Бамб цецгин наадм цаарандан давҗана. Мөрн сарин 18-д таңһчин нәәмн районд нәр-наадн болв.
Баһ Дөрвд селәнә төвд «Җаңһр» нертә стадионд ирлцңгү керг-үүлдвр бүрдәгдв. Сойлын кергүд спортын марһасла зерглҗ давулгдв. Сән авъяст тохрсар җил болһн армрестлингин дөрлдәнд олн-әмтн цуглрна. Терүнд Аһшин болн Ростов мүҗсин элчнр бас орлцсинь темдглх кергтә.

Давсн долан хонгт Әрәсән цуг регионмудар «Әрәсән көдлмш. Эв-арһсин цаг» гидг көдлмшәр тетклһнә керг-үүлдвр болв. Эн керг 2023 җиләс авн Әрәсән Президентин даалһврар давулгдҗана. 2025 җиләс авн эн «Кадрмуд» гидг келн-улсин төсвин йовудт көдлмшч эрдмин чинр өөдлүлхин күслтәһәр бүрдәгдҗәнә. Сән авъяст тохрсар эн керг-үүлдврин таңһчин девсң А.Амр-Санана нертә Келн-улсин дегтрин саңд болв. Таңһчин бүрдәцсин элчнр, дунд болн шишлң сурһульмудын оютнр болн сурһульчнр, көдлмш хәәҗәдг улс терүнд олар орлцв.

Җил болһн мөрн сарин 21-д мана орн-нутгт бәәрн залврин бүрдәцин Өдр темдглнә. Терүг Әрәсән Президентин зәрлгәс иштә 2012 җиләс авн темдглдг болсмн. Бәәрн залврин бүрдәцс улсин болн йосна хоорндк залһлдаг батрулна гиҗ келнә. Бидн хамгин түрүнд мана төрскн орн-нутгин, дорас өсч йовдг үйнрин сәәхн иргчин төлә көдлҗәнәвидн гиҗ орн-нутгин толһач Владимир Путин темдглсмн.

Цаһан Нуурин
Школнь, школнь
Цаһан Нуурин көвәднь
Дүңгәһәд бәәнә.
Цецн гинә билгтә
Эгл улсин күүкднь
Цаасн гинә номиһән
Дасад сууна...

[b]Хавр ирәд, Хальмг Таңһчд бамб цецгин байрин цаг ирнә. Тег нарна герлд уняртад сәәхрсн цагла, бамб цецгүд теңгрүр сунҗ, тег йосндан кеернә. Зуульчнр олар ирнә. Теегин сәәхн темдгин нер зүүсн «Бамб цецг» ансамбль хоша бәәдг республикүдт күрч, билг-эрдмән үзүлнә. «Танцы над Эльбрусом» гидг ик байрт эдн орлцв.

Сурһуль-эрдмин халхар төрскн кел хадһллһна төрәр шидр Баһ Буурла дунд сурһульд, «төгрг ширән» сүүр болв.

Хальмгин Толһач Хаска Бату мана таңһчд ирсн седкүлчнрлә харһҗ күүндв.

Социальн бүрдәцс тосхлһна төрәр шидр таңһчин Толһач Хаска Батун һардврт селвлцән болв. Өөрхн җилмүдт тосхгдх болн босхгдҗадг олн бәәрнә төр терүнд хаһлгдв. Цуг көдлмш зураһар күцәгдҗ, онц кевәр бүрткгдҗәдг болв.

Шидр таңһчин Толһач Хаска Бату Моңһлын Улан Баатр хотл балһснд «Газпромбанкин» элчллтиг һардҗадг Күкән Нарнд Хальмгин улсин эдл-ахун ачта көдләчин нер зүүлһв.

Эн долан хонгт Элст балһснд Әрәсән күүкд улсин ниицәнә Хальмг Таңһчд үүлддг әңгин седвәрәр «Мана ниицлтд - Әрәсән күчн» гиҗ нерәдгдсн регионмуд хоорндк ик хург болв. Хальмг Таңһчин, Әәдрхнә, Аһшин болн Ростовин мүҗсин, Карачаево-Черкесин болн Луганск Улсин Республикин Антрацит балһсна күүкд улсин олна ниицәнә элчнр терүнд орлцв.