«Чемданд багтсн музей. Баатрмудын дүрмүд» гисн соньн нер керг-үүлдвр зүүснь өврмҗтә. Төрскән харсачин җилд нерәдсн керг-үүлдврт олн күн орлцв.
Лаганя района толһач Коган Юрий соньн эн харһлтын күндтә гиич болҗ орлцсн эн керг-үүлдврин төрскнч седкл сурһмҗллһна, өвкнрин баатр үүлдвриг мартлго, эндрк үйнрт үлгүр болҗ йовлһнд туслх чинринь темдглв. Сурһуль-эрдмин района профсоюзмуд бүрдәсн музейин чинртә эн керг-үүлдвр төрскнә баатрмудын зөргиг тодлулсн үүлдвр болв. Баатрмудын туск санлыг сергәҗ, баһчудт теднә тускар келҗ өгхәр эн керг-үүлдвр бүрдәгдсмн. Төрскән харсачнрин зургуд, теднә зөргтә үүлдврин туск тоот өрк-бүлднь чемданд, эс гиҗ авдрт дүргдҗ, әрүн кевәр хадһлгдна. Диилврин өдрмүдлә эк-эцкнр тер әрүн тоотан авдрас һарһҗ авад, зургудынь күүкд-көвүдтән үзүләд, дәәнд тедн ямаран кевәр дәәлдснә тускар келҗ өгнә. Өрк-бүлд хадһлгдҗадг дәәч зөргин туск бәрмт цаасн болн баатрмудын зургуд цугтад темдгтә болҗ, өсч йовх үйнрт Төрскнә төлә әмән эс әрвлсн әмтнә зөргиг үзүлҗ, үлгүр авхднь туслх седклтәһәр эн керг-үүлдвр болсмн.

Әрәсән «Сойл» гидг телеүзлд хальмг көгҗмин ик үүдәвр түрүн болҗ үзүлгдхмн. «Улсин нүүдл җирһл» («Кочевье народа») гидг нерәдлһтә хальмг көгҗмин наадн бар сарин 27-д олн хәләһәчнрин оньгт тусхагдҗана.

Хальмгин «Өөрднр» бииһин театр таңһчдан бәәтхә цуг орн-нутгт нер һарсн коллектив болҗана. Альднь болвчн эдниг ик байртаһар тосна. Зулын байрин өмн нер туурсн коллектив кесг һазрт билг-эрдмән үзүлв. «Восточный базар» гидг бииһин коллективсин нарт-делкән хәләврт орлцв. Хазн балһснд болсн эн ик цуглранд «Өөрднр» хальмгудын бииг цуг халхаснь үзүлҗ, цугтад өврмҗ үүдәв.

Хальмгин түрүн профессиональн көгҗмч Чонкуша Петрин 95 җилин өөнд таңһчин әмтн, нег үлү сойлын көдләчнр белдҗәнә. Ончта эн өөнд нерәдсн концертин тускар «Калмыкия» таңһчин зәңгллһнә агентствд болсн харһлтд Манҗин Аркадин нертә госфилармоня һардачнр седкүлчнрт келҗ өгв. «Төрскн теегин ке-сәәхниг көгҗмәрн туурулв» гиҗ нерәдгдсн концертд Хальмгин нертә артистнр болн нань чигн билгтнр орлцхмн. Көгҗмин делкәд нер һарсн пианист Вадим Пальмов бар сарин 8-д фортепианон болн оркестрин төлә бичгдсн концертиг наадхмн.

Хальмг улсин бичәч Бембин Тимофейин 95 җилә өөниг үкр сард темдглв. Хальмгин сойлд зөвтә нег орман эзлҗәсн билгтин үүдәврмүдт олн умшачнр оньган тусхана.

«КТК – билгтә бичкдүдт» гидг нарт-делкән марһана гала - концертд Хальмгин билгтнр билг-эрдмән үзүлв. Марһаг ашлсн байрин ик концерт Москвад болв. Көк теңгсин бүрдәцин буйнч седклин көтлвр эн җил Алдр Диилврин 80 җилин өөнд нерәдгдв.

Хальмгин «Җаңһр» наадһасин театрин артистк Эльза Сельвина Әрәсән театрин үүлдәчнрин Ниицәнә төсвд орлцхмн.
«Творческий практикум. Звенигород СТД РФ» гиҗ нерәдгдсн нарт-делкән сурһуль-эрдмин гидг төсвд орлцх зөв хальмг артистк Эльза Сельвинад учрв.
«Нарт-делкән сурһулин лабораторь» гидг көтлврт кесг орн-нутгин театрин артистнр орлцҗана. «Творческий практикум. Звенигород СТД РФ» гиҗ нерәдгдсн эн керг-үүлдвр бар сарин 8-әс авн 14 күртл болхмн.

Шидр Элстд Хальмг Таңһчин улсин җаңһрчин нер зүүсн Лиҗ-Һәрән Баатрин 60 җилин өөнд нерәдгдсн «Эрктнә нутгин дуд» нертә концерт болв. Терүнд Баатр Сангаджиевичин Баина күүкнь болн Хальмг Таңһчин ачта артист Шаран Дима орлцҗ, бас билг-эрдмәрн байрлулв.

Көтчнр селәнә сойлын герт байрин бәәдлд «Ингилән» бичкдүдин студин ончта өөнд нерәдсн олна орлцата нәр болв. Ода үлгүр болгч өөдән нер зүүҗәдг «Ингилән» 30 җилә өөндән нерәдсн байрин концерт үзүлв.

Ик Буурла района «Торһа» ансамблиг әмтн сән меднә. Вологда балһснд хальмг артистнр билг-эрдмән үзүлхмн.