Шидр мана таңһчд Әрәсән күүкд улсин ниицәнә әңгүдин ик хург болв. Маднла хам-хоша бәәдг регионмудас ирсн гиичнр дунд Карачаево-Черкесин делегац бас билә. «Ногай давысы» газетин ах редактор-һардач Алтынай Атуова, «Черкес хэку» газетин ах редактор-һардач Люсана Абидокова болн «Солң» гидг бичкдүдин седкүлин ах редактор Мадина Асланукова делегацин ханьд ирсн болдг. Эдн мана таңһчд һурвн өдртән бәәһәд, хальмг улсин сойлла таньлдҗ, хальмг тег һәәхч цаган сергмҗтәһәр давулв. Хәрхиннь өмн гиичнр «Калмыкия» зәңгллһнә агентствд ирәд, хальмг барин көдләчнрлә харһад, эврәннь һарцсин тускар келҗ өгв.

«Әрәсән улсин алдр дуулврмуд» гидг төсвин йовудт мана «Җаңһрла» орн-нутгин хотл балһсна улс таньлдв.
Келн-улсин Москван Герт бүрдәгдсн VIII хургин йовудт «Җаңһрин» тускар күүндвр болв. Хальмг улсин урн үгин алтн зөөр болҗадг «Җаңһр» эн байрт орлцсн цуг улсин оньг йосндан авлв.

Хальмг Таңһчин хотл балһснд зуульчллһна - зәңгллһнә төв секгдсн йовдл учрв. Хавр ирәд, таңһчд әмтн олар ирҗәдг цагт эннь йир кергтә болв. Нааран ирсн зуульчнр таңһчин ончта ормсар яһҗ таньлдҗ болхин тускар медҗ авна. Ямаран соньн бәәрн бәәхинь, терүнд яһҗ күрч болхинь тенд зәңглгднә.

Эн сарин эклцәр бамб цецгин наадм экләд, долан хонгин амрлһна өдрмүд болһн таңһчин райодт ирлцңгү керг-үүлдврмүд давҗана. Бемб өдрлә Целинн район гиичнрән тосв.

Эн җилин намрар бичкдүдин үүдәлтин Бәәшң 35 җилин өөнән темдглхмн. Терүг угтҗ бүрдәцин улд үүлддг билг-эрдмин багмудын бичкдүд «Зуульчллһн» гидг концерт белдв.

«Ик гастрольмуд» гидг орн-нутгин төсвин кемҗәнд Хальмгт Бурятин наадһасин театр гастрольд ирв. Ах-дү республикәс ирсн театр Элстд «Җаңһр» наадһасин театрин тәәз деер нааддан үзүлҗәнә. «Ульгэр» нертә театр Бурятьд бәәтхә цуг Әрәсән кемҗәнд темдгтә үүдәгч коллектив болҗана. Байн тууҗта театр билг-эрдмәрн нер һарсмн. Театрин хамгин өөдән мөрәһәр дөрвн дәкҗ ачлгдсмн. Ода Хальмгин хәләһәчнр эднә нааддыг хәләҗәнә.

То-дигин төлә:
Дорҗин Денис эврә сән дурарн үүлддг зурач. Пүрвә Эрдниевин нер зүүдг Ик Бухса дундын сурһульд тууҗин болн обществоведеня багш болҗ көдлнә. Денис 1985 җилин мөрн сарин 23-д Ик Бухс селәнд төрсмн. Энд 2002 җилд дундын сурһуль төгсәсмн. Грековин нертә художествин училищин Хальмг филиалд нег җил сурсмн. Хальмг госуниверситетд ах сурһуль дассна хөөн әәрмд церглв. Хөөннь Денис Москвад көдлв.
2016 җилд төрскн селәндән хәрҗ ирв. Изо болн технологин багш болҗ төрскн сурһульдан көдлв. Өдгә цагт тууҗин багш болҗ көдлҗәнә.

Нидн намрар Элстд бүрдәгдсн шар шаҗна нарт-делкән III ик хургт һучн һар орн-нутгин элчнр ирҗ орлцсн билә. Терүнә йовудт мана таңһчин һардвр кесг нутгла цаарандан нөкцлтхәр үгцсн мөн. Эн җилин хөн сард Элстд Энткг орн-нутгин сойлын Өдрмүд болхмн. Энүнә тускар шидр «Калмыкия» РИА-н барин төвд селкүлчнрлә болсн харһлтд келгдв.

Арвн тавн җил хооран хальмг келндән хару, төрскнч седклтә, билгтә Шорван Феликс Һәрән Лиҗ хойр хальмг ээҗнрин дүр тогтаһад, эн җилмүдин эргцд билг-эрдмәрн олн хәләһәчнриг байрлулҗ йовна. Дуука Куука хойр хальмг ээҗин бәәдл-җирһл үзүлҗ, келн-улсин амн үгин зөөрлә таньлдулҗ олн әмтнә седкл авлсн болдг. Келхд, эднә концерт болхин туск зәңг дарунь ик холд тарад, сул орм үлдсн уга.

Ниицлтин җил олн керг-үүлдврмүдәрн соньн болҗана. Иигәд эн җилин лу сарин 20-д Тыва Республикин сойлын министерствин седвәрәр кегдсн телехарһлтын тускар урднь бичләвидн. Шидр моһа сарин 30-д ирлцңгү керг-үүлдвр болв. Ода Хальмг Таңһч, Тыва болн Бурять: ах-дү республикүд дунд соньн күүндвр болв.
Әрәсән улсин ниицлтин җилин эклц болсн, бурхн-шаҗна үүлдәчнрин дөрвдгч нарт-делкән хург угтҗ кегдсн тер күүндврин йовудт Тыван болн Хальмгин орлцачнр Цаһан Сарин болн Шагаан байрин тускар тоолврарн хувалцв. Келн улс болһна хаврин байрин туск тууҗ болн авъясмуд цугтад соньн болв.