Моһа сарин 13-д мана таңһчд хальмг шүлгләнә өдр темдглв. Хальмгин хәәртә үрн, Социалистическ Күч-көлснә Баатр, хальмг улсин алдр шүлгч Көглтин Даван 90 җилин өөнлә ирлцҗ, 2012 җилд эн өдр батлгдсн болдг.

Хальмг номин төвин көдләчнрин ач-тусар 1957 җиләс авн Хальмг Таңһчиг шинәс босхсна хөөн һарчасн келн-улсин «Хальмг үнн» газетин хуучн тойгуд өдгә цагин эв-арһ олзлсна ашт шинрүлгдв.

- Орн-нутгин йосна күчәр һәәлгдсн хальмг улс Сиврин аврлт уга тууврин күчр-күнд зовлңгиг арвн һурвн җилин туршарт дааҗ һарад далн җил хооран төрскн таңһчдан ирв. «Хальмг улс машидәс буулдад, ууляд-унҗад төрскн һазртан мөргәд үүмсн билә», - гиҗ тер һашута чигн, байрта чигн кем сананднь мөңкинд үлдснә тускар медәтнр келнә.

Цаһан Сарин байриг бидн сара хонгтан темдглҗ, нег-негндән золһҗ однавидн. Мана таңһчла хам-хоша бәәдг Әәдрхнә мүҗлә бидн бат залһлда бәрҗ, сойлын халхар хамдан олн зүсн керг-үүлдвр давулнавидн. Шидр Хальмг Таңһчин Толһачин даалһврар Хальмг Таңһчин Улсин Хуралын (Парламентин) Ахлач Артем Михайлов Әәдрхн балһснд болсн Цаһан Сарин байрт орлцв.

Одахн Элстд Санкт-Петербург балһснас нертә дууч Алиса Супронова ирәд, Хальмгин хәләһәчнриг билг-эрдмәрн байрлулв. Тодлулхд, Алиса мана таңһчд кесг дәкҗ ирҗәнә. Нидн хаврар эн бамб цецгин наадмд ирәд, кесг керг-үүлдврт орлцсн билә.

Мана таңһчин улс нег һазра дәәчнрән дөңнхин төлә хот-хол, хувц-хунр, эм, олн зүсн кергсл болн талдан тоот цергә шишлң керг-үүлдвр давҗадг һазрур даңгин авч одна. Тер мет байрин өдрмүдлә ирлцүлҗ, таңһчин нертә артистнр тиигәрән бас одад, Төрскән харсачнриг йөрәнә.
Одахн Луганск Улсин Республикин Антрацитын района Боково-Платово селәнд Хальмгин делегац одад ирв. Цаһан Сарин, Масленица болн Төрскән харсачин сән Өдрлә дәәчнриг йөрәв. Бәәрн сойлын Герт «Бамб цецг» ансамблин, Цевгә Төлән нертә хорин болн Антрацитын района артистнр хамцу концерт бүрдәв.
Байрин концертын йовудт мана таңһчин делегациг ахлҗ одсн залврин ахлачин дарук Җамбинә Очр Хальмгин Толһач Хаска Батун даалһсар нег һазра хойр дәәчиг Делгә Эрднин медаляр ачлв.

Әрәсән Президентин зәрлгәр келн-улсин ниицлтин җил зарлгдв. Энүнәс иштә җилин йовудт орн-нутгт ирлцңгү керг-үүлдврмүд давулхар зуралгдҗана.

Әрәсәд келн-улсин ниицлтин җил Хальмг Таңһчин райодар болн Элстд сурһулин бүрдәцст байрин керг-үүлдвр болҗана. Тиим кевәр сурһульчнр болн оютнр келн-улсин хоорндк иньгллтиг батруллһна, эврә келән, тууҗан, авъясан медҗ авлһна җисәнд орлцҗахан медүлҗәнә.

Сарпан района Садовое селәнд дегтрин шин саң секгдв. Сүл цагт умшачнрт сән болн өдгә цага таал тогтахин төлә дегтрин саңгуд таңһчд секгдҗәнә. Элст балһснд, зәрм райодар тиим дегтрин саңгуд көдлҗәхнь темдгтә.

Хавр эн җил йир сәәхн болн соньн болх гиҗ Хальмгин Келн-улсин оркестрт тоолҗана. Нарт-делкәд нер туурсн көгҗмлә таңһчин соңсачнриг таньлдулхар оркестр моһа сард «Мировые хиты» гидг көтлвр белдҗәнә.

Хальмг ик сурһулин багшнр болн оютнр олн әмтнд туста кесг төсв болн керг-үүлдвр күцәнә. Тер тоод «Элстин бичкн театр» («Малый элистинский театр») төсвиг хальмг һоллгч вузин «Гармония» гидг психологин төвин көдләчнр болн оютнр бәәдл-җирһлд тохраҗана. Бичкдүдин болн арвтнрин төлә бүрдәсн керг-үүлдврт орлцачнрин түрүн харһлт «Төрскән харсачнр» таңһчин саңд болв. Түүнд уйн наста наадачнр, теднә экнр, таңһчин саңгин һардвр, багшнрин сурһуль-эрдмин дацңгин һардач, педагог номин кандидат Очра Ирина, психологин төвин һардач Бардан Нина болн волонтермудын «Цаһан седкл» клубин гешүд орлцҗ күүндвр кев.