Урҗ өдр Хальмг Таңһчин залврин сүүрин бәәрнд 2023 җилд таңһчин хазна күцәлһнә ашлврт нерәдгдсн ил соңсхвр болв. Хальмг Таңһчин залврин Ахлачин негдгч дарук–таңһчин хазна министр Шурһчин Очр тооцаһан өгч, нидн таңһчин хазна оруһин болн һаруһин әңгүд ямр кевәр күцәгдсиг, ямаран керг-үүлдврмүдт кедү мөңгн һарһгдсиг, таңһчин шаңһа өрнә кемҗә баһруллһнд кедү мөңгн һарһгдсиг тодрхаһар келҗ өгв. Хальмг Таңһчин Улсин Хуралын (Парламентин) депутатнр, күцәгч йосна болн муниципальн бүрдәцсин, олна ниицәсин элчнр ил соңсхврт орлцв. Сүүриг «Калмыкия» таңһчин зәңгллһнә агентствин һардач Марила Хоңһр һардҗ давулв.

Одахн мана таңһчд Әрәсән Өмн үзгин парламентск ассоциацин (ЮРПА) дарани сүүр болсн билә. Терүнд орлцхар арвн хойр региона зака үүдәгч бүрдәцсин зу һар элч ирсмн. Сүүрин йовудт эдн зака үүдәгч халхар күцәҗәх дамшлтарн хувалцҗ, чинртә кесг төрәр селвлцҗ шиидвр батлв. Күндтә гиичнр дунд Ар Осеть-Алань Республикин парламентин Ахлач Таймураз Тускаев йовла. Элст балһснд дарани сүүр болснд гиич хойр дам байрта бәәсмн, юңгад гихлә энүнә эк-эцкнь Хальмг Таңһчд күч-көлснә хаалһан эклсмн.

Шидр Хальмг Таңһчин Улсин Хуралын (Парламентин) Ахлач Артем Михайлов «Шин улс» партин әңгин һардач Гаджи Фероянла харһҗ күүндв. Харһлтын йовудт удл уга болх сессьт хәләгдх төрмүдин тускар күүндәд, кех-күцәх көдлмшин һол зөрүллтс темдглв. Одахн мана таңһчд болсн ЮРПА-н сүүрт Хальмг Таңһчин Улсин Хуралын депутатнрин седвәрәр орулгдсн закана төсвс сессьт бас хәләгдхмн гиҗ харһлтд орлцачнр келв.

Хальмг Таңһчин Улсин Хуралын (Парламентин) депутат Хачира Борис шишлң цергә керг-үүлдврт орлцачнрт дөңгән күргҗ, эднә төрмүдт шунмһа кевәр орлцна. Шидр эн цергә даалһвран күцәҗ йовдг нег һазра улст золһад ирв. Туршулчнрин багмудыг һардҗадг хальмг цергчнр энүнлә харһхар Часов Яр болн Бахмут балһсдын өөр шидрәс ирв. Мана хальмг залус зөрмг кевәр дәәлдҗ йовхнь энүнд ик бахмҗ үүдәв.

Давсн басң өдрлә, моһа сарин 24-д Элстд Хальмг ик сурһульд темдгтә йовдл болв. Таңһчин һоллгч вузин Бичкдүдин ик сурһулин төгсәһәчнриг энд тоов. 11-ч классан төгсәҗәх 75 арвт нааран ирв. Эднәс икнкнь 8-ч классас авн физик, эсв, химий, биологий, англь кел, тууҗ, обществознань хальмг вузин багшнрин һардврт гүүнәр дасҗ сән медрл авв, ЕГЭ-н шүүврт чигн эднә һардврт белдв.

Манҗин Аркадин нертә Хальмг филармонь «Үүдәгч селгән. Җилин дөрвн цаг» гидг төсвиг күцәҗәнә. Үвлд, хаврт нерәдсн төсвсән күцәснә хөөн зуни төсвин тускар келҗ өгхәр филармоня үүдәгч баг «Калмыкия» РИА-д ирҗ, брифингд орлцв.

Хөн сарин 26-д телеүзлин I каналд «Мана улсин җирһл. Хальмг Таңһч.» гидг соңсхвр үзүлгдв. Седкүлч Евгений Кривцов (зургт) Хальмг Таңһчд үзсн-соңссн тоотын тускар келҗ өгсинь Әрәсән олн-әмтн хәләв.

Хальмг Таңһчин Толһач Хаска Бату Узбекистана Бухарск мүҗин хоким (губернатор) Ботир Зариповла харһв.

Таңһчин Толһач Хаска Бату Әрәсән тосхлтын министр Ирек Файзуллинлә харһҗ күүндв.

Урҗ өдр Элст балһсна Хургин дарани биш сүүр болв. Терүнд Хальмг Таңһчин Толһач Хаска Бату, таңһчин Толһачин һардврин һардачин үүл дааҗадг Кирилл Попов, Элст балһсна һардврин толһач Тепшинә Шафран, депутатнр орлцв. Сүүрт зуг нег төр хәләгдв, эннь Орзан Николай Элст балһсна Хургин Ахлачин үүләс цаг-болзгасн урд һарв.