Одахн Элстд «Медрл» ниицәнә седвәрәр «Негдсн Әрәсә» партин штабд баһчудын төлә кичәл болв. Әрәсән шаңһа көдләчин өдрт нерәдсн кичәлиг ниицәнә илдкәч, Хальмг Таңһчин залврин Ахлачин дарук, таңһчин то-дигин делгрлтин министр Этән Алексей давулв.

Хальмг ик сурһулин багшнр болн оютнр олн әмтнд туста кесг төсв болн керг-үүлдвр күцәнә. Тер тоод «Элстин бичкн театр» («Малый элистинский театр») төсвиг хальмг һоллгч вузин «Гармония» гидг психологин төвин көдләчнр болн оютнр бәәдл-җирһлд тохраҗана. Бичкдүдин болн арвтнрин төлә бүрдәсн керг-үүлдврт орлцачнрин түрүн харһлт «Төрскән харсачнр» таңһчин саңд болв. Түүнд уйн наста наадачнр, теднә экнр, таңһчин саңгин һардвр, багшнрин сурһуль-эрдмин дацңгин һардач, педагог номин кандидат Очра Ирина, психологин төвин һардач Бардан Нина болн волонтермудын «Цаһан седкл» клубин гешүд орлцҗ күүндвр кев.

Н. Пальмовин нертә Келн-улсин музейд дарани һәәхүл секгдв. Тернь зурач Ванькан Валентинан түрүн ик һәәхүл болҗана. Туула сарин 23–д энд цуглрсн улс зурачин зургудла таньлдв.

Шидр Москвад Sistema Gallery гидг галерейд секгдсн һәәхүл энд тәвгдсн зургуд нәрн болн соньн олн төрәр зургдснь олн хәләһәчнрин оньг авлв. Сойлын халхин залһлдана келн-улсин хоорндк хәрлцәнә ашт үүдсн тоот зурачин зургудт һол орман олсмн. Амр биш эн цагт олн келн-улс хамдан бәәдг ик нутгт учрдг тоот зурачин оньгт тусснь соньмслт үүдәнә. Цуг эн төрмүд мадниг чигн үүмүлҗәнә.

Цугәрәсән социальн-чинртә марһана хальмг региональн девсңгин шүүврин комиссь көдлмшән эклҗәнә. «Языковая арт-резиденция. Музыка слова» гидг марһанд орлцх саната улст үрвр кегдҗәнә.

Найн хойр җил хооран туула сарин 27-д Төрскән харсгч Алдр дәәнә цагин хамгин әәмшгтә, күчр йовдлмудын негнь Ленинград балһсна бүслвриг сулдхсн өдр болв. Тер өдр 1944 җилд 872 өдртән бүслврт бәәсн әмтн сулдхгдв. Йисн зун шаху өдртән тиим догшн йовдлыг дааҗ һарсн Ленинград делкән тууҗд тиим ор һанцхн балһсн болна.

Лу сарин 4-д цуг нарт-делкәд гүлгн гемәс хөрлһнә Өдр темдглнә. Эн өдр Элстд Манҗин Аркадин нертә шаңһа филармоньд «Мини дала» нертә концерт болхмн. Буйнч седклин керг-үүлдвр давуллһна седвәриг Цевгә Төлән нертә шаңһа хорин артист Александр Ванькаев татад, терүнә йовудт цуглулсн мөңгиг гүлгн гемтә улст дөң күрглһнд олзлхар шиидв.

Б.Б.Городовиковин нертә Хальмг ик сурһульд оютнрин Өдрт нерәдҗ олн зүсн керг-үүлдвр бүрдәгдв. Хальмг кел шинҗллһнә болн дорд үзгин ик сурһулин шинрүлгдсн бәәрнд оютнрин төлә ончта нәр болв. Ке-сәәхн хувцан өмссн оютнр билг-эрдмән үзүләд, сергмҗтәһәр амрв.

Наталья Верговская бәәрн залврин бүрдәцст 2008 җиләс авн көдлҗәнә. Түрүләд эн Целинн района Овата селәнә муниципальн бүрдәцин һардврт нүүрлгч мергҗлт болҗ көдлҗәсн билә, сүл долан җилин эргцд Наталья Руслановна СМО-н толһачин үүл дааҗана. Нег һазра улс энүг дөңнҗ, селәнә делгрлтин төлә күцәҗәдг көдлмшинь өөдәнәр үнлнә.

Өвкнрин кезәнк авъясмудас кесгнь өдгә цагла ирлцнә. «Авгин сурсн авъяс әмн һартл мартгддго», – гиҗ мана көгшд келдг билә. Бичкндән дассн заң-авъяс бат болн удан бәәдгин тускар энүнд келгдҗәнә. «Авгин сурсн авъяс» гисн баһ настаһасн авн эклҗ дассн сурһмҗ гиҗ келх кергтә. Түрүн экнәснь авн авсн заң күүнә цееҗд тер батар тодлгддг төләднь үлгүрт орҗ «авгин сурсн сурһуль әмн һартл мартгддго» гиҗ келгдҗәнә. Үлгүрлхд, өрүн босад өркән хәрүлхләрн зөв эргҗ хәрүлдг. Гертәсн һарад йовхларн һулмтан зөв эргҗ һарад, одсн гертән зөв эргҗ буудг. Ирсн гиичд идәни дееҗ, цә өгхләрн ааһднь зөв эргүлҗ кедг. Ямр чигн хувцна зөрүлвр зөв эргцтә. Зөв эргүллһн мөңк шар нарна эргц дахҗ йовх авъяс болҗана. Модна халхин урч, төмрин халх урч, үүл бәрлһнә (юм уйдг, хатхмр, һос уйдг) урч гиҗ келгднә. Энүнә туск медрлиг (сурһулиг) баһасн авн сурҗ, медҗ авхла, эн хамг эн товчта үглә: «авгин сурсн авъяс әмн һартл мартгддго» залһлдата болдмн гиҗ келх кергтә.