Социальн бүрдәцс тосхлһна төрәр шидр таңһчин Толһач Хаска Батун һардврт селвлцән болв. Өөрхн җилмүдт тосхгдх болн босхгдҗадг олн бәәрнә төр терүнд хаһлгдв. Цуг көдлмш зураһар күцәгдҗ, онц кевәр бүрткгдҗәдг болв.

Шидр таңһчин Толһач Хаска Бату Моңһлын Улан Баатр хотл балһснд «Газпромбанкин» элчллтиг һардҗадг Күкән Нарнд Хальмгин улсин эдл-ахун ачта көдләчин нер зүүлһв.

Эн долан хонгт Элст балһснд Әрәсән күүкд улсин ниицәнә Хальмг Таңһчд үүлддг әңгин седвәрәр «Мана ниицлтд - Әрәсән күчн» гиҗ нерәдгдсн регионмуд хоорндк ик хург болв. Хальмг Таңһчин, Әәдрхнә, Аһшин болн Ростовин мүҗсин, Карачаево-Черкесин болн Луганск Улсин Республикин Антрацит балһсна күүкд улсин олна ниицәнә элчнр терүнд орлцв.

Шидр партин олна дөңнлтин штабд «Медрл» гидг Әрәсән ниицәнә «Медрл.Гегәрлт» төсвин йовудт соньн харһлт болв. Тууҗин номин кандидат, Элст балһсна толһачин дарук, «Медрл. Лектор-2025» марһана ашлгч девсңд орлцач Довгопола Дмитрий олна ниицәнә лектормудын төлә лекц умшв. Оютнр, Хальмг ик сурһулин багшнр болн сурһуль-эрдмин бүрдәцсин һардачнр харһлтд орлцад, «Пушкин болн хальмгуд» гидг төрәр болсн лекц соңсад, Элст балһснд шинрүлгдсн Пушкинә бумблв босхлһна тускар медҗ авв.

Шидр Лагань балһснд олна дөңнлтин штабин ул деер «Эцкнрин хүүв» олна бүрдәц үүлдврән эклв. Седвәртә эцкнр цуглрад, иим хүүв бүрдәхәр шиидв. Лаганя района һардвр эдниг дөңнв.

Шидр мана таңһчд Әрәсән күүкд улсин ниицәнә әңгүдин ик хург болв. Маднла хам-хоша бәәдг регионмудас ирсн гиичнр дунд Карачаево-Черкесин делегац бас билә. «Ногай давысы» газетин ах редактор-һардач Алтынай Атуова, «Черкес хэку» газетин ах редактор-һардач Люсана Абидокова болн «Солң» гидг бичкдүдин седкүлин ах редактор Мадина Асланукова делегацин ханьд ирсн болдг. Эдн мана таңһчд һурвн өдртән бәәһәд, хальмг улсин сойлла таньлдҗ, хальмг тег һәәхч цаган сергмҗтәһәр давулв. Хәрхиннь өмн гиичнр «Калмыкия» зәңгллһнә агентствд ирәд, хальмг барин көдләчнрлә харһад, эврәннь һарцсин тускар келҗ өгв.

2007 җиләс авн мөрн сарин 20-д мана орн-нутгт донормудын Келн-улсин Өдр темдглнә.

Одахн Целинн района Овата селәнд одхларн Бадмин Церн медәтлә таньлдад, хальмг кел хадһллһна болн делгрүллһнә кергт туслҗахинь медүв. Церн Гаряевич селәнә эдл-ахун халхд олн җилдән көдләд, ода ачта амрлһнд бәәнә. Тавн җил хооран хальмг кел даслһна баг бүрдәһәд, ниигмин сүлҗәнә эв-арһар төрскнч седклтә улсиг хамцулад, хальмг кел даслһна керг бүтәв.

«Әрәсән улсин алдр дуулврмуд» гидг төсвин йовудт мана «Җаңһрла» орн-нутгин хотл балһсна улс таньлдв.
Келн-улсин Москван Герт бүрдәгдсн VIII хургин йовудт «Җаңһрин» тускар күүндвр болв. Хальмг улсин урн үгин алтн зөөр болҗадг «Җаңһр» эн байрт орлцсн цуг улсин оньг йосндан авлв.

Давсн долан хонгт Хальмг Таңһчд соньн олн йовдлмуд болв. Тер тоод Хальмгт автономь тогталһнд ик ач-тусан күргсн йосна болн олна үүлдәч, бичәч Амр-Санана Антона нернлә залһлдата хойр йовдл учрв. Эн олна үүлдәчин тускар седкүлч болн бичәч Увшин Вячеслав дегтр бичв. Дегтр барас һарсн кемлә Хальмгт Амр-Санана Антона зе күүкн Татьяна Соколовская авальтаһан ирснь темдгтә болв.