Хальмг Таңһчин Толһач Хаска Бату Ростехнадзорин Нижне-Волжск заллтын һардач Юрий Кулиничевла харһв.

Урҗ өдр Хальмг Таңһчин Улсин Хуралын (Парламентин) дарани сессь болв. Әрәсән Президентин ЮФО-д күцц зөвтә элчлтин Хальмг Таңһчд федеральн ах инспектор Александр Беляев, таңһчин залврин Ахлач Босхмҗин Гилән, таңһчин Улсин Хуралд Хальмг Таңһчин Толһачин элч Манҗин Араш, зөв-йос харлһна, зарһин болн бүртклһнә бүрдәцсин элчнр терүнд орлцв. Хальмг Таңһчин Улсин Хуралын Ахлач Артем Михайлов сүүриг һардҗ давулв. Эн сүүрт ут тоодан 12 төр хәләгдв.

Целинн района Троицкое селәнә «Алтн түлкүр» бичкдүдин садын ах сурһмҗлач, селәнә депутатнрин Хургин депутат Тактинә Алла «Цергллһн» гидг Цугәрәсән марһана ашлгч девсңд һарв. Келхд, Хальмг Таңһчин элч түрүн болҗ сән гисн 110 мергҗлтин тоод орв. Эн марһан мана орн-нутгин муниципальн цергллтин йилһән сән мергҗлтнриг йилһҗ авч дөңнхин төлә бүрдәҗ давулгдна. Шидр бидн Алла Владимировнала харһад күүндвидн.

Элст балһснд сән таал тогталһна көдлмш цаарандан давҗана. Шидр «Гер-бүүр» болн «Бәәдл-җирһлин кец-таал» шаңһа болн келн-улсин төсвс күцәлһнә йовудт Ленинә нертә уульнцд 333 «а» тойгта герин эргндк һазртнь сән таал тогтагдв. Тер мет Элстд олн патьрта дөрвн гер тосхгдв, 490,5 дууна һазрт усна сурвлҗн татгдв. Йовһар йовдг болн гермүдин хашад бәәдг, ут тоодан 4,2 миңһн дөрвлҗн метр хаалһс бас ясгдв.

Моһа сарин 28-д Элстд «Хрустальные звездочки» нертә Цугәрәсән марһана региона девсңгин ашнь диглгдв. Марһанд таңһчин зарһин приставмудын болн зөв-йос харлһна бүрдәцсин көдләчнрин үрд орлцв. Эн җилин марһанд орлцхар 40 эрлһн орҗ ирв. Марһан 7-ас авн 12 күртл, 13-ас авн 18 күртл, дууна, бииһин болн көгҗмин зевсгүд цокдг һурвн әңгәр хувагдв.

Одахн полицин көдләчнр Приютна районд бүрдәгдсн хәәврин керг-үүлдврин йовудт хөрн дөрвтә бәәрн күүнә геринь некҗәд ноха бәрдг бәәрнд наркотикин зүүтә урһмл олҗ авв. Ирлцңгү керг-үүлдвр давулсна ашт эннь 329,5 грамм каннабис болҗ һарв.

Хальмг Таңһчин Толһач Хаска Батун седвәрәр бүрдәгдсн «Эрүл-менд бәәтн!» гидг керг-үүлдврин дөрвдгч девсң төгсв. Эн сарин эклцәс авн эмчнр таңһчин хол селәдт одад, бәәрн әмтнә эрүл-мендин бәәдл шинҗлв. Шидр эмчнр Целинн района Овата селәнд одв.

Шидр Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан һардврт хальдврта гемәс саглуллһна комиссин дарани сүүр болв. Терүнд бруцеллез болн безг гемәс хөрлһнә туст тәрлһ келһнә төрмүд хәләгдв.

Җил болһн Хальмг Таңһчин йилһән сән багшиг йилһдг марһан болна. Ода орн-нутгин болн таңһчин һардвр багшнрт һол оньган тусхаҗ, эднә чинринь өөдүлҗ йовна. Ода орн-нутгт медрлтә, билгтә, кергән сәәнәр меддг, өдгә цага некврлә ирлцҗ үүлддг мергҗлтнр кергтә болҗана. Тиим билгтә баһчудыг багшнр сурһҗ, чик сурһмҗ, гүн медрл өгч белднә.

Давсн үлмҗ өдрлә Элстд, Хальмг ик сурһулин ик талвңд уулын улсин хаврин болн шинрлтин Навруз нәр-нааднд нерәдгдсн керг-үүлдвр болв. Хальмг ик сурһульд сурчадг Туркменистана, Киргизин, Узбекистана болн нань чигн орн-нутгудын оютнр энд цуглрҗ олн-әмтиг эврәннь келн-улсин ик байрла йөрәв.