Шидр Элст балһсна поликлиникд «Эрүл-мендин сө» гидг керг-үүлдвр түрүн болҗ бүрдәгдв. Асхар 8 часас авн сө 1 час күртл әмтн эмнлһнд ирәд, эрүл-мендин бәәдлән шинҗлҗ, эмчин сүв-селвг авв. Өдртнь олн зүсн учрар эмчд ирдг арһ уга улс эн керг-үүлдврт орлцҗ, адһм угаһар шинҗллт кеһәд, эмчнрлә харһҗ чадв.
- Талдан регионмудт иим керг-үүлдврмүд сөөһәр давулгдҗахинь соңсад, теднә үлгүрәр мана эмнлһнд бас терүг бүрдәхәр шиидвидн. Сөөһәр әмтн иршго гиҗ санҗалавидн, тегәд түрүләд хойр терапевт көдлх гиҗ зуралсн биләвидн. Лу сарин 2-т әмтн эртәснь эмчд бичгдҗ чадв, тегәд хойр эмчд дарунь һучад күн ирхнь медгдхлә, дәкәд нег эмч көдлх болҗ һарв. Тегәд эндр һурвн эмч ут тоодан зун шаху кү хәләһәд, эмнлһнә туст сүв-селвгән өгхмн. Эднәс нань кардиолог, невролог, отоларинголог, травматолог, гинеколог, уролог, офтальмолог эрдмтә эмчнр бас дөңгән күргхмн. Эн мергҗлтнрт бийән үзүлхәр эмтн олар ирнә, тегәд сөөһәр эмчнрт ирҗ чадхнь олнд тааста болв. Эн керг-үүлдвр хамгин түрүнд ямр нег гем эртәснь илдкҗ, цаглань эмнлһ кеҗ дөң болхд туслх зөвтә. Эн керг-үүлдврт орлцсн улс УЗИ, ЭКГ, флюорографь, маммографь болн нань чигн шинҗллт кеҗ чадхмн. Мана эмнлһнә бүрдәцин көдләчнр һардврин седвәриг дөңнәд, сөөһәр көдлхәр шиидвр авснд ик ханлтан өргҗәнәвидн. Бидн цуһар нег керг күцәҗәнәвидн, тегәд нег һазра әмтнә эрүл-менд харлһна кергт орлцх санаһан медүлснь байрта. Эн керг-үүлдвр күцәмҗтәһәр давулгдхла, бидн цааранднь чигн терүг эрк биш бүрдәхвидн, - гиҗ поликлиникин ах эмчин дарук Цернә Наталья келв.

Шидр Әәдрхнә медицинск ик сурһулин һардач Сергей Поройский Хальмг Таңһчд көдлмшин кергәр ирәд, эрүл-менд харлһна көдләчнрин мергҗлт өөдлүллһнә төрәр болсн селвлцәнд орлцв. Харһлтыг Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина һардҗ давулв.

Таңһчин эрүл-менд харлһна бүрдәцст эмчнр болн дунд медицинск көдләчнр эс күртҗәхнь чинртә төр болҗана. Эн төр хаһллһнд «Земск эмч/фельдшер» гидг шаңһа көтлвр сәәнәр туслҗана. Терүнә йовудт мана таңһчин селәдин эмнлһнә бүрдәцст эмчнр болн дунд зергин эмнлһнә көдләчнр көдлҗ, бәәрн улст чинртә дөң күргҗәнә. Нидн эн көтлврин йовудт 39 күн селәдин эмнлһст көдлдг болв.

Хальмг Таңһчин эрүл-менд харлһна министерствин зәңглсәр Элст балһсна поликлиникин көдләчнр лу сарин 13-д «Эрүл-мендин сө» гидг керг-үүлдвр давулхмн. Эн керг-үүлдвр өдрәр эмчд ирҗ чаддго улсин төлә бүрдәгдҗәнә.

Одахн Элстд «Медрл» ниицәнә седвәрәр «Негдсн Әрәсә» партин штабд баһчудын төлә кичәл болв. Әрәсән шаңһа көдләчин өдрт нерәдсн кичәлиг ниицәнә илдкәч, Хальмг Таңһчин залврин Ахлачин дарук, таңһчин то-дигин делгрлтин министр Этән Алексей давулв.

Шидр Хальмг Таңһчин эрүл-менд харлһна министр Саран Булат олнд зәңгллһнә эв-арһсин көдләчнрлә харһад, давсн җилд кесн көдлмшин аш диглҗ, эн болн өөрхн җилмүдт таңһчин эрүл-менд харлһна халхд күцәгдх керг-үүлдврмүдин тускар тодрхаһар келҗ өгв. Таңһчин һоллгч эмнлһсиг өдгә цага кергсләр тетклһнә, райодын бүрдәцст бат ясвр келһнә, шин поликлиник эдлврт оруллһна, селәдт ФАП-муд тосхлһна, мергҗлтнриг белдлһнә болн нань чигн чинртә төрмүд күүндврт босхгдв.
- Шин җилин эклцд болсн амрлһна өдрмүдт таңһчин эрүл-менд харлһна бүрдәцс көдләд, олн зүсн шав авсн, гемсн улст түрүн дөң күргҗ дигтә-даратаһар көдлв. Амрлһна кемд олн зүсн зеткртә йовдл учрдгнь икднә, тегәд таңһчин нүүрлгч бүрдәцст мергҗлтнрин бригадмуд бүрдәһәд, цугтаднь цаглань дөң күргҗ дарунь эмнлһ эклҗ эмчнр даавртаһар кергән күцәв гиҗ темдглх кергтә. Эн өдрмүдт көл-һаран авсн, олн зүсн шав авсн улст мана эмчнр дөңгән күргв, - гиҗ Булат Амангельдыевич харһлтын эклцәр келв.

Хальмг Таңһч болн Луганск Улсин Республикин Антрацитовск район хоорнд нөкцлтин бооцан батлгдснас авн таңһчин эмнлһнә көдләчнр тиигәрән одад, бәәрн улст дөңгән күргнә. Таңһчин эмнлһнә эмчнрин баг Антрацитовск районд бәәдг 100 һар күүнә эрүл-менд шинҗләд, сүв-селвгән өгнә.

П.Жемчуевин нертә таңһчин эмнлһнә физиотерапевтическ әңгд өдгә цага кергсл углҗ тәвгдв. «Salus-Talent», «BTL-6000» болн «Piezo Wave» гидг сән һара кергслмүд олн зүсн гем учрсн кемд эмнлһнд туслна. Иим кергсл урднь энд уга бәәсмн, тегәд ода гемтә улст өөдән чинртә туслмҗ күргҗ, дарунь эдгхд туслх гиҗ әңгин эрүл-менд харлһна көдләчнр темдглнә.

Хальмг Таңһчин Толһач Хаска Батун зәрлгәс иштә Буурла Ольга «Балһсна поликлиник» эмнлһнә бүрдәцин ах эмчд батлгдв. Ольга Евгеньевна эн эмнлһнд 2020 җиләс авн көдлҗәнә, дигтә коронавирусн гем түгҗәсн кемд эн шишлң багин ханьд әмтнд дөң күргсмн. Ахр цагин эргцд эмч кергән сәәнәр меддгән, цагин некврлә ирлцҗ үүлддгән, кергән даавртаһар күцәдгән медүлсмн, тегәд хамдан көдлҗәдг үүрмүднь бүрдәцин һардачин үүлд батлсн шиидвриг байртаһар тосв.

Ик Буурла района Көвүд селәнд «Эрүл-менд бәәтн!» гидг керг-үүлдврин йовудт бәәрн болн хам-хоша бәәдг Зунда Толһа селәдин әмтн эмчнрт бийән үзүлҗ, кергтә шинҗллт кеҗ, эмнлһнә халхар мергҗлтнрин сүв-селвг авсн билә. Эн керг-үүлдвр дигтә-даратаһар бүрдәгдснд селәнә эмнлһнә эмч Кириша Гиләнән (зургт) тәвц бәәхнь маһд уга. Баахн эмч энүнә медлд бәәдг хойр селәнә әмтнд зәңгләд, медәтә, хуучта, эрмдгтә улст болн цергә шишлң керг-үүлдврт орлцачнрт эрк биш терүнд орлцхиг тодлулв.