Хальмг Таңһчин һардвр Әрәсән кесг регионмудла экономикин делгрлтд туслх нөкцлтин бооцас батлҗана. Одахн Санкт-Петербург балһснд болсн экономикин нарт-делкән ик хургин йовудт Хальмгин залврин Ахлач Босхмҗин Гилән Тульск мүҗин губернаторин түрүн дарук – залврин Ахлач Михаил Пантелеевла харһад, экономикин, зуульчллһна, спортын, сурһуль-эрдмин болн талдан халхсар нөкцлтхәр күүндсн билә.

Мөчн сарин 9-д Элстдү«Негдсн Әрәсә» партин Хальмг Таңһчин әңгин хург болв. Энүг нүр үгәр таңһчин Толһач, партин таңһчин әңгин сегләтр Хаска Бату секв. «Мана партин гешүд урдк кевәр таңһчин делгрлтин төлә цуцрлтан угаһар көдлҗ, әмтнә бәәдл-җирһл ясрулҗ, эврә зурасан теднә некврлә ирлцүлҗ үүлдх гиҗ Бату Сергеевич темдглв.

Хальмг Таңһчин Улсин Хуралын (Парламентин) депутат, «Делгрлтин күчн» җисәнә һардач Михаил Богатов дарани харһлт давулад, таңһчин экономик делгрүллһнә туст ямаран төрмүд эркн чинртә болҗахин тускар күүндв. Хальмг Таңһчин Олна палатын гешүд эн харһлтд орлцад, босхгдсн төрмүдәр ухан-тоолврарн хувалцҗ сүв-селвгән орулв. Келхд, күүндвр харһлтын эклцәс авн керг-төрин бәәдлд давулгдсинь темдглхмн.

Әрәсән Баатр, батальона һардачин дарук, ах лейтенант Очр-Һәрән Нарн цергә даалһвран күцәҗ йовад әмнәсн хаһцсна туск һашута зәңг таңһчин олн-әмтиг үүмүләд, күн болһнд ик зовлң үүдәв. Хальмг Таңһчин Олна палатын седвәрәр Советин Союзин Баатр Басан Городовиковин бумбин өөр Нарн Алексеевичин зург тәвгдсн билә. Эн өдрмүдт таңһчин әмтн нааран ирәд, цецгүд тәвәд, зул өргәд, Әрәсән Баатрин санл тевчҗәнә. Эн күнд цагла таңһчин улс Әрәсән Баатрин өрк-бүлиг дөңнҗ, зовлңгинь хувалцҗана.

Шидр Элстд социальн көдләчин Өдрт нерәдгдсн байрин хург болв. Әмтнә социальн харслтын болн көдлмшәр тетклһнә бүрдәцсин, медәтнрин болн гемтә-шалтгта улсин гер-интернатмудын көдләчнр, эн халхд олн җилдән көдлҗ йовсн ветеранмуд байрин хургт цуглрв. ЮФО-д Әрәсән Президентин күцц зөвтә элчллтин аппаратын Хальмг Таңһчд ах федеральн инспектор Александр Беляев, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлачин негдгч дарук – таңһчин финансин министр Шурһчин Очр, таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина социальн көдләчнриг йөрәһәд, өөдән ачлврмуд бәрүлҗ өгв.

Ода таңһчин сурһульмудт эсвин, физикин, һазадын келнә болн нань чигн кичәлин багшнр күртҗәхш, селәдт бәәтхә, хотл балһснд чигн тиим йовдл учрна. Терүг уурулхин төлә Хальмг ик сурһульд «Багшнрин академий» гидг төсв экләд күцәгдҗәнә, багш болх оютнрин төлә сән таалта көдлмшин көтлвр бүрдәгдв.

Көтчнрә района ах үйин улс күч-көлснә ветеран, медәт Мудункан Иваниг сәәнәр меднә. Олн җилдән эн Көтчнрә района бүрдәцст көдләд, залһлдана әңгин һардачин үүл дааһад, ачта амрлһндан һарсн болдг. Мөчн сарин 12-т Иван Дорджиевич 90 җилин өөнән темдглхмн.

Нижний Новгород балһснд шидр Нарт-делкән телекинон V хург көдлмшән төгсәв. «Новая реальность - 2026» гиҗ нерәдгдсн эн аһу ик кемҗәтә керг-үүлдвриг Әрәсән седкүлчнрин Ниицән бүрдәсмн. Әрәсән телекинон хургин лауреатнр дунд хальмг седкүлч Мукөвүнә Цаһана көдлмш темдглгдв.

Санкт-Петербург балһснд 2026-ч җилин экономикин нарт-делкән XXIX ик хург болв. Эн чинртә керг-үүлдвр 1997 җиләс авн давулгдҗана.
Эн җил делкән хургт 130 һар орн-нутгас ут тоодан 20 миңһн һар күн ирҗ орлцв. Күндтә гиич болад Саудовская Аравия орн-нутгин элчнр ирв, тер юңгад гихлә 2026 җилд Әрәсә эднлә дипломатин хәрлцә батлгдснас авн дигтә зун җил болв. Дөрвн өдртән болсн хургин йовудт олн зүсн төрмүдәр чинртә 150 харһлт болн сүүр давулгдв.

Әрәсән Баатр Очр-Һәрән Нарн цергә шишлң керг-үүлдвр эклснәс авн зөрмг кевәр дәәлдҗ, Соледар, Северск болн нань чигн балһсд-селәдт болсн ик дәәлдәнд залу-зөрмгән үзүлсмн. Эгл җолач болҗ цергә хаалһан экләд, батальона һардачин дарук болад, хамдан дәәлдҗ йовсн үүрмүдтән нүдн-амн болҗ цергә даалһвран күцәҗ йовсмн. Нидн Северск балһс сулдхлһнд Нарн Алексеевичин һардврт мана дәәчнр залу-зөрмгән үзүләд, хортна өмнәс дәврәд, дәәлдснә тускар эн Әрәсән Президент Владимир Путинд тооцаһан өгсиг бидн цуһар соңсад, нег һазра баатр бахмҗ үүдәлә.