Хальмг Таңһчин «Бамб цецг» ансамбль Моңһлд болсн нүүдл улсин нарт-делкән наадмд орлцв. Эн ик нәр-нааднд хальмг ансамбль хойрдад орлцҗана. Эн җилә наадмд Азин, Европин, Өмн үзгин Африкин 12 орн-нутгин коллективс ирҗ, билг-эрдмән үзүлв.

Басңга Баатрин нертә Келн-улсин драмин театр белдҗ тәвсн «Горе от ума» гидг наадн «Золотая маска» гидг Әрәсән келн-улсин театрин мөрән төлә марһана түрүн шүүвриг давҗ һарв. 2023-2024 җилин марһана йовудт «Соискатель» гидг нерәдлһ авв. Марһана шүүврин девсңгүд цааранднь давҗана. Ода шинҗллтин хүүвин гешүд наадыг хәләснә дару шүүврин йовуд йилһхмн.

Әәдрхнә Кремлин өөр А. Цебековин нертә шаңһа хор «Русалка» гидг опериг үзүлв. «Каспийские сезоны» гидг классическ билг-эрдмин наадмин кемҗәнд эн керг-үүлдвр күцәгдв.

Хальмг бииһин» «Өөрднр» театр регионмуд хоорндк үүдәгч XIII наадмд орлцв. «Русское поле» гисн нерәдлһтәһәр болсн тер наадм Әрәсән цуг балһсдар болсмн.

Н. Пальмовин нертә Келн-улсин музейд дарани һәәхүл көдлмшән эклв. Әрәсән ачта зурач Николай Шиняевин 75 җилин өөнд болн терүнә үүдәгч үүлдврин 50 җилин өөнд тер һәәхүл нерәдгдҗәнә. «Теегин туск частр» гиҗ нерәдсн һәәхүлд дүрслүллһнә эрдмин олн-зүсн янзар зургдсн 70 һар үүдәвр үзүлгдҗәнә.
Хальмг Таңһчин залврин ахлачин негдгч дарук Цернә Эрднь зурачиг өөнләнь йөрәһәд, үүдәгч үүлдвртнь күцәмҗ дурдад, «Хальмг Таңһчин күндтә иргн» гидг өөдән нер зүүлһснә туск һашгинь бәрүлҗ өгв (зургт).

Цергә шишлң керг-үүлдвр эклснәс авн мана орн-нутгин улс түрүн зергләнд әмән әрвллго йовсн салдсмудыг дөңнҗ, ирлцңгү тусан күргәд бәәнә. Буйнч седклтә әмтн, арһлачнр, эгл улс чигн нег һазра цергчнриг керглгдҗәдг тоотар даңгин теткнә. Олна кергин төлә цуһар шунмһаһар орлцҗ йовна.

Әрәсән залвр «Сойл» келн-улсин төсвин йовудт эн җил регионмудын театрмудт болн музеймүдт бат ясвр келһнд немр 1,8 җува арслң йилһхмн. Эннь сойлын бүрдәцсиг шинрүлҗ сән таал тогтаҗ, регионмудт зуульчнр олар ирхд туслхмн, гиҗ орн-нутгин залврин Ахлач Михаил Мишустинә зааврт келгдҗәнә.

Н. Пальмовин нертә Келн-улсин музейд шин экспонатмуд немгдҗәхнь йирин йовдл болна. Шидр музейин көрңд йир ховр нег белг орҗ ирв. Мөрнә эмәл таңһчин музейд белглгдв. Хальмг урн һарин эрдмчнр кесн эн эмәл Баһ Дөрвд селәнәс белг гиҗ өггдв.

Москвад ВДНХ-д көдлҗәдг Цугәрәсән ик һәәхүлд өдр болһн соньн харһлтс болна. Ик һәәхүлин кемҗәнд үүлдҗәдг Хальмгин һәәхүл шидр Романовихнә хаана герин толһач болҗадг Мария Владимировна ирҗ, энд үзүлгдҗәх тоотла таньлдв.

Басңга Баатрин нертә Келн-улсин театр дарани нарт-делкән наадмд одад ирв. «У Троицы» гиҗ нерәдгдсн театрмудын эн хәләврт Хальмг театр «Я – Будда» гидг наадан үзүлв.