Элстд болсн келн-улсин оркестрмүдин наадм олн келн-улсиг негдүлсн болҗ медгдв. Үкр сарин 3-д Башкирин келн- улсин зевсгүдин оркестр эн наадмиг товчлв.
Әрәсән келн- улсин ниицлтин җилд мана таңһчд олн керг-үүлдврмүдәр темдгтә болҗана. Хальмгин келн-улсин оркестр Әрәсәд түрүн болҗ оркестрмүдин наадм бүрдәснь нег үлү ончта болв. Һурвн долан хонгин туршарт Элстд Әрәсән келн-улсин көгҗмин зевсгүдин оркестрмүдин концертс болҗав.

Баһ Дөрвдә бичкдүдин билг-эрдмин сурһулин «Теегин торһас» ансамбль Москва балһснд болсн «Аврора» гидг нарт-делкән мөрән дииләчнр болв. И.Тургеневин саң бүрдәдг марһанд цуг орн-нутгас миңһн һар уйн наста билгт орлцв. Тедн дунд мана бичкн домбрчнр диилвр бәрәд, хальмг улсин сойл - билг-эрдмиг олнд медүлснь бахмҗта йовдл болв.

Хальмгин Келн-улсин оркестрин седвәрәр мана таңһчд келн -улсин оркестрмүдин байрин харһлтс болв. Ар Үзгин Осетин – Аланя Келн-улсин оркестр Элстд ирәд, Хальмгин Келн-улсин оркестрлә хамцу үүлдврән эклв. Манҗин Аркадин нертә Хальмг филармоньд хойр коллективин хамцу концерт болв.
Әрәсән сойлын министерствин, «Росконцертин» болн Хальмгин сойлын болн зуульчллһна министерствин дөңгәр көгҗмин иим харһлтс Элстд түрүн болҗ кегдҗәнә, гиҗ Келн-улсин оркестрин һардач Нимгрә Оксана келнә.

Намрар театрмудт шин кем эклнә. Басңга Баатрин нертә Келн-улсин театр шин наадд үзүлхмн. 2026 җил театрин үүлдврт йир ончта болҗана, эн 90-ч кемдән көшгән секв. «Мини Арслң» гидг наадар эклснь темдгтә болв. Лев Гумилевин «Җамуха нойна үкл» үүдәврәр эн наадыг якутск режиссер Андрей Борисов белдв.
Нер туурсн номт Лев Гумилев бийән Арслң гиҗ дууддг бәәҗ. Тернь учрта. Түүрвәчин җирһлд учрсн дурн һашута йовдлд хүврв. Дуту хөвтә дурнь номтын җирһлд мартгдшго мөрән үлдәҗ. Тиигәд эн нааднд олн тоот ниилҗ, гүн ухата Җамухан болн Темүҗинә хоорнд учрсн тоотыг медүлхәр режиссер зүтксмн.
Алдр Чиңһс хаана цагин зәрм халхинь үзүлҗәдг наадн олн улсиг соньмсулв. Театрт эн асхн олн күн цуглрҗ ирв. Таңһчин сойлын болн зуульчллһна министр Бембин Евгений, театрин болн сойлын нертә үүлдәчнр, номтнр, олн улс тәәз деер болҗасн тоотыг оньган өгч хәләв.

Хулһн сарин 21-әс авн 23 күртл Ростовин мүҗин Вешенка күүтрт нертә орс бичәч Михаил Шолоховин төрскн һазрт хазгудын сурһуль-эрдмин бүрдәцсин багшнрин наадм-марһан болв. «Казачья доблесть, дух и слава!» гидг керг-үүлдврт Әрәсән регионмудын 100 һар багш орлцв.

Шидр Москва балһснд Кремлевск бәәшңд «Мини Әрәсә, мини өрк-бүл» гидг төсвин йовудт ик концерт болв. Нертә артистнр Шаман, Катя Лель, Диана Гурцкая, Александр Добронравов болн орн-нутгин регионмудас ирсн билгтнр нег тәәз деер һарч, өрк-бүлин, авъясмудын, Төрскндән дурта болдгин тускар ду-бииһәрн медүлв.
Хальмг Таңһчас «Алтн» ансамблин уйн наста биичнр концертд орлцснь бахмҗта йовдл болв. Келхд, хойр җил хооран эн ансамблин биичнр «Орн-нутгин бахмҗ» гидг төсвин йовудт Кремлевск бәәшңд болсн концертд орлцад, билг-эрдмәрн олн-әмтиг байрлулсн билә. Ансамбль 2013 җилд бүрдәгдсмн, Нарин-Шаринә Наталья терүг эн җилмүдин эргцд һардҗана. Эстрадн болн өдгә цага би биилдг ансамблин биичнр Әрәсән марһасин болн кесг наадмин дииләч болад, нер һарсмн. Тиигәд, «Ик болн бичкн», «Әрәсән сурһульчнрин хавр» гидг төсвст эдн күцәмҗтәһәр орлцсмн.

Нью-Йоркд болсн өдгә цага хувцна долан хонгт хальмг улсин зег хатхмр, бамб болн бадм цецгүд иргч цагин хувц үүдәдг улсин оньг авлв.
«Давсн, өдгә, иргч цаг» гидг нертәһәр үзүлгдсн хувцна хураңһу Нью-Йоркин ик һәәхүлд йоста өврмҗ үүдәв. Модельер Ульяна Урюсова үзүлсн эн хувцн тиигҗ шууга татв. 2012 җилд хувц үүдәлһнә халхар үүлдҗәдг эн эрдмч Флоридад дизайна болн өдгә цагин эв-арһин Академь төгсәв. Дарунь Парижд үүлддг Лесаж сурһулин хатхмрин халхар бәрмт цаас авсн болдг.

Эн өдрмүдт мана таңһчд нертә номт болн олна үүлдәч Очра Номтын 140 җилин өөнд нерәдгдсн керг-үүлдврмүд болҗана. Ода деерән номтнрин номин-дамшлтын хургуд, сурһульчнрин төлә харһлтс давулгдв. Очра Номт сүл җилмүдт Приозерн района Советское селәнд (ода Көтчнрә района Көтчнр селән) дү күүкндән бәәсмн, тенд эн оршагдсмн. Хальмг улсин сойл, тууҗ, амн-үгин зөөр хадһллһнд туслсн, олн-әмтнд «Җаңһр» дуулвр медүлсн номтын нер мөңкрүлхин төлә нег һазра улс Көтчнр селәнд урһа моддын шишлң бәәр секх седвәр татв.

Хальмг Таңһчд симфоническ оркестр бүрдәсн цагас авн 35 җил болҗана. Эн йовдлд нерәдәд, Элстд симфоническ оркестрин концерт болҗана.
Хулһн сарин 18-д болх концертд көгҗмд дурта олн улс ирҗ орлцҗ чадҗана. Хальмгин нертә көгҗмч, Хальмгин Баатр Манҗин Аркадь бүрдәсн коллектив ода энүнә нер зүүҗәдг филармоня бәәрнд цуглрсн улсиг байрлулхмн.

«Голос Калмыкии - 2026» гидг регионмуд хоорндк дууна марһан дарани кемдән билгтә улсиг цуглулҗана. Чонкушова Петрин нертә билг-эрдмин колледж XII марһанд белдвр эклҗәхин тускар зарлҗана.
Эн марһан таңһчин көгҗмин үүлдврт ик чинртә йовдл болна. Билгтә баһчудыг йилһҗ авх арһ учрна.