«Келн-улсин бахмҗ – 2026» гидг марһанд Хальмг Таңһчин әмтн орлцҗ чадҗана. Цугәрәсән олна мөрән VII марһанд орлцх улсин нердиг зааҗ болхмн. Әрәсән келн-улсин негдлт батллһнд болн этносойлын делгрлтд ач-тусан күргҗәдг улсин нердиг тер марһанд орулх арһ бәәнә.
«Келн-улсин бахмҗ - 2026» гидг мөрә олна үүлдврт, келн-улсин хоорндк хәрлцә делгрүллһнд орлцдг эврә сән дурар кедг олна көдлмш күцәҗәдг седвәртә үүлдәчнриг темдглх күслтәһәр үүдәгдсн болна.

Н. Пальмовин нертә Келн-улсин музейд соньн һәәхүл секгдв. Белорус келн-улсин хувцнла энд таньлдҗ болхмн. Давсн җилд музейин һардач Мучан Ирина Беларусьт одад, тенд Келн-улсин тууҗин музейин һардврла харһад, нөкцҗ үүлдлһнә туск бооца батлсмн. Ода терүнәс иштә белорусь улсин эн һәәхүл Элстд үзүлгдҗәдг болв.

Цуг Әрәсәһәр «Гризодубовск умшлһн» гидг нертә керг-үүлдврмүд болҗана. Хальмг Таңһч бас эн керг-үүлдврт орлцҗана. Әрәсән күүкд улсин ниицән эн керг-үүлдвриг 2026 җилд эклсмн. Советск күүкд улсин антифашистк комитетин 85 җилин өөнд болн нер туурсн Валентина Гризодубован санлд эн төсв нерәдгдҗәнә. Төрскән харсгч Алдр дәәнә җилмүдт залу-зөрмгәр үүлдсн күүкд улсин туск санл мөңкрүлх күслтәһәр эн умшлһн кегдҗәнә.

Хальмг келн-улсин хәәртә Үрс Сар эклв. Өвкнрин оюни зөөр болҗ, цагин холыг һатлҗ ирсн байриг өдгә цагт хальмгуд ик өргмҗтәһәр темдглнә. Хөн сарин 17-д Бурхн Багшин Алтн сүмин өмн олн-әмтнә седклиг байрар дүүргсн сәәхн керг-үүлдвр болв.

Корей Улсин Демократическ Республикд болсн «Мөрн сарин хавр» гидг нертә иньгллтин байрт Хальмг Таңһчин «Бамб цецг» дууна болн бииһин ансамбль орлцҗ, билг-эрдмән үзүлв.

Урҗ өдр Элстин Диилврин талвңд дәкнәс олн-әмтн цуглрв. Һурвн хонгтан Энткгин сойлын Өдрмүд давад, ашлгч байрин керг-үүлдвр болв. Хөн сарин 10-ас авн 12 күртл нег һазра мана улс Энткгин сойлла, тууҗла, авг-бәрцлә өөрхнәр таньлдад, тер һазра кино хәләһәд, хотынь амсад, цаган сергмҗтәһәр давулв.
Энткгин Одиша, Гуджарат болн Пенджаб һурвн штатын сойлын коллективс эврә билг-эрдмән олнд тусхасн болдг.
Керг-үүлдвриг Хальмг Таңһчин сойлын болн зуульчллһна министр Бембин Евгений секв.

Энткг орн-нутгин сойлын Өдрмүдин йовудт Энткгин фильмин наадм болв. Эн керг-үүлдврт хол орн-нутгин Джамму болн Кашмир хойр штатас ирсн артистнр болн режиссермуд орлцв. Эднд хальмг ут дун икәр таасгдв. Энткгин көгҗмлә әдлхн болв, тана эн ду мана орн-нутгин әмтнд соңсулхла сән болх гиҗ артистнр тоолвран келв. Энткгин кинон Өдрмүдт Элстин бәәрн улс «Октябрь» кинотеатрт ирҗ, соньн кесг фильм хәләв.

Энткгин сойлын Өдрмүд Хальмг Таңһчд болҗасн кемд Хальмг ик сурһульд Бурхн-Багшин ном делгрүллһнд нерәдсн харһлт болв. Энүнд Энткгин ах элч Д.Джейсундхар, Москвад Энткгин элчллтин көдләчнр, Наландан болн Делин ик сурһульмудын номтнр ирв. Керг-үүлдвриг Хальмг ик сурһулин профессор Улана Мергн һардҗ, бурхн-шаҗна туск лекциг секлһнә тускар зәңгләд, Хальмг ик сурһулин һардач Салан Бадмд үг өгв.

Хальмгт бәәтхә цуг Әрәсәд нертә номт, багш, бичәч, урн үгин үүдәврмүдин шалһач, олн дегтрмүдин болн статьясин түүрвәч Манҗин Николай шидр 75 җилә өөнән темдглв. Ончта өөнләнь йөрәхәр олн улс А. Амр- Санана нертә дегтрин саңд цуглрҗ ирв. Медәтнр, дундын наста әмтн, баһчуд дегтрин саңгин көдләчнр белдсн һәәхүллә таньлдв. Манҗин Николайин һучн һар дегтрлә, олн седкүлд һарсн статьясла ирсн улс таньлдв. Хәәвр-шинҗллт кеһәд бичсн дегтрмүдинь меддг бәәсн бийнь әмтн Манҗин Николайин олн дегтр үзҗ икәр өврв.

Мөрн сарин 21-д Манҗин Аркадин нертә Хальмг филармоньд «Духовная аристократия степи» гидг соньн нәр олна оньгт тусхагдсн билә. Энүнә тускар тодрхаһар седкүлчнрлә болсн харһлтд Хальмгин билг-эрдмин ачта үүлдәч Татьяна Милованова болн Әәдрхнә музей-заповедникин һардачин дарук, тууҗ номин доктор, буддолог-номт Андрей Курапов келҗ өгв.