Үкр сарин эклцәр Геленджик балһснд Әрәсән нүднә харань муурсн улсин ниицәнә (ВОС) нүүрләчнрин ик хург болв. Краснодарск крайин региональн әңгин седвәрәр бүрдәгдсн керг-үүлдвр президентск мөрән саңгин дөңгәр давулгдв. Терүнд Әрәсән Өмн үзгин болн Ар Кавказин федеральн округудын 19 региональн бүрдәцин 80 һар элч цуглрв. Хальмг Таңһчас ВОС-ин региональн әңгин ахлач Эрнцнә Людмила болн энүнә нөкд Оруса Лидия орлцв.

Хальмг ик сурһулин дацңгудт өөнин кесг керг-үүлдвр болв. Одахн залврин болн зөвин дацңгин төгсәсн улс багшнрла харһҗ оютнрин цаган тодлв. Ода дацңгин бакалавриатд, магистратурт болн аспирантурт кесг оютнр сурна, тер тоод холас сурдг әңг бәәнә. Багшнр эврә мергҗлтән докторантурт өөдлүлнә.

Өдгә цагт мана таңһчд олн үртә өрк-бүлмүдин то өсәд йовна. Тиим бүлмүдт өссн көвүд-күүкд нег-негән хәләҗ, дөңнҗ, хоорндан ниитәһәр бәәдг. Кезәнәс авн мана аавнр-ээҗнр арвн болн энүнәс үлү үр һарһад өскдг билә. Эндр болхла өвкнрин үлгүрәр баахн эк-эцкнр бас олн үртә болхар седҗәхнь бахмҗта.

Москвад үкр сарин 5-д Кремльд Әрәсән Президент Владимир Путин келн-улс хоорндк хәрлцәнә төрәр үүлдҗәдг Хүүвин гешүдлә харһв. Эн харһлтын йовудт «Межэтническ журналистикин Гильдин» президент Маргарита Лянге орн-нутгин Толһачд «Звук Евразии» гидг нертә винилов альбом бәрүлҗ өгв.

Улсин негдлтин өдрлә соньн нег керг-үүлдвр эклв. Мөр унҗ хаалһд һарч йовх седвәриг Дагестанд татсмн.

Сочи балһснд үкр сарин 10-д дарани нарт-делкән кинонаадм көдлмшән эклв. В. Меньшовин нер зүүҗәдг эн наадм 20-ч кемдән кегдҗәнә.

Хальмгт җил болһн сарин литәр хулһн сарин 22-т бурхн-шаҗна сән өдр темдглгднә. Бурхн Багшин гегән 33 бурхна таралңгин орнас бууҗ ирсн өдр олнд йир евәлтә болна.

Хальмг Таңһчин Толһач Хаска Бату канализацин цеврллһнә сурвлҗна тосхлтын йовудыг бүрткв. Эн чинртә төсв күцәгдәд, таңһчд коммунальн халхар экологин әәмшг уга бәәдл тогтагдхнь лавта.

Таңһчин Толһач Хаска Бату Хальмгин арбитражн зарһин ахлач Николай Мисникла харһв. Өдгә цагт зака үүдәгч, күцәгч, тер мет зарһин йосна көдләчнр таңһчин делгрлтд тәвцән орулҗана.

Шидр хальмг улсин шүлгч, бичәч, седкүлч, орчулач, драматург, Хальмг АССР-ин сойлын ачта көдләч, Советин Союзин Баатр Делгә Эрднин нертә Хальмгин комсомолын болн «Улан Зала» мөрәсин лауреат, Хальмг Таңһчин частрин түүрвәч Шугран Вера ончта өөнән темдглв.