Хальмг АССР-ин сойлын ачта көдләч, СССР-ин болн Хальмгин бичәчнрин ниицәсин гешүн, нертә бичәч болн шүлгч Куукан Анатоль эн җилин така сарин 25-д 100 насна өөнән темдглх бәәсмн.

Шидр Ростов-на-Дону балһснд Әрәсән Өмн үзгин Парламентск Ассоциацин (ЮРПА) дарани хург болв. Хальмг Таңһчин Улсин Хуралын (Парламентин) Ахлач Артем Михайлов һардсн делегацин ханьд энүнә дарукс Бадмин Вячеслав, Нуура Николай, депутатнр Болдра Валерий, Җаңган Чимид, Никитинә Айс, Кокан Михаил, Саңһҗин Лаг, Цекрә Зулта болн Эрднин Гилән орв. Хойр өдрин эргцд Әрәсән Өмн үзгин регионмудын зака үүдәгч бүрдәцсин элчнр олн зүсн керг-үүлдвр, харһлтс давулҗ, чинртә төрмүдәр өргн күүндвр кев.

Хальмг улс Әрәсән ханьд эврә сән дурар орсна 415 җилин өөнд нерәдәд, Москва балһснд Джангариад болв. Эн марһан тавдгч дәкҗ хотл балһснд давулгдҗана, терүнд орлцачнр бүс бәрлдҗ бөк бәрлдв, саадгар хав, цалм хайв, футбол, волейбол, армрестлинг, ширә деер нааддг теннис, шатр, шаһа наадад, хамгин чидлтәһинь болн эвтәһинь йилһҗ авв. Өрк-бүмүд дунд «Эцк, эк болн би – спортивн өрк-бүл» гидг марһан болв.

Шидр Хальмг Таңһчин залврин Ахлачин дарукин – таңһчин социальн делгрлтин, күч-көлснә болн көдлмшәр тетклһнә министрин үүл дааҗадг Өлзәтин Маринан һардврт социальн болн күч-көлснә хәрлцәнә һурвн халхин комиссин сүүр болв.

Хальмг Таңһчин Улсин Хуралын (Парламентин) Ахлачин даалһврар депутат Эльдән Виктор зарһин-медицинск шинҗллтин таңһчин бюрон 65 җилин өөнд нерәдгдсн байрин хургт орлцв. Таңһчин зака үүдәгч бүрдәцин болн эврәннь нерн деерәс СМЭ-н цергллтин көдләчнриг йөрәһәд, дааврта болн нәрн көдлмштнь күцәмҗ дурдв.

Хөрн тавн җил болад, эцкән үзв.
«Төрскн теегм, чамаһан үзхнь...…»
Эңкрлдгнь олн болв чигн эклә әдл болхш.

Хулһн сарин 15-д нарт-делкәд нүднә харань муурсн әмтнә өдр темдглгднә. Түрүн болҗ эн өдриг 1970 җилд «Тесвр, әдл зөв, ниицлт» гидг дуудвртаһар темдглдг болсмн. Әрәсән сохр әмтнә олна ниицән 1987 җиләс авн эн өдрт нерәдгдсн керг-үүлдврмүд давулдг болв. Эн өдр эрмдгтә улсин төлә олн зүсн марһа, харһлт, билг-эрдмин наадм бүрдәсн деерән олн-әмтн эднә төрмүдәр соньмсҗ, дөң-тусан күргҗ, тесвртә болхиг дәкәд нег медүлх күсл тәвгднә.

Шидр Хальмг Таңһчин Толһач Хаска Бату социальн бүрдәцс тосхлһна халхар селвлцә давулв.

Таңһчин Толһач Хаска Бату Әрәсән Төв банкин Өмн үзгин заллтын һардач Евгений Эберенцла болн Хальмгин Келн-улсин банкин әңгин һардач Аслан Медалиевла харһв.

Ноха сарин 21-д, Элстин нег уульнцин хаалһд зеткртә йовдл учрв. Терүнә йовудт насни дигт күрәд уга көвүн шавтв. Зөв-йос эвдсн җолач ормаснь зулв. Тер дарунь гилтә тиигәрән ГАИ-н көдләчнр ирәд, орминь шинҗләд, зуг тенд видеобүртклһн уга болад, маши залад, көвү дәврсн күүг олҗ чадсн уга. Зеткртә йовдл учрад, хойр час давсн хөөн полицин көдләчнр тал генткн йистә көвүн өөрдҗ ирәд, җолачин чирә-зүсинь, машинә тойгинь, цугинь яһҗ болсинь цәәлһҗ келҗ өгв. Терүнә ашт көвүнә зәңглсәр, зеткртә йовдлыг 59-тә бәәрн күн учраснь илдкгдв. Зөв-йос эвдсн күн дарунь олгдад, цааҗла харһулгдв. Полицин көдләчнрт нөкд болсн Очр-Һәрән Җирһлин нерн олнд медгдв.