Хальмг Таңһчин Толһач Хаска Бату Хальмгин Деед зарһин ахлач Саңһҗин Артурла харһҗ күүндв.

Эн өдрмүдт Әрәсән бәәрн залвриг делгрүллһнә бүрдәцин (ВАРМСУ) «Матрица роста» гидг сурһулин ик хург болв. Эн керг-үүлдвриг Хальмг Таңһчин Толһачин һардвр болн таңһчин муниципальн бүрдәцсин хүүвин негдлт бүрдәҗ давулв. Сурһулин көтлврт 13 района болн Элст балһсна элчнр орлцад, һурвн өдрин туршарт мергҗлтән өөдлүлҗ, кеҗ-күцәҗәдг көдлмшиннь тускар хоорндан хувалцҗ, шаңһа төсвст орлцлһна туст дамшлт хоршав.

Шидр Хальмг Таңһчин залврин Ахлачин дарук – Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Марина «Төрскән харсачнр» саңгин әңгин төрмүдәр үүлддг бүрдәцд хоорндк әңгин дарани сүүр давулв.

Көтчнрә района Тугтн селәнд өсәд-боссн Мөңкән Валентина сүл хөрн һар җилин туршарт социальн көдләч болҗ көдләд, һанцарн бәәдг медәтнрин болн гемтә-шалтгта улсин түрүн нөкд болҗ дөң-тусан күргҗәнә. Энүнә килмҗтә хәләврт ода тавн күн бәәнә. Валентина Басанговна күн болһнд цаһан седклән нерәдҗ, медәтнрин сурсиг-даалһсиг күцәҗ, эднд нүдн-амн болна.

Көглт селәнә тал дунд өөдм деер суврһн дүңгәҗ бәәнә. Селәнә әмтнә седвәрәр 2013 җилд эклҗ тосхгдсн Гегәрлтин суврһн байрин бәәдлд шидр секгдв. Оюни ик чинртә байрт орлцхар олн улс цуглрҗ ирв.

Баһ Дөрвд селәнд Сиврин тууврт тусад, цааҗллһна күнд тоотыг дааҗ һарад, төрскн һазртан ирәд, таңһчан босхч авсн ах үйнрин санлд нерәдәд, бумблв босхгдв.

Ик Буурла района «Торһа» ансамблиг әмтн сән меднә. Вологда балһснд хальмг артистнр билг-эрдмән үзүлхмн.

Хулһн сарин 24-д «Номин шинҗллт мана эргнд» гидг Цугәрәсән гегән-герлин керг-үүлдвр эклв. Номин болн технологин делгрлтин җисәнә арвн җилин өөнд тернь нерәдгдҗәнә. Номин шинҗллтин болн ухалврин салврт орн-нутгин йосн яһҗ делгрҗәхин тускар тодрхаһар үзүлҗәнә. Орн-нутгин цуг регионмуд түүнд орлцҗана, тер мет маднла өөрхн бәәдг орн-нутгудын – Абхазин, Белоруссин, Узбекистана, Таджикистана, Өмн үзгин Осетин олн улс терүгәр бас соньмсчана. Иим ик кемҗәтә керг-үүлдвр ик сурһулин багшин өдрлә – үкр сарин 19-д төгсх. Хамгин түрүнд эн кергин йовудт номин өдгә цагин күцәмҗиг үзүлҗ хоршасн медрләрн номтнр хувалцх.

Олн улсин ниицлтин Өдрлә ирлцҗ таңһчар болн райодар кесг керг-үүлдвр болв. Тер тоод Элстин 21-ч тойгта сурһульд һардачин сурһмҗин халхар бәәдг селвгч Маргарита Пантюхован седвәрәр залһлдана эв-арһар талдан регионмудын сурһульчнрла соньн төрәр күүндвр болв. Терүнд багшнр чигн орлцҗ селвгән өгв.
Хальмг хувцта мана сурһульчнр келн-улсин тууҗин болн авъясин тускар келв. Әрәсән Федерацин кесг республикүдин болн мүҗсин элчнр бас эврә улсин тууҗин болн сойлын тускар келҗ өгв. Цааранднь чигн Хальмг Таңһчла болн талдан мүҗслә эврәннь иньгллтән өргҗүлх седклән медүлв.

Хальмг кел делгрүллһнә төвд Әрәсән олн улсин ниицлтин Өдрт нерәдсн нарт-делкән номин-дамшлт хувалцлһна төрәр «төгрг ширән» сүүр болв.