Лу сарин 15-д мана орн-нутгт, тер тоод мана таңһчд бас санлын керг-үүлдвр болв. Мел эн өдрлә 36 җил хооран Афганистан Республикд цергә үүлән күцәсн Советин Союзин салдсмуд хәрҗ ирсмн. Тер дәәнд орн-нутгин, нег үлү нег һазра мана баахн көвүд орлцад, кесгнь баатр кевәр әмнәсн хаһцсн билә. Ахнран, дүүнрән, үрдән геесн улс тер цагин өвдкүриг эндр күртл мартад уга. Тер дәәнд нег һазра 493 күн орлцв. Советин Союзин Баатр Очра Валерий, таңһчд Улан Тугин орденә ор һанцхн ачлгдсн Доран Игорь, Улан Одна хойр орденә кавалер Владимир Свириденко, Улан Одна орденә кавалермүд Геннадий Берестнев, Николай Ковалев, Очра Анатолий, Бутан Тавн, Артем Рубашанов, дәәнә һалд орад әмнәсн хаһцсн Баран Эдуард, Игорь Плотников, Бадан Юрий, Иван Слизский, Саид-Магомед Ахматханов болн талдан улс Хальмг Таңһчин тууҗд орв.

Шидр Хальмг Таңһчин делегац Луганск Улсин Республикин Антрацит балһснд одад ирв. Таңһчин Толһач Хаска Батун даалһврар цергә шишлң керг-үүлдврт орлцачнрт хот-хол, дулан хувц, өөрхн элгн-саднаснь бичгүд илгәгдв.

Шидр «Дари добро» гидг буйнч седклин саңгин ахлач Эльза Шамова шалтгта бичкдүдт спортивн хувц-хунр белглв. Эн күүкд-көвүд таңһчин адаптивн-спортивн сурһульд үүлддг секцд усчдг спортар соньмсад, таңһчин болн Әрәсән марһаст орлцҗ сән күцәмҗ бәрнә. Хальмг Таңһчин нер харсдг бичкдүдин баг ода әдл хувцта болв.

Өдгә цагт дорас өсч йовдг баһчудт төрскнч сурһмҗ өглһнд онц оньг өггдҗәнә. Тер мет бичкдүдин садмудас экләд, көвүд-күүкдт өвкнрин тууҗин, сойлын, авг-бәрцин тускар олн зүсн керг-үүлдврмүдин йовудт келҗ өггднә. Дунд сурһульмудт болхла арвтнрин төлә бас ирлцңгү кергүд давулгдна.

Дорас өсч йовдг баһчуд төрскн һазр-уснаннь тууҗ, авъяс, сойл медҗ, өвкнриннь залу-зөрмгәр бахмҗ кехин төлә эднд бичкнәснь авн чик сурһмҗ өгх кергтә. Эн җил мана орн-нутгт Төрскән харсачин җил болҗана, тегәд эн чинртә төрт һол оньг өггдҗәнә. Шидр болсн Хальмг Таңһчин залврин сүүрт болсн күүндврт баһчудт төрскнч сурһмҗ өглһнә, дәәнә цагт залу-зөрмгән үзүлсн нег һазра улсин нерд мөңкрүллһнә тускар онц келгдв.

Үстин района Цаһан Амн селәнә бәәрн әмтн Айвар болн Наталья Мурзагалиевихниг сәәнәр меднә. Эдн 2023 җилд района әмтнә социальн харслтын әңглә бооца батлад, шаңһас авсн мөңгәр эврә керг бүрдәҗ үүлдҗәнә. Олн зүсн хот-хол кеҗ, һал деер мах, темс шарҗ эдн әмтнә сурврар гертнь дарунь күргҗ өгнә. Социальн бооцана көтлвр олн үртә өрк-бүлд эврә керг бүрдәҗ олз-оруһан икдүлхд туслснь эднд урмдта болв.

Лу сарин 10-д Элстин олн салврта гимназьд таңһчин МВД-н ветеран, Чеченск Республикд болсн цергә керг-үүлдврт орлцҗасн зөргтә дәәч Наатра Җаңһрла харһлт болв. «Мана күндтә гиич Җаңһр Михайлович «Цергллтән йилһән сәәнәр күцәснә төлә» гидг медалин 1, 2 и 3 девсңгәр, тер мет «Төрскндән ач-тусан күргснә төлә», «Залу-зөргин төлә» болн «Олна диг-дара йилһән сәәнәр харҗасна төлә» гидг медальмүдәр ачлгдла, тернь маднд ик байр-бахмҗ үүдәв.

А. Амр-Санана нертә Келн-улсин дегтрин саңд Алдр Диилврин 80 җилин өөнд нерәдәд дәәнә цага газетмүдиг өдгә цагин эв-арһар батлад, олн умшачнрт туста керг күцәв.

Тууҗин зөөрин төрәр үүлддг комиссин дарани сүүр шидр Элстд болв. «Родина» сойлын төвд тәвгдх тосхачин бумблвин тускар түрүн төр хәләгдв. Орҗ ирсн кесг сүв-селвгиг тоод авч, тер бумблв өдгә цагла ирлцәтә болх зөвтәнь заагдв.

Н. Пальмовин нертә Келн-улсин музейд җилин туршарт олн һәәхүлмүд болна. Белгородск художественн музей «Победа – одна на всех!» гидг нертә һәәхүлән Элстд авч ирв. Төрскән харсгч Алдр дәәнд бәрсн Диилврин 80 җилин өөнд тернь нерәдгдҗәнә.