Әрәсән ханьд орсн Донбассин һазрт болҗадг цергә керг-үүлдврт Әрәсән әәрмин дәәчнр, тер тоод Хальмг Таңһчин элчнр залу-зөргтәһәр дәәлдҗәнә.
Тер тоод Элстин нефтин болн газин колледжин оютнр болн төгсәһәчнр эврә дурар эрлһән бичәд СВО-н дәәчнрин тоод орҗ, бендеровцнрин цергә күчиг уга кеҗ кесг кергт орлцҗана, хооран цухрлго баатр кевәр Төрскән харсҗ йовна, болв эднәс зәрмнь аврлт уга дәәлдәнд баатр кевәр әмнәсн хаһцла. Ода олна санлд мөңкрсн баатрмуд Манҗин Константин, Мунян Евгений, Эрдненов Мингиян, Музран Нәәмн мөн.

Шидр Хальмг Таңһчин Толһач Хаска Батун зааврас иштә Светлана Кусьминова шишлң дөң күрглһнә «Сулда» төвин болн Занда Адудова Яшалтан района эмнлһнә ах эмчнрин үүлд батлгдв. Баахн болв чигн эдн байн дамшлтта, эрүл-менд харлһна халхд арвн һар җилдән көдлҗ йовна.

Өдгә цагт мана таңһчин уульнцсар йовхла олн-әмтн, баһчуд чигн хальмг келн-улсин темдгтә хувц өмсч йовснь даңгин үзгднә. Урднь мана өвкнрин өмсч йовсн хувцн эндр дорас өсч йовдг баһчуд дунд ик тааслт олсинь темдглх кергтә. Эн учрас тиим ке-сәәхн хувц үүдәһәд уйҗ һарһхин төлә шишлң эрдмтә улс кергтә болна.

«Селәдин цуг халхин делгрлт» гидг шаңһа көтлвр селән һазрт бәәдг улсин җирһлин таал ясруллһна төлә батлгдсмн. Туслң мана таңһчин төлә эн көтлвр ик чинр зүүдгнь учрта, юңгад гихлә Хальмгин әмтнә ик зунь селән һазрт бәәнә.

Хальмг Таңһчин Улсин Хуралын (Парламентин) Ахлач Артем Михайлов болн депутатнр 2025 җилд таңһчин сурһуль-эрдмин бүрдәцст бат ясвр келһнә төрәр болсн сүүрт орлцв. Селвлцән таңһчин сурһуль-эрдмин болн номин министерствин седвәрәр бүрдәгдв. Чинртә төрәр болсн харһлтд Әрәсән Федерацин Хүүвин элч Хачра Борис, таңһчин сурһуль-эрдмин болн номин министрин үүл дааҗадг Әңгрә Булһн, таңһчин ах санитарн эмч Санҗин Җаңһр, таңһчин күцәгч йосна болн райодын муниципальн бүрдәцсин элчнр орлцв.

Хальмг Таңһчин Улсин Хуралын депутат Эрнҗәнә Петр парламентин Ахлач Артем Михайловин даалһврар ниигмин сүлҗәнә эв-арһар болсн Әрәсән Орн-нутгин Хүүвин хаврин сессин сүүрт орлцв. Әрәсән Орн-нутгин Хүүвин Ахлач Вячеслав Володин Әрәсән залврин, Федерацин Хүүвин элчнрт, сүүрт орлцх үрвр кесн гиичнрт йөрәлин үг келҗ, эндрк амр биш цагла хамцу үүлдвр делгрүллһнә төлә арһ-чидлән негдүлҗ, нөкцҗ көдлх кергтә гиҗ темдглв.

Шидр Хальмг Таңһчин социальн делгрлтин, күч-көлснә болн көдлмшәр тетклһнә министерствин көдләчнр Луганск Улсин Республикин Антрацитовск района бичкдүдт Шин җилин белг күргҗ өгв.

Төрскән харсгч Алдр дәәнд бәрсн Алдр Диилврин 80 җилин өөниг угтад, таңһчд олн керг-үүлдвр күцәгдҗәнә. Өөнд белдәд, дәәнд әмнәсн хаһцсн дәәчнрин бумблвс экләд ясгдҗана. Иигәд Яшкулин районд 28-ч Әәрмин салдснрт нерәдсн бумблв ясгдҗ, өөр эргндкнь цеврлгдв.

«Церн» гидг этнохотнд хальмг домбрин дүр-бәәдлиг үзүлсн ик кегдлиг углҗ тәвсинь үзҗ болхмн. Теегин әмтнә дурта гисн көгҗмин зевсгиг ода тиигәд эн хотнд ирҗ үзҗ болхмн. Домбр Хальмг Таңһчин чинртә нег темдг болснь кезәнәс авн олн келн-улсин уханд батрсмн. Таңһчин Толһач Хаска Батун болн таңһчин сойлын болн зуульчллһна министерствин дөңгәр домбрин дүр этнохотна бәәрнд әмтнә оньг авлҗ дүңгәсн бәәнә.

Шидр Әрәсән Залврин Ахлач Михаил Мишустин эврәннь даруксла селвлцә давулв. Тенд 2025 җилин йовудт кех-күцәх төрмүдин тускар цәәлһҗ келгдв.
Эн җилд Әрәсән Президент Владимир Путинә даалһсар орн-нутгт «Агромотиватор» нертә көтлвр экләд күцәгдхмн. Темдглхд, эн көтлвр цергә шишлң керг-үүлдврт орлцачнрин төлә бүрдәгдв. Мана таңһчин төлә эн төр йир чинртә, тер юңгад гихлә өөрхн җилмүдин эргцд бидн аграрн-индустриальн регион болхар зүткҗәнәвидн. Эн туст Хальмг Таңһчин Толһач Хаска Бату эврәннь ухан-тоолврарн хувалцв.