Хулһн сарин 11-д Энткг орн-нутгас мана таңһчд Бурхн Багшин әрүн тоот авч ирв. Бембә өдрлә Элстин аэропортд олн-әмтн цуглрҗ, Энткгәс нисч һарсн самолет күләв. Тедн дунд таңһчин һардвр, зөв-йос харлһна бүрдәцсин көдләчнр, төв хурлын ламнр, седкүчнр, баһчудын болн олна бүрдәцсин элчнр, артистнр бәәв.
Өрүн арвн часин алднд самолет бууҗ ирсн шишлң ормд 700 шаху күн хаалһин хойр таласнь зогсад энүг тослһна керг-үүлдврт орлцв. Бурхн Багшин әрүн тоотыг Хальмгин Толһач Хаска Бату болн Шаҗн Лам Тензин Чойдак тосв. Энткгин Келн-улсин музейд хадһлгдҗадг эн әрүн тоотыг орн-нутгин залврин элчнр болн ламнр авч ирв. Ут тоодан Энткгәс делегацин ханьд 50 шаху күн ирсн болдг.

Мана таңһчд тууҗлгч чинртә йовдл учрв: Будда Бурхна әрүн тоот түрүн болҗ Әрәсәд авч ирв. Орн-нутгин шар шаҗна оюни төв болҗадг Хальмг Таңһчур Энткгин Келн- улсин музейд хадһлгдҗадг әрүн тоотыг шишлң самолетар авч ирснь нег үлү хальмг улсин төлә ик чинртә йовдл болҗ үнлгдҗәнә. Таңһчин Толһач Хаска Бату керг- төрин халхар эн хол нутгт одсн саамдан ирлцңгү бооца батлсна тускар урднь зәңглгдсн билә. Хулһн сарин 11-д болхла шаҗна әрүн тоотыг күргҗ ирсн Энткгин йосна элчнриг болн гелңгүдиг Элстин аэропортд таңһчин һардвр болн бәәрн улс бүләнәр тосч авсмн.

Хальмг бииһин «Өөрднр» театр Уулын Алтад билгән үзүлв. «Хальмг бииһин алтн көрң» нертә эднә концерт бәәрн улст йир икәр таасгдв. Хальмг билг-эрдмин нертә коллектив 16 би Алтан әмтнә оньгт тусхав. Уулын Алтан Келн-улсин драмин театрин тәәз деер хойр өдртән хальмг көгҗм күңкнҗ, теегин салькн хурлзсн мет түргн авцта би теегин иньгүдин седкл медүлҗ, театрин талвңгас әмтиг байрлулҗ сергәв. Эн концертән хальмг биичнр Алдр Диилврин 80 җилин өөнд нерәдв.

Эн өдрмүдт мана орн-нутгт Цугәрәсән агродиктант давулгдҗана. Әрәсән 89 регион керг-үүлдврт орлцҗана. Сурһульчнр, оютнр, олн бүрдәцсин мергҗлтнр, Төрскән харсгч Алдр дәәнә ветеранмуд, цергә шишлң керг-үүлдврт орлцачнр, нертә үүлдәчнр, ик-бичкн уга олн-әмтн шунмһаһар Агродиктант бичҗәнә.
Керг-үүлдврт орлцачнр АПК-төрәр 45 минутын туршарт 30 сурврт хәрү өгх зөвтә. Ут тоодан Әрәсәд йисн миңһн һар талвңд әмтн агродиктант бичҗәнә. Келхәс, орн-нутгин регионмудт эврә өвәрц талвңгуд бүрдәгдв. Үлгүрлхд, Москва балһснд К.А.Тимирязевин нертә селәнә эдл-ахун академьд болн агроэкологин халхар номин шинҗллт кедг «Экорганикс» нертә бүрдәцд агродиктант бичҗ болна. Москван мүҗин Истринск района Дубровское селәнд ээзгә кеҗ һарһдг цехд бас ирлцңгү талвң бүрдәгдсн болдг. Краснодарск крайд болхла П.Лукьяненкон нертә «Кубань» келн-улсин төвд әмтн диктант бичв. Тиим кевәр орн-нутгин талдан регионмудт соньн олн ормст Агродиктант давулгдҗана.

Җил болһн хулһн сарин хойрдгч долан хонгин нарн өдрлә мана орн-нутгт селәнә эдл-ахун халхар көдлдг улсиг темдглдг авъяста. Эн өдрт мал өсклһнә, тәрә тәрлһнә, эдл-ууш кеҗ һарһдг болн АПК-ан халхар көдлдг мергҗлтнриг йөрәҗ, ач-тусинь хәрүлдг йоста.

Аһш балһснд Машковин нертә музейд хальмг зурач Шинян Николайин һәәхүл бүрдәгдсн билә. «Теегтән нерәдсн частр» гидг һәәхүлиг Аһш балһсна әмтн болн ирсн гиичнр соньмсч хәләсмн.

Шидр Краснодар балһснд болсн Өмн үзгин округин «Келн-улсин бахмҗ - 2025» нертә мөрән лауреатнрин нерд заагдв. Әрәсән келн-улсин Ассамблейин һардач, Әрәсән Баатр Александр Даркович керг-үүлдвриг секв. Орн-нутгин Хүүвд «Негдсн Әрәсә» партин әңгин һардач, Әрәсән келн-улсин Ассамблейин ахлач Владимир Васильевин нерн деерәс йөрәлин үг эн олнд соңсулв.

Ик Буурла района бәәрн күүкд күн талын орна элчиг көдлмшт авад, зөв-йос эвдв. Бүтәгдсн кергин ашт 400 миңһн арслңга ялд энүг уңһав. Приставмудын заллтын көдләч күүкд күүнд ялын тускар зәңглсн бийнь күүкд күн өрән даңцах седклән медүлсн уга бәәҗ. Терүнә дару орн-нутгасн һардг энүнә зөвинь хасад җалвинь бәрәнд авв.

Шидр Хальмг Таңһчин приставмудын заллтын баахн мергҗлт Мукөвүнә Мингиян шинкн һарсн нилхд цусан өгәд әминь аврв.

Чонкуша Петрин нер зүүҗәдг Элстин билг-эрдмин колледж 65 җилә өөнән темдглҗәнә. Хальмгин сойлын җирһлд ик тәвцән орулҗадг, улсин билг-эрдм делгрүллһнд, сойлын халхин мергҗлтнр белдлһнд эн сурһуль ик чинр зүүҗәнә. Энд билг-эрдмин медрл авсн, сойлын көдлмшин хаалһд орсн олн күн таңһчин болн орн-нутгин нертә дуучнр, биичнр, зурачнр, сойлын нань чигн халхин үүлдәчнр болҗ, эн сурһулин нериг өөдән өргҗ дуудулҗана.