Хальмг Таңһчин Улсин Хуралын (Парламентин) делегац Карачаево-Черкессь Республикин Архыз селәнд болсн Ар Кавказин парламентск Ассоциацин (АКПА) хургт орлцв. Хальмгин делегацин ханьд таңһчин Улсин Хуралын Ахлач Артем Михайлов, энүнә дарук Бадмин Вячеслав, депутат Саңһҗин Лаг орв.

Шидр Хальмг Таңһчин Улсин Хуралд (Парламентд) Хальмг Таңһчин Толһачин элч Манҗин Арашин һардврт гемтә-шалтгта улсин төрмүдәр үүлддг хүүвин дарани селвлцән болв. Терүнд таңһчин социальн делгрлтин, күч-көлснә болн көдлмшәр тетклһнә министрин дарук Һәрән Ольга, күүнә болн бичкдүдин зөв харсдг элчнр Валерий Чуб болн Чужан Наталья, таңһчин Улсин Хуралын депутат Эрднин Гилән, «Баатрмуд 08» көтлврт орлцач Трофима Дольган, эрмдгтә улсин олна бүрдәцсин элчнр орлцв. Селвлцәнд эрмдгтә улсиг спортар соньмсуллһна, балһсна сурһуль-эрдмин бүрдәцст сән кец-таал тогталһна төрмүд хәләгдв.

Эн җил бидн «Җаңһр» алдр дуулврин 585 җилин өөн темдглҗәнәвидн. Эн ончта өөнд нерәдҗ таңһчин сурһуль-эрдмин бүрдәцст ирлцңгү керг-үүлдврмүд давулгдҗана. Шидр Баһ Дөрвдә района Ик Бухс селәнә академик Эрднин Пүрвән нертә дунд сурһулин улд болсн чинртә хургт таңһчин райодын болн хотл Элст балһсна сурһуль-эрдмин бүрдәцсин элчнр бәәтхә нертә номтнр, Бурять болн Чувашия Республикүдин, Моңһлын элчнр орлцснь темдгтә болв.

Сән авъяст тохрсар, мана таңһчд җилд хойр дәкҗ хазна төсвәр өргн күүндвр тогтагдна. Терүнд Хальмг Таңһчин Улсин Хуралын депутатнр, күцәгч йосна элчнр, «Герои 08» көтлврт орлцачнр болн олна ниицәсин гешүд орлцад, чинртә төрәр ухан-тоолврарн хувалцҗ, хазна төсвиг батлхас урд олн зүсн төрмүд босхҗ сүв-селвгән орулна. Шидр Б.Городовиковин нертә Хальмг ик сурһулин улд болсн ик селвлцәнд таңһчин иргч һурвн җилин хазна төсвәр өргн күүндвр болв. Харһлтыг «Калмыкия» ззәңгллһнә бүрдәцин һардач Марила Хоңһр давулв.

Өдгә цагин балһсна бәәдл-җирһлд көлгн нег онц орман эзлнә. Өдр болһн әмтн көдлмштән адһҗ зогсалмудт кергтә тойгта көлгән күләнә. Орн-нутгин регионмудт балһсдын олн-әмтиг зөөдг көлгнә делгрүллһн социальн-экономикин халхин нег нәрн төр болна. Балһсдар йовдг көлгиг 80 процент улс олзлна. Элстин бәәрн улс балһсар йовдг олна көлгнә то цөн гиҗ даңгин келнә. Өрүн көдлмштән, асхнднь гертән күрхин төлә зогсалмудт уданар күләх кергтә болна. Шидр мана хотл балһснд көлгнә йовлһн яһҗ бүрдәгдгиг медхәр Элст балһсна һардврин толһач Лиҗикә Алдрла хамдан «Элст ГорТранс» МАУ-д йовад соньмсвидн.

Октябрьск районд Сарпан услврин сурвлҗна ясвр эклҗәнә. Хальмгин селәнә эдл-ахун министр Гаван Тимур Хальмг Таңһчд селәнә эдл-ахун халхиг усар тетклһнә болн мелиорацин заллтын һардач Гусейн Исаевла хамдан көдлмшин йовудыг бүрткв. Эн сурвлҗн 1960 җилд эдлврт орулгдад, тер цагас авн ясгдад уга. Давсн кесг арвад җилмүдин туршарт усар тетклһн хойр холванд баһрад, селәнә эдл-ахун тәрә тәрлһнд харшлтан күргҗәнә.

Җил болһн хулһн сарин 15-д нүднә харань муурсн улсин төрмүдт оньг тусхахин төлә нарт-делкәд «Цаһан тайгин өдр» болна. Үкр сарин 13-д болхла нүднә харань муурсн улсин Өдр темдглнә. Эн җил нүднә харань муурсн улсин Әрәсән олна ниицәнә (ВОС) Хальмг Таңһчд үүлддг әңгин шиидврәр эн хойр өдриг хамцулад, сара хонга керг-үүлдврмүд зарлгдв.

Одахн Элстд таңһчин сурһуль-эрдмин министерствин коллегийин сүүр болв. Энд шалтгта сурһульчнриг болн оютнриг дасхлһна төрмүдт һол оньг өггдв. Энүгәр һол илкдлиг министерствин әңгин һардач Увшин Зоя кев. Дундын эрдмин сурһульта мөч тату оютнриг дасхлһна таал ясрулхин төлә Элстин багшин колледжин медлд ул-сүүрин бүрдәц 2020 җил тогтагдла. Тер кергт шаңһа болн таңһчин төсв саңгас 9 миңһн һар арслң һарһгдла. Дундын сурһулин эрдм өгдг колледжмүдлә ниигмин нөкцлт кехин төлә таал тогтагдла. Инклюзивин сурһуль-эрдмин халхар Элстин багшин колледжин мергҗлтнр Москвад болн талдан балһснд медрлән гүүдүлнә гиҗ Зоя Петровна темдглв.

Әрәсәд Энткгин элч Винай Кумар Хальмгт Бурхн Багшин әрүн тоот үзүлгдснә евәлтә ашин тускар барин һарцд бичсинь умшхд соньн болв. Хальмг Таңһчд ик евәлтә болсн эн йовдл Әрәсән болн Энткгин иньгллтин залһлдаг батллһнд ик чинр зүүҗәхинь Энткгин элч темдглҗ бичҗәнә. Бурхн Багшин әрүн тоот яһҗ олдсна тускар Винай Кумар бичснь мана умшачнрт соньн болх.

Хальмг Таңһчин Толһач Хаска Бату Әрәсән тосхлтын болн ЖКХ-н министр Ирек Файзуллинлә харһҗ күүндв. Терүнә йовудт өдгә цагин эв-арһс олзлад, Иҗл һолас усна сурвлҗ тосхлтын төсв босхгдв. Тер мет жилищн-коммунальн эдл-ахун халхар һурвн бәәрин болн хаалһсин тосхлт, көлгнә шинрүллһн болн дулаһар тетклһнә кемин төрмүд бас хәләгдв.