Җил ирвәс мана таңһчд амрлһна кемиг тустаһар давулх саната бичкдүдин то өсәд бәәнә. «Демографь» гидг келн-улсин төсвин «Хальмг Таңһчд күч-көлс харлһна, таал ясруллһна болн әмтиг көдлмшәр тетклһнд туслһн» гидг көтлврин йовудт җил болһн насни дигт күрәд уга бичкдүд цаг зуур көдлмшәр теткгднә. Эдн амрлһна кемд күнд биш көдлмш кеҗ, мөңг олна. Нурһлҗ эдн сурһулин улд үүлддг лагерьмүдт, дегтрин саңд көдлнә, эргднк һазриг хог-богас цеврлнә, санлын самбрмудыг ширдҗ сәәхрүлнә, ветеранмудт социальн дөң күргнә.

Таңһчин цуг сурһульмудт мет, зуни түрүн сарин эклцәр Элстин олн салврта гимназьд «Хөөтк үй» гидг өдрәр көдлдг лагерь секгдлә. Ода тенд 1-6-ч классмудт ордг күүкдин 8 баг үүлдҗәнә. Баг болһн эврә нертә, дуудврта, нань чигн авъяста.

Эн җилә хөн сарла А. Цебековин нертә Государственн хор дарани концертан үзүлснь олнд ик таасгдла. «Көгҗмәр дахулҗ, чинрнь өссн үг» гиҗ нерәдгдсн концертд классическ көгҗмин үүдәврмүд олн хәләһәчнрин оньгт тусхагдв.

Өмн үзгин Корейд болх Нарт-делкән марһанд Хальмгин бииһин коллектив орлцхмн. «ALL GENERATION CHAMPIONSHIP» гидг нертә эн марһана Әрәсәд болсн девсңгнь Москвад хөн сарин 18-19-д давла. Ик кемҗәтә эн марһанд Элстин команд орлцла. Бииһин эрдмән сәәнәр үзүләд, Сеулд болх Нарт-делкән чемпионатд орлцх зөв эдн авв.

А. Цебековин нертә Хальмгин государственн хор ик күцәмҗтәһәр Москвад мөчн сарин 13-д билгән үзүлв. «Иргчин аһу»: «Өмн үзгин макрорегион» гидг презентацд Хальмгин дууна коллектив орлцв. «Әрәсән Өмн үзг» гидг сойлын эн төсв «Әрәсә» гидг ВДНХ-д үүлдҗәх нарт-делкән форумин кемҗәнд болсмн.

Элстин Петр Чонкушовин нертә билг-эрдмин колледжин театрин әңгин оютнр хальмг дууч болн артистк Лиҗин Улана туск наад тәвв.

Таңһчд урһц хуралһна кем эклҗәнә. Ик Буурла, Целинн, Яшалтан болн Городовиковск райодт дааврта көдлмш эклв.
Эн җил таңһчин агрономчнр 276 миңһн аһу һазрт урһцан хурахмн, тер тоод 245 миңһн аһу һазрт намрин буудя бас хурагдхмн. Көдлмшт ут тоодан 800 комбайн олзлгдх.

Зунын кем гүргүдән орчкв. Сүл сармудт мана таңһчд эдл-уушин үн хаврин сармудла дүңцүлхлә невчкн баһрв, гиҗ келх кергтә. Хаврин эклцәр хот-хоолын, темснә болн зер-земшин үн өсдгинь цуһар меднә. Тер мет өдр болһн эдлдг үсн, махн, тосн, бас үнтәрнә. Махн болхла өдр болһн гишң үнтәрнә биший... Үкрә махн 400 арслңгас авн 600 күртл хулдгдна, һахан махна үн үкрә махнла әдл болв, хөөнә махн хамгин үнтә, 650 арслңгас авн 800 күртл күрәд әмтиг икәр үүмүлҗәнә.

Таңһчин селәнә эдл-ахун министерствд «Агростартап» мөрә авхин төлә давулсн марһана ашинь диглв. Эн мөрә селәнә эдл-ахун бүрдәцст болн өрк-бүлин ферм делгрүллһнд йилһҗ өггднә.

Валентина Дрижеева насарн баахн болв чигн арһта, һартан бәрсән кедг, өөрхн элгн-садндан түшг болдг күүкд күн мөн. Йисн җил хооран өркән өндәлһәд, Виктор авальтаһан хойр үртә болв. Герин эзн хойр җилдән цергә шишлң керг-үүлдврт орлцҗ йовна, тегәд өрк-бүлин керг-төриг эн бийнь хаһлҗ, күүкдтән килмҗ тусхадг деерән гемтә эцкән хәләҗ цугинь дааҗана.