Ноха сарин 14-д Хальмг Таңһчин Толһач Хаска Батун зәрлгәс иштә Хальмгин эрүл-менд харлһна министрин үүлиг Мушаран Арслң даадг болв. Тер өдр таңһчин залврин Ахлач Босхмҗин Гилән шин һардачиг министерствин көдләчнрлә таньлдулв.

Ноха сарин 17-ас авн 20 күртл Тыва Республикд шар-шаҗна нарт-делкән IV ик хург болхмн. Нер һарсн «Бамб цецг» ансамбль ик хург секлһнә байрт орлцад, терүнә йовудт болх керг-үүлдврмүдин йовудт билг-эрдмән үзүлхмн. Шидр ансамблин һардач Катан Савр таңһчин седкүлчнрлә харһад, эн туст тодрхаһар келҗ өгв.

Цергә шишлң керг-үүлдвр давҗадг һазрт даалһвран күцәҗәдг «Малик» дуудврта нег һазра дәәчд Делгә Эрднин медаль зүүлһгдв.

Нег һазра мана спортсменмүд нарт-делкән болн Цугәрәсән марһаст күцәмҗ бәрәд, таңһчин нер цаарандан дуудулҗ йовна.
Шидр Әрәсән хаһачнрин марһанд Людмила Курнеева Энкира күүктәһән ончрад, алтн медаляр ачлгдв. Тер марһанд хальмг көвүн Эрднин Бембә цаһан мөңгн медаль шүүҗ авв. Тиигәд таңһчин һурвн элч орн-нутгин хамцу багд орснь темдгтә болв.

Өцклдүр Тыва Республикд шар шаҗна нарт-делкән IV хург көдлмшән эклв. Хальмг Таңһчас дөрвн волонтер тенд көдлҗәнә.

Сурһулин шин җил эклтл дигтә хойр долан хонг үлдв. Эн сарин туршарт эк-эцкнр үрдтән хувц-хунр, сурһулин эд-тавр болн талдан кергтә тоот хулдҗ авхар лавкс эргҗ йовна. Күүкдән сурһульд белдхин төлә эндр кедү мөңгн кергтә болдгчн гисн сурвр эн саамд үүдгнь чигн лавта. Энүг медхәр шидр Элст балһсна лавксар йовҗ соньмсвидн.

Шидр мана таңһчур гиигн атлетикин Цугәрәсән федерацин (ВФЛА) элч, нертә футболист Алексей Смертин болн ВФЛА-н вице-президент, Сиднейд болсн Олимпийск наадын дииләч Ирина Привалова ирсн билә. Эн җил Әрәсән 22 балһснд, тер тоод Элстд, гүүлһнә төлә өдгә цага төв тосхгдҗ эдлврт орулгдхмн. Күндтә гиичнр болн Хальмг Таңһчин Толһач Хаска Бату хамдан хотл балһсна 5-ч микрорайонд босхгдҗадг шин тосхлтыг хәләһәд, спортар соньмсдг улсиг дөңнлһнә тускар күүндв.

Шидр Москвад балһсна кец-таал тогталһна сән гисн төсвсин Цугәрәсән XI марһана аш диглгдв, энүнә ашар ут тоодан 215 төсв йилһҗ авгдв. Хальмг Таңһчас Баһ Дөрвд, Приютное болн Яшалта селәд дииләчнрин тоод орснь темдгтә. Баһ Дөрвдт «Долина ступ» гидг паркд бурхн-шаҗна бодь суврһс босххмн, Яшалтад бамб цецгүдин талвң тосххмн, Приютное селәнд болхла «Оазис в степи» гидг ке-сәәхн орм тогтахмн.

Хальмг Таңһчин селәнә эдл-ахун министерствд «Селәнә һазрт сән кец-таал тогталһн» шаңһа көтлвр күцәлһнә йовудт ирлцңгү көдлмш цаарандан кегдҗәнә.
Шидр селәнә эдл-ахун министр Гаван Тимурин һардврт Октябрьск района Ик Царң, Цаһан Нур, Иҗл болн Җаңһр селәдин толһачнрин орлцлһта давулсн селвлцәнә йовудт ирлцңгү төрмүдәр күүндвр болв.

Шидр Хальмгин Олна Палат Әрәсән седкүлчнрин ниицәнә таңһчин әңглә нөкцлтин бооца батлв. Суңһврин йовудыг седкүлчнр үнн-чик кевәр олнд зәңглхин тускар күүндвр болв.