн деерән Нина Гаряевнан зе күүкиг өскәд босхсмн. Күүкднь тааста эрдмәрн сурад, бийснь олн үр һарһад, сән улс болсн төләднь Бурлыковихн «Күүкдтән чик сурһмҗ өгсн төлә» гидг темдгәр ачлгдв.

Тавн җил хооран мана таңһчд регионар залдг Төв (ЦУР) секгдв. Әрәсән Президент Владимир Путинә седвәрәр ЦУР-ин әңгүд цуг орн-нутгт секгдсн болдг. Иргнмүдлә өөрхн залһлда бәрхин болн эднә төрмүдт ахр цагин болзгт орлцхин төлә эн Төв бүрдәгдв гиҗ келх кергтә.

Өцклдүр Элстд селәнә эдл-ахун көдләчнрин байрин хург болв. Хальмг Таңһчин залврин Ахлачин негдгч дарук Шуурһчин Очр, селәнә эдл-ахун министр Гаван Тимур, райодын толһачнр болн АПК-н делгрлтин әңгүдин һардачнр, ирлцңгү бүрдәцсин мергҗлтнр, ветеранмуд болн селәнә эдл-ахун көдләчнр керг-үүлдврт орлцв.
Байрин хургиг Хальмг Таңһчин селәнә эдл-ахун министр Гаван Тимур секв. Тимур Сергеевич эн җилин АПК-н көдләчнрин күцәмҗин тускар тодрхаһар келҗ олнд соңсхв. Эн җил мана таңһчд дәкнәс буудян элвг урһц хурагдв, эннь 851 миңһн тонн тогтав. Терүнәс нань таңһчин эдл-ахуст ут тоодан 190 миңһн туһл, 1,2 сай хурһн авгдв. Һарчах җилин йовудт таңһчин селәнә эдл-ахун министерствин орлцлһтаһар селән һазрт сән кец-таал тогталһна халхар кесг төсвс болн көтлврмүд күцәгдв. Таңһчин райодт бичкдүдин талвңгуд, амрлһна паркс тосхгдв. Терүнәс нань селәнә эдл-ахун халхд йилһгдсн шаңһа дөңгин тускар бас келгдв. Эн җил таңһчин АПК-н халхд ут тоодан 803 сай арслң йилһгдсн болв. Тер тоод мал өсклһнд 498 сай арслң, урһмл урһалһнд болн мелиорацин халхд 117 сай арслң йилһгдсмн. Шаңһа көтлврмүдт 52 күн орлцҗана, кредитин мөңгнә кемҗән болхла 395 сай арслң тогтав, – гиҗ Тимур Сергеевич цәәлһҗ келв.

Хальмг Таңһчин Улсин Хуралын (Парламентин) Ахлач Артем Михайлов болн депутат Җаңһан Чимид Ростовск мүҗин Усть-Донецк района Раздорская күүтрт Советин Союзин Баатр Делгә Эрднин 103 җилд нерәдгдсн санлын керг-үүлдврт орлцв. Төрскән харсгч Алдр дәәнд әмнәсн хаһцсн улсин санлын бумблвин өөр эклсн хургт бәәрн улс цуглрад, залу-зөрмг кевәр дәәлдҗ йовсн баатрмудыг тодлад, тагчг зогсв. Хургт орлцачнр Делгә Эрднин бумбд цецгүд тәвв. Артем Михайлов Хальмг Таңһчин Толһач Хаска Батун илгәсн Бичг олнд соңсхч умшв.

Шидр Түмнә мүҗд «Бичкн Төрскн – Әрәсән күчн» Цугәрәсән муниципальн хургин региона Өдрмүд болв. Әрәсән бәәрн залврин делгрлтин негдлтин (ВАРМСУ) седвәрәр болсн керг-үүлдврт орн-нутгин регионмудас ут тоодан 350 күн орлцв. Ик хургт муниципальн бүрдәцсин, орн-нутгин болн регионмудын йосна бүрдәцсин, парламентсин, олна ниицәсин элчнр цуглрв. Хальмг Таңһчас «Хальмг Таңһчин муниципальн бүрдәцсин хүүв» гидг негдлтин ахлач, Октябрьск района муниципальн бүрдәцин толһач Увшан Басң терүнд орлцв.

Хальмг Таңһч болн Луганск Улсин Республикин Антрацитовск район хоорнд нөкцлтин бооцан батлгдснас авн таңһчин эмнлһнә көдләчнр тиигәрән одад, бәәрн улст дөңгән күргнә. Таңһчин эмнлһнә эмчнрин баг Антрацитовск районд бәәдг 100 һар күүнә эрүл-менд шинҗләд, сүв-селвгән өгнә.

П.Жемчуевин нертә таңһчин эмнлһнә физиотерапевтическ әңгд өдгә цага кергсл углҗ тәвгдв. «Salus-Talent», «BTL-6000» болн «Piezo Wave» гидг сән һара кергслмүд олн зүсн гем учрсн кемд эмнлһнд туслна. Иим кергсл урднь энд уга бәәсмн, тегәд ода гемтә улст өөдән чинртә туслмҗ күргҗ, дарунь эдгхд туслх гиҗ әңгин эрүл-менд харлһна көдләчнр темдглнә.