Одахн Сарпуль балһснд «Мал өсклһнд шин эв-арһс олзллһн. Орн-нутгт хот-хоолын әәмшг уга бәәдл тогталһн» нертә нарт-делкән хург болв. Әрәсән регионмудын болн Узбекистана селәнә эдл-ахун бүрдәцсин һардачнр, номтнр, йосна элчнр, мана таңһчин элчнр хургт бас орлцсн болдг. Онц темдглхд, Хар Һазра района толһач, Хальмг Таңһчин Баатр Болдра Валерий «Хө өсклһнә халхар ачта көдләч» нертә медаляр ачлгдв. Валерий Астаевич «Первомайский» СПК-н үлгүрәр хө өсклһнә болн торһн ноос кеҗ һарһлһна төрмүдәр илдкл кев. Тер мет хургин йовудт селәнә эдл-ахун халх цааранднь делгрүллһнә туск чинртә төрмүд босхгдв, хөд өсклһнд болхла онц оньг тусхагдв. Ачлвр зүүсн Болдра Валерий ханлтан өргәд, эн хамдан көдлҗәдг олн улсин нилч болҗана, гиҗ медүлв.

Одахн Москвад Хальмг Таңһчин элчллтд соньн харһлт болв. Орн-нутгин хотл балһснд бәәдг төрскнч болн буйнч седклтә нег һазра зурһан күн «II девсңгин фронтд дөң-тусан күргсн төлә» медальмүдәр ачлгдсн болдг. Тедн дунд Эвин Нүүдлә, Даван Сяахә, Манҗин Максим, Мудан Надежда, Бадминә Елена болн Зоя Зубкова заагдв.

«Медрл» Әрәсән ниицән Лектор марһана ашлгч девсңд һарсн улсин нерд заав. Орн-нутгин 82 региона 516 элч үкр сард Москва балһснд болх ашлгч девсңгин даалһвр күцәхмн, шинҗләчнрин хүүв тедн дундас дииләчнриг йилһҗ авхмн.

Эн өдрмүдт мана таңһчур хол Китдин Шинҗәнә һазрт бәәдг «тасрсн махн, өсрсн цусн» ахнр-дүүнр зуульчлҗ ирв. Өвкнриннь һазрт түрүн болҗ ирсндән, Иҗл һолд күрәд, аав-ээҗнриннь әрүн санан-седкл күцәсн күндтә гиичнр билг-эрдмән үзүлҗ, иньгллтин концертд орлцв. Төрскн һазрасн кесг зун җил хооран салсн бийнь эдн хальмг келән, сойлан, авг-бәрцән хадһлад, дорас өсч йовх баһ үйд дасхч йовхнь темдгтә. Ик холас ирсн гиичнрин концерт хәләхәр олн улс ирв.

Шидр таңһчин Улсин Хуралд (Парламентд) Хальмгин Толһачин элч Манҗин Араш Сарпан района муниципальн бүрдәцин толһач Манҗин Басңла хамдан Башкортостан Республикд йовад, Төрскән харсгч Алдр дәәнә цагт хальмг һазрт туурмҗарн ончрсн башкир күүкд күн Зайтуна Альбаевад нерәдсн санлын керг-үүлдврт орлцв.

Әрәсән Федерацин экономикин делгрлтин Министерств шишлң төсв күцәдг Төвлә хамдан – Әрәсән хаалһсин ик хураңһу белдҗ, олна оньгт тусхав. Орн-нутгин 109 үзгәр һардг көлгнә хаалһс терүнд орв. Әрәсән 62 региона һазрар тернь дамҗад һарна.

Хальмг улсин шүлгч Увшан Явана шүлгүд соңсхар кесг күн цуглрҗ ирв. «Алтн цаг» нертә төвд ах үйин әмтн цуглрҗ күүндәд, амрлһна цаган давулна. Эн өдр болхла, балһсна әмтн нег һазра шүлгч бичсн шин шүлгүдиг соңсв.

Элстд хулһн сарин 23-д хамцу концерт болв. Хальмг филармоньд Хальмгин Келн-улсин оркестр болн Людмила Зыкинан нертә «Россия» гидг орс дууна академическ ансамбль билг-эрдмән үзүлв.

Хальмгин Толһач Хаска Бату таңһчд сән кец-таал тогталһна халхар селвлцә давулв. Терүнә йовудт күцәгдсн болн иргчдән кегдх көдлмшин тускар күүндвр болв.

Шидр «Өрк-бүл өндәлһнә туск» фильм үзүлгдв. «Росмолодежь»-ин, «Өдгә цагин үүлдврин шишлң сурһулин» болн Хальмгин сойлын болн зуульчллһна министерствин дөң-тусар «МЕНД!Media» баг эн төсвиг күцәв.