Өдр болһн таңһчин барин һарцст болн ниигмин сүлҗәнд мек-тах һарһдг улс әмтиг мекләд мөңгинь эзләд авна гисн зәңг һарна. Өдр ирвәс телефоһар меклгдсн улсин то өсәд йовна. Эн туст МВД-н көдләчнр зәңгллһнә эв-арһсар дамҗад саг бәәтн гиҗ мана умшачнрт кедү дәкҗ бичсн болх гинәт. Тер бийнь меклгдсн улсин то баһрҗахш.

Цагин гүүдл күүнә җирһлд олн сольвр орулна. Цаг болн әмтн тууҗин йовудт ямаран бәәсинь, ямаран хаалһ кесинь, кедү шин тоот үүдәсинь, байран яһҗ кедг бәәснь тууль-түүкст, бичәчнрин зокъялмудт тодлгдсн деерән зурачнрин үүдәврмүдт орҗ, тууҗин болн цагин темдг болҗ үлднә. Ут дууна хаалһд нүүдл улсин җирһл ямаран болсинь зурач Бембин Григорийин зургудас медҗ болхмн.

Цугәрәсән марһана ашар Хальмг Таңһчин хойр балһснд сән кец-таал тогтагдхмн. «Балһсдын болн тууҗлгч селәдин делгрлт» нертә 2025 җилин марһанд орлцхар орн-нутгин регионмудас ут тоодан 424 эрлһн орҗ ирв. Мана таңһчас Городовиковск, Лагань болн Элст балһсдас һурвн төсв эрлһән орулсн болдг. Шидр марһана ашар мана хойр төсв дииләчнрин тоод орв гисн байрта зәңг ирв.

Шидр Хальмгин селәнә эдл-ахун министр Гаван Тимур таңһчин Толһачин селвгч Анатолий Козачкола хамдан «Сән махн» ООО-д одад, тенд күцәҗәдг көдлмшлә таньлдв.

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, эн җил 105 өрк-бүл дунд шишлң сурһуль-эрдмин бүрдәцд мөңгән өгәд сурһуль сурчах үрндән һарһсн һаруг даңцав. Эн кергт таңһчин хазнас 2,5 сай арслң һарһгдв.

«Энтн мана өрк-бүлин авъяс» гидг марһанд орлцачнрт дарани даалһвр өггдв. «Әрәсә – эв-арһсин орн-нутг» гидг президентск төсвин хүүвин гешүд Әрәсән нертә артистнр Игорь Бутман болн Дмитрий Маликов марһанд орлцачнрт көгҗмин хойр даалһвр өгв. Даалһвриг күцәмҗтәһәр күцәһәд, хамгин ик балл хоршасн өрк-бүлмүд марһана полуфиналд һархмн.

Бурхн Багшин Алтн сүмд сурһульчнрт болн оютнрт нерәдсн мөргүлмүд кегдҗәнә. Ноха сарин чилгчәр сурһулин шин җил эклхин өмн медрл дасч авлһнд харшлт бичә харһтха, сурһулин җил сәәнәр күцәмҗтәһәр давтха гисн мөргүлмүд келһн сән авъяст тохрсмн.

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн!» гидг керг-үүлдврин һурвдгч девсң эн долан хонгт Яшкулин, Хар Һазра болн Баһ Дөрвдә райодт болв. Эмчнр эн райодын селәдин әмтнә эрүл-мендин бәәдл шинҗлҗ, хамгин түрүнд медәтнрт, цергә шишлң керг-үүлдврт орлцачнрт болн теднә өрк-бүлмүдин гешүдт, гемтә-шалтгта улст эдн оньган тусхаҗана. Тер мет эдн зәрм улст гертнь одад, дор ормднь дөңгән күргв.

Ода вузмудт 2025 җилин абитуриентнриг орулҗ авлһна керг-үүлдвр төгсҗ йовна. Эднәс ик зунь ямаран ик сурһульд орхан йилһәд авчкла, тиим болв чигн ноха сарин 29 күртл вузан сольх талдан шиидвр батлх арһ өггдҗәнә. Тиим кевәр абитуриентнрин зөв өргҗүлгдҗәнә, болв һоллгчдан цуг баһчудыг бюджетин болн бооцана (мөңгән өгәд) әңгд орулҗ авлһн төгсв, тер тоод Хальмг ик сурһульд тиим керг-үүлдвр күцәгдсн бәәнә. Таңһчин кесг райодын арвтнр хальмг вузиг шүүҗ авла. Тер тоод Хар Һазра района Комсомольский селәнә гимназин сурһульчнр бас йовна.

Одахн Москвад Әрәсән залврин Ахлачин дарук Дмитрий Чернышенко болн гегән-герлин министр Сергей Кравцов РФ-н субъектсин министрмүдлә селвлцә кев. Түүнд Хальмг Таңһчин сурһуль-эрдмин болн номин министрин үүл дааҗадг Александр Ким орлцв. Энд 2024/2025 сурһулин җилин ашнь диглгдв болн 2025/2026 сурһулин җилд күцәх һоллгч төрмүд йилһгдв. Төрскән харсачин җилин кесг седвәриг болн керг-үүлдвриг күцәлһнд шунлттаһар орлцснднь Дмитрий Чернышенко багшнрт ханлтан өргв. Тер мет Төрскән харсгч Алдр дәәнә ветеранмудын болн СВО-д орлцачнрин ик ач-тусинь заав.