Одахн МЧС-ин заллтын элчнр Элстин 20-ч тойгта дунд сурһульд сурчадг һурвн күүкиг ачлв.

Давсн үлмҗ өдр «Калмыкия» РИА-н барин төвд орс сойлын ик хургт нерәдсн брифинг болв.

Алдр Диилврин сән Өдрлә Үстин района Харба селәнә дунд сурһульд «Баатрмудын ширә» секлһнә керг-үүлдвр болв. Хамдан сурһуль сурч йовсн Мөңкән Владимир болн Лиҗин Саңһҗ цергә шишлң керг-үүлдврт орлцад, залу-зөрмгән үзүләд, баһ-дүүвр насндан әмнәсн хаһцв. Эдниг сурһҗ йовсн багшнрин, хамдан сурч йовсн үүрмүдин болн эндрк сурһульчнрин седвәрәр Төрскән харсачнрин санл мөңкрүлхин төлә ирлцңгү керг-үүлдвр бүрдәгдсн мөн.
Харба селәнә дунд сурһулин һардач Шуркчин Марина харһлтыг нүр үгәр секәд, цергә шишлң керг-үүлдврт орлцачнрин санлд нерәдҗ «Баатрмудын ширә» Алдр Диилврин Өдрлә секгдҗәхнь хойр дам ончта болҗахиг темдглв. Эднә нертә ширән ард сурһулян сәәнәр сурдг, олна бәәдл-җирһлд орлцдг сурһульчнр суудг зөвтә болхмн. Бичкн селәнд өсәд-боссн, мана дунд сурһульд сурч йовсн хальмг көвүд зөрмг өвкнриннь үлгүрәр Төрскән харсад, цергә даалһвран үнн-чик кевәр күцәснь маднд ик бахмҗ үүдәнә гиҗ Марина Гавриловна келв.

Яшкулин района Хулхт селәнә эргнд Төрскән харсгч Алдр дәәнә йовудт 1942 җилин үкр сард 28-ч Әәрмин дәәчнр догшн дәәлдәнд орлцҗ, хортна дәврлһиг зогсаҗ эн һазрас Хальмг Таңһчан немшнрәс эклҗ сулдхсмн. Тер өршәңгү уга бәәр бәрлдәнә тускар Хулхтын шидрк Төрскнә төлә әмән өгсн баатрмудын санлын бумб тодлулҗана.

Хальмг Таңһчин социальн делгрлтин, күч-көлснә болн көдлмшәр тетклһнә министерств мал асрҗадг олн үртә өрк-бүлмүд дунд марһа давулҗ эдниг урмдулна. Нидн терүнд эврә эдл-аху бәрдг өрк-бүлмүд дунд Лаганя района Красинский селәнд бәәдг олн үртә Руслан болн Байирта Лагаевихн (зургт) диилвр бәрсн билә. Нег һазра улс, үр-иньгүднь болн элгн-саднь эдниг марһана йовудт дөңнәд, дууһан өгәд диилвр бәрснднь байрлв.

Эн җил дунд сурһулян төгсәҗәдг сурһульчнр шаңһа шүүврән шин зокалар өгхмн, шүүвр өглһнә дааврта кем мөчн сарин 1-әс авн эклх. Ямр нег учрар болзгаснь урд шүүврән моһа сарин 20-әс авн өгч болхмн билә. Тиим кевәр багшнр болн сурһульчнр сурһулин җилән мөчн сарин 1 күртл дигтә-даратаһар төгсәх цаг бәәнә. Ик сурһульд орхин төлә хамгин баһ гисн баллын кемҗән бас сольгдв. Үлгүрнь, физикәр 41 балл (урднь - 39) авх кергтә бәәсмн, зәңгллһәр - 46 (44), тууҗар – 40 (36), һазадын келәр – 40 (30), химийәр - 40 (39), биологийәр - 40 (39) балл эрк биш хоршах кергтә болҗана.

Җил болһн хөн сарин һурвдгч бембә өдрлә скандинавск йовлһна Өдр болна. Эн керг-үүлдвр мана таңһчд бас сән авъяст тохрв гиҗ келҗ болҗана. Таңһчин әмтнә социальн теткврин төвин көдләчнр болн эднә хәләврт бәәдг медәтнр эн сән Өдрт нерәдҗ олн зүсн керг-үүлдвр бүрдәнә.

Җил болһн хөн сард Хальмгин Келн - улсин музейд болдг керг-үүлдвриг мел тиигҗ нерәдҗ болхмн. «Музеймүдин сө - 2026» гидг байрин керг-үүлдвр «Өөрхн улс» гидг нерәдлһтәһәр давв. Иигәд хөн сарин 16-д таңһчд бәәдг олн келн-улсин элчнр музейд цуглрҗ ирв. Цуг Әрәсәд давулгдҗадг «Музеймүдин сө» гидг ик байран Хальмгин музей Әрәсән келн-улсин ниицлтин җилд нерәдв.

Ар үзгин Осеть-Алания Республикин Владикавказ балһснд бииһин коллективсин марһан болв. «Созвездие талантов» гидг тер марһанд Хальмг Таңһчас. «Нарна Толян» гидг бичкдүдин бииһин коллектив орлцв. Приютна районд энүг әмтн сән меднә.

Эн җил Әрәсә Китд орн-нутгла иньгллтин болн нөкцлтин бооца батлгдснас авн дигтә 25 җил болв. РФ-н Президент Владимир Путинә темдглсәр, эн җилмүдин эргцд Әрәсән-Китдын хоорндк залһлдан улм батрад, сән йовудтаһар делгрҗ йовна. Китдын Толһач Си Цзиньпинә үрврәр мана орн-нутгин Толһач Владимир Путин хөн сарин 19-д Китд орн-нутгт одв. Әрәсән Залврин Ахлачин тавн дарук, Президентин һардврин болн бизнесин элчнр, арһлачнр болн орн-нутгин регионмудын Толһачнр делегацин ханьд орсмн. Йосна гиичллһнә йовудт 40 шаху бооцан батлгдв.