Төрскән харсгч Алдр дән эклсн мөчн сарин 22 өдриг угтад, Элстд көгҗмин-шүлгләнә наадн әмтнә оньгт тусхагдв. Манҗин Аркадин нертә Хальмг госфилармоня, Басңга Баатрин нертә Келн-улсин театрин артистнр дән эклсн өдриг тодлулад, дәәнд әмнәсн хаһцсн зөргтә баатрмудын санлд терүгән нерәдв. Эн үүлдврт «Академия талантов» гидг сойлд болн билг-эрдмд дөң болдг төвин бичкн артистнр бас орлцв.

Орс географин ниицәнә кемҗәнд Хальмг ик сурһулин болн Крымин ик сурһулин нөкцлт делгрҗәнә.

Селән һазрт бәәдг улсин җирһлин таал ясрулхин төлә мана орн-нутгт олн зүсн шаңһа көтлвр батлгдсн бәәнә. Теднә негнь әмтнә седвәр дөңнҗ, ямр нег төсв күцәлһнд шаңһа хазнас дөң күрглһнә көтлвр болна. Эн көтлврт орлцад, әмтн селәндән сән кец-таал тогталһна, бичкдүд нааддг эс гиҗ спортивн талвң тосхлһна, нег һазра улсин санл мөңкрүллһнә керг-үүлдврмүд күцәнә. Болв седвәр татсн улс бийснь болн селәнә муниципальн бүрдәц бас эврә демән күргҗ, төсв күцәлһнд мөңгән немх зөвтә.

Целинн района Найнтахн селәнд ик-бичкн уга медицинск эгч Валентина Дарбаковаг күндлнә, эн түрүн дуудврар дарунь күрч ирәд, дөңгән күргхәр адһна. Тәвн шаху җилдән селәнә эмнлһнд көдлҗәдг Валентина Сянцаковна күн болһниг сәәнәр медҗ, кен ямаран гемтәһинь, кенд кезә ямаран шинҗллт кехинь, эмнлһ авхинь цугинь тоод авч, цаглань эмчд бийән үзүлхиг некнә. Бийнь эн Найнтахн селәнд өсәд-боссмн, тегәд тааста эрдмәрн төрскн һазртан ирҗ көдләд, олнд тусан күргҗ, олн җилин эргцд үнн-чик седклтәһәр үүлдҗ йовхнь бахмҗта йовдл мөн.

Җил ирвәс мана таңһчд амрлһна кемиг тустаһар давулх саната бичкдүдин то өсәд бәәнә. «Демографь» гидг келн-улсин төсвин «Хальмг Таңһчд күч-көлс харлһна, таал ясруллһна болн әмтиг көдлмшәр тетклһнд туслһн» гидг көтлврин йовудт җил болһн насни дигт күрәд уга бичкдүд цаг зуур көдлмшәр теткгднә. Эдн амрлһна кемд күнд биш көдлмш кеҗ, мөңг олна. Нурһлҗ эдн сурһулин улд үүлддг лагерьмүдт, дегтрин саңд көдлнә, эргднк һазриг хог-богас цеврлнә, санлын самбрмудыг ширдҗ сәәхрүлнә, ветеранмудт социальн дөң күргнә.

Таңһчин цуг сурһульмудт мет, зуни түрүн сарин эклцәр Элстин олн салврта гимназьд «Хөөтк үй» гидг өдрәр көдлдг лагерь секгдлә. Ода тенд 1-6-ч классмудт ордг күүкдин 8 баг үүлдҗәнә. Баг болһн эврә нертә, дуудврта, нань чигн авъяста.

Эн җилә хөн сарла А. Цебековин нертә Государственн хор дарани концертан үзүлснь олнд ик таасгдла. «Көгҗмәр дахулҗ, чинрнь өссн үг» гиҗ нерәдгдсн концертд классическ көгҗмин үүдәврмүд олн хәләһәчнрин оньгт тусхагдв.

Өмн үзгин Корейд болх Нарт-делкән марһанд Хальмгин бииһин коллектив орлцхмн. «ALL GENERATION CHAMPIONSHIP» гидг нертә эн марһана Әрәсәд болсн девсңгнь Москвад хөн сарин 18-19-д давла. Ик кемҗәтә эн марһанд Элстин команд орлцла. Бииһин эрдмән сәәнәр үзүләд, Сеулд болх Нарт-делкән чемпионатд орлцх зөв эдн авв.

А. Цебековин нертә Хальмгин государственн хор ик күцәмҗтәһәр Москвад мөчн сарин 13-д билгән үзүлв. «Иргчин аһу»: «Өмн үзгин макрорегион» гидг презентацд Хальмгин дууна коллектив орлцв. «Әрәсән Өмн үзг» гидг сойлын эн төсв «Әрәсә» гидг ВДНХ-д үүлдҗәх нарт-делкән форумин кемҗәнд болсмн.

Элстин Петр Чонкушовин нертә билг-эрдмин колледжин театрин әңгин оютнр хальмг дууч болн артистк Лиҗин Улана туск наад тәвв.