Маңһдур цуг нарт-делкәд өрк-бүлин сән өдр темдглгдҗәнә. Күн болһнд өрк-бүлнь җирһлин хаалһднь түшг болҗ, ямаран чигн күнд-күчриг даахд дөң болна, байринь хувалцҗ бахмҗ кенә. Нег үлү эндрк амр биш цагла өрк-бүл маднд чидл урһаҗ, өмәрән зөрхд урмд өгнә. Өрк-бүл бат болн ниитә болхла, мана орн-нутг чигн бат болҗ, делгрәд, өсәд-өргҗәд йовхнь маһд уга.

Хөн сарин 3-д Москва балһснд Александровск садт бәәдг Нерн уга салдсин үкәрин шидр «Санлын һал» нарт-делкән керг-үүлдвр экләд, мөңк һалас һал шатагдад, Әрәсән 33 регионд, 14 талдан орн-нутгт болн цергә шишлң керг-үүлдврин түрүн зергләнд йовдг орлцачнрт йовулгдв. Энүг Улсин фронт бүрдәв.

П.Жемчуевин нертә таңһчин эмнлһнд медицинск эгчин нарт-делкән Өдрт нерәдгдсн байрин хург болв. Терүнд Хальмг Таңһчин Улсин Хуралын (Парламентин) депутат Мацга Татьяна, таңһчин эрүл-менд харлһна министр Саран Булат, таңһчин эрүл-менд харлһна көдләчнрин профсоюзин ахлач Манҗика Евгения, таңһчин Олна палатын Ахлач Мучан Батыр орлцв. Таңһчин эмнлһнд олн җилдән көдлсн, эрүл-менд харлһна делгрлтд ик тәвцән орулсн улс байрин хургин күндтә гиичнр болҗ орлцснь темдгтә болв.

Гем келҗ ирдго гидг. Кесг улс олн зүсн учрар өвчн учрад, зеткртә йовдлла харһад, бийән асрҗ чаддг арһ уга болна. Элгн-саднь тиим улст нүдн-амн болад, дөңгән күргҗ арднь орҗ хәләнә. Болв гемтә-шалтгта улст олна бәәдл-җирһлд орлцҗ, талдан әмтнлә харһҗ, билг-эрдмән үзүлҗ, арһ бәәхлә көдлмш олҗ авх кергтә. Эрмдгтә улсин төрмүд хаһлҗ, эдниг хамцулхин төлә олна бүрдәцс бүрдәгдҗ, эднә җирһлин таал ясрулхин төлә үүлднә. Мана таңһчд олна ниицәс дунд нүднә харань муурсн улсин бүрдәц онц орман эзлнә.

Җил болһн хаврар мана теегт бамб цецгүдт нерәдсн ик наадм болна. Мөрн сарин туршарт эн байрт нерәдсн олн керг-үүлдврмүд давулгдв. Элст балһсна 4-ч тойгта сурһульд 2-ч «а» классин сурһульчнр хальмг келнә багш Т.М.Нимеевала (зургт) бас эн сәәхн хаврин байрт нерәдсн соньн нәр давулв.

«Өөрднр» хальмг бииһин театр Крымин һазрар концертс үзүлҗәнә. Феодосия курортн ик балһснд хальмг биичнр үзүлсн концерт әмтнд таасгдв. Ялта балһснд чигн әмтн хальмг бииһин эрдмлә таньлдв.

Хөрдгч зун җилин чилгчәр мана таңһчд шар шаҗн шинәс делгрлтән авсмн. Тер җилмүдт мөргүлин гермүд, кесг суврһн экләд босхгдв.

Хальмгт Үрс Сарин евәлтә сән цаг эклсн бәәнә. Эн җил хальмг улсин авъяс болсн шаҗна байрин цагин эклц Алдр Диилврин өдрлә ирлцснь бас нег ончта йовдл болҗана.

Сарпан района Шарнут селәнә бәәрн улс бер Манҗин Александраг цуһар күндлҗ өр-өвч седклтә болн седвәртә күүкд күн гиҗ буульна. Бийнь эн хам-хоша бәәдг Уманцево селәнд өсәд-боссмн, шарнута көвүн Манҗин Санлд хәрд һарад, энд иҗлдв. Сүл арвн негн җилин эргцд Александра Петровна социальн көдләч болад, зурһан медәтиг килмҗлҗ хәләнә.

Амр-Санана нертә Келн-улсин дегтрин саңд Чернобыльд болсн аюл уга келһнд орлцачнрт нерәдгдсн «Җирһлин төлә әмән әрвлсн уга» гидг шин дегтрин презентац болв. Темдглхәс, эн дегтрт Семипалатинск, Тоцкий, Новая Земля, «Маяк» гидг полигонд ядерн бомб олзллһиг шинҗлсн керг-үүлдврмүдт орлцачнрин тускар бас келгдҗәнә. Эн дегтрин түүрвәчнр Һучна Борис Галина хойр болна. Борис Букиевич таңһчин чернобыльцнрин олна ниицәг һардҗана. Үүрмүдиннь ач-тус хәрүлхин, эднә санл мөңкрүлхин төлә эн дегтр барас һарһх күсл тәвәд, 2019 җилд эдн көдлмшән эклсмн.