Мөчн сарин 12-т Хальмг Таңһчин әмтн цуг орн-нутгла хамдан Әрәсән Өдриг темдглв. Элст балһснд болн таңһчин цуг райодар байрин керг-үүлдврмүд өргмҗтәһәр давв.

[b]Шидр Элстд Хальмг ик сурһулин седкүлчнрин әңгин оютнрт мөрәс бәрүлҗ өггдв. Таңһчин олна үүлдәчнр болн арһлачнр эн мөрәсиг эврә нерн деерәс буйнч седклин залмҗар үүдәв. Йилһән сәәнәр сурдг, олна үүлдврт шунмһаһар орлцдг оютнр тиим кевәр мөрәлгдҗәнә. Байрин керг-үүлдвриг эднә багш, Хальмг келнә болн дорд үзгин кел шинҗллһнә күрәлңгин утх-зокъялын болн седкүлчнрин эрдмин тиңкмин һардач, профессор Дәкин Раиса һардҗ, оютнрин тускар тодрхаһар келҗ өгв

Одахн Хальмг ик сурһульд цергә шишлң керг-үүлдврин ветеранмудын төлә «Баатрмуд-08» төсвин ирлцңгү көтлврин кичәлмүд төгсв. Залврин халхар кесг төр эдн багшнртаһан хамдан шинҗләд шин медрл авв.
Хальмг ик сурһулин багшнр, таңһчин зака үүдәгч болн күцәгч йосна бүрдәцсин һардачнр болн көдләчнр шинҗләчнрин комиссин ханьд орв.
Президентин академин ВШГУ-н көтлврин һардач Надежда Кононенко коллективиг һардлһна эв-арһиг, нүүрләчнрин авциг яһҗ делгрүлхин тускар лекцс умшсна ашт хоршасн шин медрлнь нег үлү кен-негнднь туста болсинь заахмн.

Москвад мөчн сарин 10-ас авн 14 күртл зуульчллһна хург ик күцәмҗтәһәр давв. «Зуульчлый!» гиҗ нерәдгдсн нарт-делкән хург ВДНХ-д болснь чинртә. Эн керг-үүлдвр Әрәсән улсин ниицлтин җилд нерәдгдв.
Әрәсәлә нөкцҗ үүлддг нутгудын шинҗләчнр, арһлачнр, нань чигн үүлдәчнр зурһадгч кемдән болсн эн ик цуглранд орлцв. Әрәсән зуульчллһна халхд эн керг-үүлдвр ик чинр зүүҗәнә.

Элстин 25-ч бичкдүдин садын сурһмҗлач Шарманҗин Эллада шалтгта улсин «Абилимпикс» марһана ЮФО-н девсңд диилвр бәрәд ода Әрәсән дөрлдәнд белдҗәнә .

Ниш нертә сербск балһснд ах-дү болсн балһсдын түрүн наадм өргмҗтә бәәдлд давв. Улсин хоорндк сойлын залһлда батллһнд нилчән күргх эн наадм орн-нутгуд нөкцҗ үүлдлһнә талвң болх гисн күслтәһәр кегдсн мөн.

Н. Пальмовин нертә Келн-улсин музей Санкт-Петербургд болсн аһу ик кемҗәтә һәәхүлд орлцв. «Константин и Владимир Маковские. Любовь земная и небесная» гиҗ тер ик төсв нерәдгднә.

Нижний Новгород балһснд дегтрин саңгудын соньн нег төсв экләд үүлдв. «Иньгллтин утх-зокъялын тагт» гиҗ тер төсв нерәдгднә. В. Жуковскийин нертә бичкдүдин дегтрин саң эн седвәр татсмн. Әрәсән улсин ниицлтин җилд эн соньн төсв нерәдгдҗәнә.

Тууҗд орсн Ялтинск хургт болсн Ливадийск бәәшңд «Модные Агоны» гидг нертәһәр өдгә цага хувцна ик кемҗәтә наадм-хәләвр шидр давв. Шин кев-янзта хувц кеҗ һарһдг эрдмчнр цуг орн-нутгас цуглрҗ ирв. Манҗин Аркадин нертә Хальмг филармоня медлд үүлддг хальмг хувцна театрин художественн һардач Татьяна Милованова чинртә эн керг-үүлдврт орлцв.

Мөчн сарин 12-т мана орн-нутгт хамгин чинртә байр – Әрәсән Өдр темдглнә. Һучн дөрвн җилдән эн сән Өдр орн-нутгт бәәдг олн келн-улсиг хамцулҗ, мана тугин, сүлдин болн частрин чинр олнд медүлҗ өөдлүлнә.