Хәәртә багшин әрүн седкл
Эн җилин намрар Хар Һазра района 75 җилин өөн өргнәр темдглгдхиг бәәрн улс бәәтхә нам таңһчин меҗә һатц чигн бәәдг харһазрахн тесвртәһәр күләҗәдг болна. Эннь чигн учрта,юңгад гихлә дигтә эн өөнлә ирлцүлҗ района цуг селәдәр хаврин-зуни сармудт олна орлцлһтаһар байрин керг-үүлдврмүд бүрдәҗ, тоомсрта,күндтә улсан, тер дотр ачта ветеранмудан, тооҗ магтснь седкл үүмүлгч йовдл болв яһв... Ашлгч байрин нәәрән болхла, харһазрахн нам хотл балһснд давулхар зуралҗадг болна. Тегәд иим ончта керг-үүлдврлә ирлцҗ,эврә цагтан эн района делгрлтд ик ач-тусан күргҗ йовсн улсан бүләнәр тодлҗ, ханлтан өргдг сән авъяс бәәдг биший. Минь иим улсин негнь насни турштан төв селәнә дунд сурһульд хальмг келнә болн утх-зокъялын багшар көдлҗ йовсн Боктан Манҗин Александра (зургт) болна.
Тууврин цагт күүнә һазрт хоолцаһан зовлң үзсн хальмгуд төрскн һазртан нүүҗ ирҗәсн кемд тиигхд баахн багш эднә күүкдт гүн медрл заасн деерән эк- эцкнриннь төлә чигн сурһмҗлгч болад,чидлән нөөлго көдлснь эндр күртл мартгдҗахш. Эврә келндән хару, келн-улсин тууҗин-сойлын халхар ик медрлтә багш эврә сурһульчнртан төрскнч сурһмҗ өгснлә зерглҗ хальмг үгин гүн учр-утхинь цәәлһҗ, кичәлмүдән үүдәгч кевәр давулдг бәәҗ.

Зуни амрлһна хөөн хальмг театрмуд көдлмшән эклв. Басңга Баатрин нертә Келн-улсин театр йирн җилә өөнән темдглхмн. Өөнин җилд олн хәләһәчнртән шин наадд үзүлхәр театрин коллектив белдҗәнә. Эн селгәнд үзүлгдх нег наадыг нертә режиссер Андрей Борисов белдҗәнә.

Хальмг Таңһчин сойлын болн зуульчллһна министр Бембин Евгений «Өөрднр» бииһин театрин художественн һардач, Хальмгин Баатр Нәдвдә Петрла харһҗ күүндв. Хальмгин бииһин театрин иргчин туск тохнята күүндвр болв.
Хальмгин сойлын ачта үүлдәчлә болсн күүндврт өвкнрин сойлын зөөриг хадһллһна болн делгрүллһнә төрәр эдн ухан-тоолврарн хувалцв. Сойлын таалыг цагин йовудла ирлцүлҗ делгрүллһнә төрт оньган тусхав.

Бембә өдрлә таңһчин Толһач Хаска Бату медәтә болн эрмдгтә улс бәәдг Элстин Гер-интернатд 200 күн багтамҗта шин немр бәәрин тосхлтын йовудыг шинҗлв.

Шидр Хальмгин Толһач Хаска Батун һардврт таңһчд күцәгдҗәдг тосхлтын йовудын тускар селвлцән болв.

Зуни амрлһн төгсәд, кесг миңһн күүкн-көвүн лагерьмүдт сергмҗтәһәр амрад,сурһулин шин җилд белдв. Негдгч класст орҗадг бичкдүдин болн эднә эк-эцкнрин төлә ик чинртә өдр болҗана. 2026-2027 сурһулин җилд 3000 шаху сурһульч медрлин хаалһдан орхмн.

Ноха сарин 27-28-д Москвад «Хамдан Диилвр делдхмн» нертә ик хург болв. Цергә шишлң керг-үүлдврин ветеранмуд, теднә өрк-бүлмүдин гешүд, Әрәсән Президентин һардврин, орн-нутгин Залврин, Федеральн Хүүвин, шаҗна элчнр, цергә седкүлчнр, шинҗләчнр болн арһлачнр терүнд орлцв. Ут тоодан ик хург хойр миңһн һар орлцачиг негдүлв. «Төрскән харсачнр» шаңһа саң, «Медрл» ниицән болн Москва балһсна Залвр эн хургин бүрдәһәчнр болв.
Әрәсән Президент Владимир Путин керг-үүлдвриг нүр үгәр секв.

Әмтнә социальн теткврин төвмүдт медәтнрин төлә соньн улсла харһлтс давулгдна. Шидр Яшалтан района КЦСОН-а көдләчнр ах үйин улсин төлә хальмг улсин зурач, Әрәсән зурачнрин ниицәнә таңһчд үүлддг әңгин ахлач, «Улан зала» гидг Келн-улсин мөрәһәр ачлгдсн нертә урч Дорҗин Викторла харһлт бүрдәв.

Хальмг Таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян медәтнрин болн гемтә-шалтгта улсин гер-интернатд шин бәәрин тосхлтын йовудыг бүрткв. Эн бәәрн «Өрк-бүл» гидг келн-улсин төсвин йовудт тосхгдҗана. Энд хоорндан залһлсн дөрвн гер тосхгдхмн, тенд эмнлһнә болн реабилитацин 80 ормта болн 120 күн бәәдг әңгүд үүлдхмн. Медәтнрин болн эрмдгтә улсин төлә өдгә цага сән таал тогтагдсн деерән энд цогц-махмудан батрулсн деерән олн зүсн нәр-наад давулдг, фильмс хәләдг хорас секгдхмн.

Сурһулин шин җил угтад, мана таңһчд «Бичкдүдиг сурһульд белдхд нөкд болтн» гидг буйнч седклин керг-үүлдвр давҗана. Җирһлин күнд таалд туссн өрк-бүлмүдт дөң-нөкд болад, бичкдүдиг хувц-хунрар, сурһульднь кергтә эд-таврар теткҗәнә.