Урҗ өдр Элстин Диилврин талвңд дәкнәс олн-әмтн цуглрв. Һурвн хонгтан Энткгин сойлын Өдрмүд давад, ашлгч байрин керг-үүлдвр болв. Хөн сарин 10-ас авн 12 күртл нег һазра мана улс Энткгин сойлла, тууҗла, авг-бәрцлә өөрхнәр таньлдад, тер һазра кино хәләһәд, хотынь амсад, цаган сергмҗтәһәр давулв.
Энткгин Одиша, Гуджарат болн Пенджаб һурвн штатын сойлын коллективс эврә билг-эрдмән олнд тусхасн болдг.
Керг-үүлдвриг Хальмг Таңһчин сойлын болн зуульчллһна министр Бембин Евгений секв.

Энткг орн-нутгин сойлын Өдрмүдин йовудт Энткгин фильмин наадм болв. Эн керг-үүлдврт хол орн-нутгин Джамму болн Кашмир хойр штатас ирсн артистнр болн режиссермуд орлцв. Эднд хальмг ут дун икәр таасгдв. Энткгин көгҗмлә әдлхн болв, тана эн ду мана орн-нутгин әмтнд соңсулхла сән болх гиҗ артистнр тоолвран келв. Энткгин кинон Өдрмүдт Элстин бәәрн улс «Октябрь» кинотеатрт ирҗ, соньн кесг фильм хәләв.

Энткгин сойлын Өдрмүд Хальмг Таңһчд болҗасн кемд Хальмг ик сурһульд Бурхн-Багшин ном делгрүллһнд нерәдсн харһлт болв. Энүнд Энткгин ах элч Д.Джейсундхар, Москвад Энткгин элчллтин көдләчнр, Наландан болн Делин ик сурһульмудын номтнр ирв. Керг-үүлдвриг Хальмг ик сурһулин профессор Улана Мергн һардҗ, бурхн-шаҗна туск лекциг секлһнә тускар зәңгләд, Хальмг ик сурһулин һардач Салан Бадмд үг өгв.

Хальмгт бәәтхә цуг Әрәсәд нертә номт, багш, бичәч, урн үгин үүдәврмүдин шалһач, олн дегтрмүдин болн статьясин түүрвәч Манҗин Николай шидр 75 җилә өөнән темдглв. Ончта өөнләнь йөрәхәр олн улс А. Амр- Санана нертә дегтрин саңд цуглрҗ ирв. Медәтнр, дундын наста әмтн, баһчуд дегтрин саңгин көдләчнр белдсн һәәхүллә таньлдв. Манҗин Николайин һучн һар дегтрлә, олн седкүлд һарсн статьясла ирсн улс таньлдв. Хәәвр-шинҗллт кеһәд бичсн дегтрмүдинь меддг бәәсн бийнь әмтн Манҗин Николайин олн дегтр үзҗ икәр өврв.

Мөрн сарин 21-д Манҗин Аркадин нертә Хальмг филармоньд «Духовная аристократия степи» гидг соньн нәр олна оньгт тусхагдсн билә. Энүнә тускар тодрхаһар седкүлчнрлә болсн харһлтд Хальмгин билг-эрдмин ачта үүлдәч Татьяна Милованова болн Әәдрхнә музей-заповедникин һардачин дарук, тууҗ номин доктор, буддолог-номт Андрей Курапов келҗ өгв.

Хальмг Таңһчин «Өөрднр» бииһин театр цергә шишлң керг-үүлдврт орлцҗадг дәәчнрт күрч, тер мет дәәнә госпитальмудт концертс үзүлҗ ик чинртә керг күцәҗәнә. Давсн җилд чигн эн билгтнр цергчнр эмнлһ авчадг госпитальмудт концертс бүрдәсн билә. Ода «Өөрднр» Әрәсән харслтын Министерствин медлд бәәдг Кубанск цергә сурһульд сурчадг баһчудт үзүлв.

Н. Пальмовин нертә Келн-улсин музейд шидр йир ховр нег дегтр белглгдв. Тернь Чиңһс хаана туск дегтр болв. Хар-Даван Эрнҗән бичсн дегтр «Чингис хан: как полководец и его наследие. Культурно-исторический очерк Монгольской империи» гиҗ нерәдгднә. Эн дегтр Сербийд 1929 җилд барлгдҗ һарсмн. «Всемирная история. Вече» гидг цуг делкәд темдгтә чинртә һарцсин хураңһуд Хар-Даван Эрнҗәнә эн дегтр орсинь бас ончта йовдл болв.
Музейин көрңд орҗ ирсн эн дегтр йир ховр һарц болҗана. Хар-Даван Эрнҗән һаран тәвәд, сербск үүртән белглсн дегтр ода түүрвәчин һарсн һазртнь ирв. Дегтриг Келн-улсин музейд мана һазра күүкд күн, ода Нижний Новгород балһснд көдлҗәдг Светлана Помпаева белглв.

Бамб цецгин наадм цаарандан давҗана. Мөрн сарин 18-д таңһчин нәәмн районд нәр-наадн болв.
Баһ Дөрвд селәнә төвд «Җаңһр» нертә стадионд ирлцңгү керг-үүлдвр бүрдәгдв. Сойлын кергүд спортын марһасла зерглҗ давулгдв. Сән авъяст тохрсар җил болһн армрестлингин дөрлдәнд олн-әмтн цуглрна. Терүнд Аһшин болн Ростов мүҗсин элчнр бас орлцсинь темдглх кергтә.

[b]Хавр ирәд, Хальмг Таңһчд бамб цецгин байрин цаг ирнә. Тег нарна герлд уняртад сәәхрсн цагла, бамб цецгүд теңгрүр сунҗ, тег йосндан кеернә. Зуульчнр олар ирнә. Теегин сәәхн темдгин нер зүүсн «Бамб цецг» ансамбль хоша бәәдг республикүдт күрч, билг-эрдмән үзүлнә. «Танцы над Эльбрусом» гидг ик байрт эдн орлцв.

Шидр мана таңһчд Әрәсән күүкд улсин ниицәнә әңгүдин ик хург болв. Маднла хам-хоша бәәдг регионмудас ирсн гиичнр дунд Карачаево-Черкесин делегац бас билә. «Ногай давысы» газетин ах редактор-һардач Алтынай Атуова, «Черкес хэку» газетин ах редактор-һардач Люсана Абидокова болн «Солң» гидг бичкдүдин седкүлин ах редактор Мадина Асланукова делегацин ханьд ирсн болдг. Эдн мана таңһчд һурвн өдртән бәәһәд, хальмг улсин сойлла таньлдҗ, хальмг тег һәәхч цаган сергмҗтәһәр давулв. Хәрхиннь өмн гиичнр «Калмыкия» зәңгллһнә агентствд ирәд, хальмг барин көдләчнрлә харһад, эврәннь һарцсин тускар келҗ өгв.