Хальмг Таңһчин залврин Ахлачин дарук Өлзәтин Марина таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян хойр Элстин социальн теткврин Герт одв. Дааврта һардачнр социальн бүрдәцин һардач Авән Анжелад шин көлгнә түлкүр бәрүлҗ өгв. Терүг «Автоваз» бүрдәц Хальмг Таңһчин Толһач Хаска Батун нилчәр йилһҗ өгсмн.

Хальмг ик сурһулин улд болсн нарт -делкән хургт Көк теңгсин көвән регионмудын тогтурта бәәдлиг цааранднь хадһлхин тускар харһлтд орлцачнр тоолврарн хувалцв.

Намрар театрмудт шин кем эклнә. Басңга Баатрин нертә Келн-улсин театр шин наадд үзүлхмн. 2026 җил театрин үүлдврт йир ончта болҗана, эн 90-ч кемдән көшгән секв. «Мини Арслң» гидг наадар эклснь темдгтә болв. Лев Гумилевин «Җамуха нойна үкл» үүдәврәр эн наадыг якутск режиссер Андрей Борисов белдв.
Нер туурсн номт Лев Гумилев бийән Арслң гиҗ дууддг бәәҗ. Тернь учрта. Түүрвәчин җирһлд учрсн дурн һашута йовдлд хүврв. Дуту хөвтә дурнь номтын җирһлд мартгдшго мөрән үлдәҗ. Тиигәд эн нааднд олн тоот ниилҗ, гүн ухата Җамухан болн Темүҗинә хоорнд учрсн тоотыг медүлхәр режиссер зүтксмн.
Алдр Чиңһс хаана цагин зәрм халхинь үзүлҗәдг наадн олн улсиг соньмсулв. Театрт эн асхн олн күн цуглрҗ ирв. Таңһчин сойлын болн зуульчллһна министр Бембин Евгений, театрин болн сойлын нертә үүлдәчнр, номтнр, олн улс тәәз деер болҗасн тоотыг оньган өгч хәләв.

Шидр Әрәсән кикбоксингин баг Колумбия орн-нутгт болсн WKF нарт-делкән марһанд орлцад, тенд 96 медаляр ачлгдад ирв, терүнәснь 66-нь алтн медаль болв. Хальмг Таңһчин Толһач Хаска Бату орн-нутгин нер харсад, ик күцәмҗ бәрсн спортсменмүдиг йөрәв. Эн марһанд диилвр бәрсн спортсменмүдиг күндлҗ Әрәсән туг өргв, частр күңкнв.

Шидр Элст балһснд таңһчд зуульчллһ делгрүллһнә төрәр хург болв. Таңһчин күцәгч йосна, райодын муниципальн бүрдәцсин элчнр болн арһлачнр хамдан цуглрад, 2036 җил күртл зуульчллһ делгрүллһнә төрәр күүндв. Эдн хальмг улсин сойлын, авъясин, нүүдл авг-бәрцин, бурхн-шаҗна, теегин өврмҗтә йиртмҗин халхар зуульчнриг соньмсулх төсвс белдв.

Элстд эргндк йиртмҗин шинҗләчнрин нарт-делкән хург болв. Көк теңгсин көвән 5 орн-нутгин болн Әрәсән регионмудын ик сурһульмудын болн номин бүрдәцсин номтнр терүнд орлцв. Көк теңгсин көвән аһу ик региона тогтурта делгрлтин болн усн баһрҗадг таалыг ууруллһна тускар энд тодрха күүндвр болв.
Хальмг Таңһчин Улсин Хуралын (Парламентин) Ахлач Артем Михайлов, Хальмг Таңһчин залврин Ахлач Босхмҗин Гилән болн Әрәсән Президентин күцц зөвтә элчллтин ах инспектор Александр Беляев нарт-декән керг-үүлдврт орлцачнриг йөрәв. Эргндк бәәдлин эркн чинртә төрмүд хаһлхин төлә Көк теңгсин көвән орн-нутгудын номтнр хамцу үүлдвр күцәҗ, терүг өргҗүләд бәәхлә шинҗллтс туста болх гиҗ темдглгдв.

Хулһн сарин 21-әс авн 23 күртл Ростовин мүҗин Вешенка күүтрт нертә орс бичәч Михаил Шолоховин төрскн һазрт хазгудын сурһуль-эрдмин бүрдәцсин багшнрин наадм-марһан болв. «Казачья доблесть, дух и слава!» гидг керг-үүлдврт Әрәсән регионмудын 100 һар багш орлцв.

Маңһдур, хулһн сарин 30-д, Элстд таңһчин арһлачнрин төлә «Следующий ход» гидг керг-үүлдвр болхмн. «Деловая Россия» болн «Опора России» Әрәсән олна бүрдәцсин таңһчд үүлддг әңгүд Сбербанкла хамдан эн хургиг бүрдәҗәнә. Шидр Хальмг Таңһчд арһлачнрин зөв харсдг элч Эрднь-Һәрән Оксана, Сбербанкин Хальмг әңгин һардачин дарук Дмитрий Юзиков, «Опора России» олна бүрдәцин таңһчд үүлддг әңгин ахлач Наталья Зинченко болн «Деловая Россия» бүрдәцин әңгин ахлач Кекешкән Марина седкүлчнрт эн керг-үүлдврин тускар келҗ өгв.

Олн үртә, өвкнриннь авъяс хадһлдг, ниитә, седвәртә болн олна бәәдл-җирһлд шунмһаһар орлцдг өрк-бүлмүд орн-нутгин бат ул мөн гиҗ Әрәсән Президент Владимир Путин темдглҗ, өнр-өсклң бүлмүдин то өсх зөвтә гиҗ келнә. Сүл җилмүдт орн-нутгин һардвр нилхд төрлһиг урмдулҗ, олн үртә өрк-бүлмүдиг дөңн¬лһнә керг-үүлдврмүд батлҗана.

Одахн Элстин Т.Симин нертә 21-ч тойгта дунд сурһульд эклц классмудын сурһульчнриг олна керг-үүлдврт яһҗ орлцулхин, теднд чик сурһмҗ өгхин тускар багшнр селвлцв. Сурһуль-эрдмин мергҗлтнр энд одахн болсн таңһчин хургин йовудт «Орленок –эрудит» болн «Орленок-лидер» көтлврмүдиг яһҗ олзлхин тускар дамшлтарн хувалцв.