Мана таңһчин улс нег һазра дәәчнрән дөңнхин төлә хот-хол, хувц-хунр, эм, олн зүсн кергсл болн талдан тоот цергә шишлң керг-үүлдвр давҗадг һазрур даңгин авч одна. Тер мет байрин өдрмүдлә ирлцүлҗ, таңһчин нертә артистнр тиигәрән бас одад, Төрскән харсачнриг йөрәнә.
Одахн Луганск Улсин Республикин Антрацитын района Боково-Платово селәнд Хальмгин делегац одад ирв. Цаһан Сарин, Масленица болн Төрскән харсачин сән Өдрлә дәәчнриг йөрәв. Бәәрн сойлын Герт «Бамб цецг» ансамблин, Цевгә Төлән нертә хорин болн Антрацитын района артистнр хамцу концерт бүрдәв.
Байрин концертын йовудт мана таңһчин делегациг ахлҗ одсн залврин ахлачин дарук Җамбинә Очр Хальмгин Толһач Хаска Батун даалһсар нег һазра хойр дәәчиг Делгә Эрднин медаляр ачлв.

Басан Бадьминович Городовиковин дуудврар
Хортна салдсин әм аврад
Воронежск күүкдт белгән илгәҗ
Ут күклтә Зинад-улан тасм

Хальмг Таңһчин күндтә иргн, Әрәсән ачта зурач, Хальмгин билг-эрдмин ачта үүлдәч Владимир Васькинә найн тавн җилин өөн эн җил күцҗәнә. Хальмгин билг-эрдмин делгрлтд ик тәвцән орулсн зурачин үүлдврт нерәдсн һәәхүл Н. Пальмовин нертә Келн-улсин музейд секгдв.

Шидр Элст балһснд 27 баахн өрк гер-бүүрин шишлң цаас авв. «Баахн өрк-бүлмүдт дөң күрглһн» гидг шаңһа көтлврин йовудт хотл балһснд бәәдг 27 өрк-бүл гер-бүүрин таал ясруллһнд демин мөңг авв. Элст балһсна Хургин ахлач Максим Сорокин болн хотл балһсна һардврин толһачин дарук Дмитрий Довгополов баһчудыг йөрәһәд, хөв-кишг дурдв.

Шидр «Калмыкия» РИА-н барин төвд Әрәсән цергә-тууҗин ниицәнә Хальмгин әңгин элчнр 2025 җилин аш диглҗ, эн җил кех-күцәх тоотын тускар цәәлһҗ келв.

Давсң басң өдрлә хальмг тууҗин болн авъясин туск соньн күүндвр болв. Түүнд костюмин болн пластикин таңһчин театрин һардач Татьяна Милованован үүдәсн соньн зургудын альбомин тускар Хальмг филармоня билг-эрдмин салврин ахлач Ольга Дедникова болн нертә зурач Бадендән Сергей тодрхаһар келҗ өгв.

Давсн долан хонгт Хальмг Таңһчин Улсин Хуралын (Парламентин) сессьт хәләгдсн төрмүд дунд күүнә зөв харслһна төрәр үүлддг күцц зөвтә элч Валерий Чуб тооцаһан өгәд, цергә шишлң керг-үүлдврт орлцачнрин болн теднә өрк-бүлмүдин зөв харслһна тускар онц келв. Цергчнрин социальн теткврин, эрүл-менд батруллһна, демин мөңг авлһна болн нань чигн төрмүд хаһлхд нөкд болхиг сурад, ут тоодан 965 эрлһн орулгдсн болв.

Одахн Элстд «Эрдмчнр» гидг Цугәрәсән марһана таңһчин девсң төгсв. Элстин колледжмүдин болн Хальмг ик сурһулин талвңд эдн олн зүсн эрдмәр мергҗлтән үзүлҗ дөрлдв. Эднә эв-довинь дааврта жюрин гешүд үнлҗ оютнр болн сурһульчнр дундас хамгин белдвртәһинь шүүҗ авв.

Хальмг Таңһчин Толһач Хаска Бату Сбербанкин Өмн-барун үзгин әңгин һардач Анатолий Песенниковла харһад, нөкцлтин халхар күүндв. Хамгин түрүнд өдгә цагин эв-арһсин, зуульчллһна, ЖКХ-н делгрлтин болн сурһуль-эрдмин төсвс күцәлһнд онц оньг тусхагдв.

Шидр Әрәсән залврин Ахлач Михаил Мишустин 2025 җилд кеҗ-күцәсн көдлмшин аш диглв. Орн-нутгин Хүүвин депутатнрин оньгт илдкл тусхагдв.
Терүнә йовудт Әрәсән регионмудын делгрлтин төрмүдт онц оньг өггдв. Орн-нутгин Президент Владимир Путинә даалһсар социальн-экономикин халхар регионмуд делгрүллһнә шишлң көтлврмүд күцәгдҗәнә. Теднә тоод мана таңһч орснь темдгтә.