«Әрәсә» гидг һәәхүл нидн үкр сарин 4-д секгдәд, орн-нутгин күцәмҗин тускар олнд медүлҗ, сойлын, сурһулин болн нань чигн соньн керг-үүлдвр бүрдәҗ давулҗана. Һәәхүлд Әрәсән 89 регион, федеральн ведомствс болн олна бүрдәцс орлцҗана, ут тоодан 12 сай күн нааран ирсн бәәнә. Эн җил Әрәсән Президент Владимир Путинә шиидврәс иштә мана орн-нутгт өрк-бүлин Җил зарлгдв. «Әрәсә» гидг һәәхүлд өрк-бүлин Җил секлһнә байрин керг-үүлдвр энд болснь орта болв. Өрк-бүлин Җилд нерәдгдсн керг-үүлдврмүд һәәхүлд цааранднь чигн болхмн.

Төрскән харсгч Алдр дәәнд Диилвр бәрснә 79 җилин өмн өргнд Хальмг ик сурһульд инженерин-технологин дацңгиг төгсәсн, гвардин баһ сержант Алтн Музаевин санлынь тевчҗ неринь мөңкрүллһнә самбр секгдв. Инженерин-технологин, талдан дацңгудын оютнр, багшнр, Хальмг ик сурһулин һардачнр эн керг-үүлдврт орлцв. Һучн нәәмтә дәәч орн-нутган харсч, цергә шишлң керг-үүлдврт орлцад, 2023 җилин һаха сарин 1-д күнд шавас көлтә Запорожск мүҗин һазрт әмнәсн хаһцла.

Эн җилин түрүн һурвн сарин эргцд мана таңһчин селәдт бәәдг 65 нас һарсн зун шаху медәтин эрүл-мендин бәәдлинь шинҗлв, 157 күүнд лабораторн шинҗллт келһнд дөң күргв, эмәр болн эмнлһнә кегдлмүдәр теткв. «Демографь» гидг келн-улсин төсвин медлд «Ах үйин улс» гидг региональн төсвин халхар эн керг-үүлдврмүд күцәгдв.

Шидр Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан даалһврар Луганск Улсин Республикин Антрацитовск медәтнрин болн гемтә-шалтгта улсин гер-интернатд дөң күрггдв. Ода эн бүрдәцд 220 күн бәәнә.

Одахн Хальмг ик сурһулин мал эмнлһнә тиңкмин һардачин үүл дааһач Санл Маштыков болн ассистент Үлмҗ Эрдненов номин болн нөкцлтиг өргҗүллһнә халхар Узбекистанд одад ирв. Эднд мал өсклһнә «GreenVet» клиник (Ташкент балһсн) үрвр келә. Энд мал эмнлһнә болн месллһнә, өдгә цагин нань чигн салврар мастер-классмуд өггдв.

Шидр Аһш балһснд «Әрәсән нерд» гидг бичкдүдин болн арвтнрин үүдәлтин нарт- делкән марһан-наадмин девсң болв. Эн марһан сойлын седвәр дөңнлһнә президентск саңгин дөңгәр давулгдна, жюриг нертә дууч Анита Цой һардна.

Төрскән харсгч Алдр дәәнд орлцсн күүкд улст нерәдсн керг-үүлдвр Н. Пальмовин нертә Келн-улсин музейд болв. Дәәнд орлцсн күүкд улсин тускар келҗ өгчәх харһлт санлын олн керг-үүлдврмүдин йовудт болснь темдгтә.

Иим нертә һәәхүл Элстд «Арт Эрдэни» гидг галерейд секгдв. Терүнд зурлһна эрдмд түрүн ишкдлән кеҗәдг зурач Дима Бараевин зургуд үзүлгдҗәнә.

Хальмгин баһ наста зурачнр «Теегин бичкдүд» гидг зургудын төсв белдҗ олна оньгт тусхав.

Хальмг Таңһчин Толһач Хаска Бату Росавиацин һардач Дмитрий Ядровла харһв. Элстин аэропорт секлһнә төрәр күүндвр болв.
– Хөн сарин 28-әс авн Элстәс Москван мүҗин Жуковский балһснд «Red Wings» авиакомпаня самолет экләд нисхмн. Мана таңһч шин төсвс күцәлһнд орлцхар даңгин белн бәәнә. Элстин аэропортд сән таал цаарандан тогтагдхмн. Эннь экономическ болн зуульчллһна халхст бәәтхә, пассажирмүдин то икдүлһнд бас туслхмн. Ирх җилд шар шаҗна ик хургт мана таңһчд олн гиичнр ирхмн, тегәд аэропорт секгдҗәхинь йир темдгтә болҗана. Дмитрий Викторовичд болн федеральн төвд ханлтан өргҗәнәв. Хальмг Таңһчд авиазалһлдана делгрлтд тәвцән орулҗ көдлхвидн, – гиҗ Бату Сергеевич ашлв.

ОЛЬДАН Цаһан