Элстин Петр Чонкушовин нертә билг-эрдмин колледжин театрин әңгин оютнр хальмг дууч болн артистк Лиҗин Улана туск наад тәвв.

Таңһчд урһц хуралһна кем эклҗәнә. Ик Буурла, Целинн, Яшалтан болн Городовиковск райодт дааврта көдлмш эклв.
Эн җил таңһчин агрономчнр 276 миңһн аһу һазрт урһцан хурахмн, тер тоод 245 миңһн аһу һазрт намрин буудя бас хурагдхмн. Көдлмшт ут тоодан 800 комбайн олзлгдх.

Зунын кем гүргүдән орчкв. Сүл сармудт мана таңһчд эдл-уушин үн хаврин сармудла дүңцүлхлә невчкн баһрв, гиҗ келх кергтә. Хаврин эклцәр хот-хоолын, темснә болн зер-земшин үн өсдгинь цуһар меднә. Тер мет өдр болһн эдлдг үсн, махн, тосн, бас үнтәрнә. Махн болхла өдр болһн гишң үнтәрнә биший... Үкрә махн 400 арслңгас авн 600 күртл хулдгдна, һахан махна үн үкрә махнла әдл болв, хөөнә махн хамгин үнтә, 650 арслңгас авн 800 күртл күрәд әмтиг икәр үүмүлҗәнә.

Таңһчин селәнә эдл-ахун министерствд «Агростартап» мөрә авхин төлә давулсн марһана ашинь диглв. Эн мөрә селәнә эдл-ахун бүрдәцст болн өрк-бүлин ферм делгрүллһнд йилһҗ өггднә.

Валентина Дрижеева насарн баахн болв чигн арһта, һартан бәрсән кедг, өөрхн элгн-садндан түшг болдг күүкд күн мөн. Йисн җил хооран өркән өндәлһәд, Виктор авальтаһан хойр үртә болв. Герин эзн хойр җилдән цергә шишлң керг-үүлдврт орлцҗ йовна, тегәд өрк-бүлин керг-төриг эн бийнь хаһлҗ, күүкдтән килмҗ тусхадг деерән гемтә эцкән хәләҗ цугинь дааҗана.

Тыва Республикд шидр ик байр болв. Энд пандит Камбы-лам шаҗна өөдән цол үүдәсн цагас авн 105 җил болҗах өөниг Тывад өргнәр темдглв. Ончта өөнд нерәдҗ байрин ик мөргүл болв. Эн йовдлла ирлцүлҗ кегдсн шар шаҗна хургт олн үүлдәчнр орлцв.

Хальмг Таңһчин Толһач Хаска Бату Әрәсән әәмшг уга Хүүвин һардач Сергей Шойгун һардврт болсн селвлцәнд орлцв. Терүнд Өмн үзгин регионмудт әәмшг уга бәәдл тогталһна төр босхгдв.

Шидр Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина цергә шишлң керг-үүлдврт орлцачнриг дөңнлһнә шаңһа саңгин үүлдврин ведомствс хоорндк комиссин дарани сүүр давулв.

Эндр мана орн-нутгт болн цуг регионмудт шин эв-арһст, роботмудыг улм өргнәр олзллһнд ик оньг өггдҗәнә. Түүнлә дегц тер өдгә цагин салврар инженермүдиг болн программистнриг белдлһн ик чинр зүүдг болв, иим эрдмәр вузмудт болн колледжмүдт олар баһчудыг орулҗ авхар зуралҗана.

Мана таңһчд өрк-бүлин җилд нерәдгдсн керг-үүлдврмүд дару-дарунь бүрдәгдҗ, өнр-өсклң улсиг негдүллһнд туслна. Одахн Элст балһсна ар-барун үзгт бичкдүд нааддг талвңгин өөр «Хөвтә өрк-бүлмүдин модд» гидг керг-үүлдвр болв. «Опора России» гидг олна бүрдәцин әңгин Хальмг Таңһчд үүлддг арһлачнр – күүкд улсин седвәрәр энд олн зүсн модд суулһгдв. Келхд, урднь энд «Ар үзг» гидг баһчудын ниицәнә седвәрәр бичкдүдин талвң тосхгдсмн.