Одахн Элстд таңһчин сурһуль-эрдмин болн номин министерствин коллегийин дарани сүүр болв. Энд 2024-2025 сурһулин җилин, ЕГЭ-н болн ОГЭ-н шүүврин урдаснь кесн аш диглгдв. Тер мет СПО-н бүрдәцсин ул деер үүдәгдсн мастерскойсин үүлдврин тускар күүндвр болв, эдн колледжмүдин сурһульчнрин мергҗлтиг өөдлүллһнд болн сурһулян төгсәсн арвтнрт эрдмән шүүҗ авлһнд дөң болна.

Така сарин эклцәр Бурятин Улан-Удэ хотл балһснд Әрәсән болн Моңһлын ик сурһульмудын чуулһн болв. Энүнд хойр орн-нутгин номин болн ик сурһулин 150 элч цуглрв. «Сурһуль-эрдмин, номин шинҗллтин болн селәнә эдл-ахун болн нань чигн салврин шин эв-арһин халхар нөкцлтән гүүдүлхин төлә энд өргн күүндвр болв. Моңһлын сурһуль-эрдмин министр Пурэвсуренгийн Наранбаяр болн Әрәсән Федерацин номин болн ик сурһулин министрин дарук Константин Могилевский эн хургт орлцв.

Үстин района Харба селәнд үүлддг «Байр» бичкдүдин садт ода 16 күүкн-көвүн орна. Сурһуль-эрдмин бүрдәц «Төрсн цагас авн сурһульд орх күртл» гидг көтлврәр көдлнә, тегәд сурһмҗлачнр бичкдүдиг сурһульднь белдҗ, эднә билг-эрдм делгрүлнә. Ах сурһмҗлач Лолита Китаева сурһулин бүрдәциг һардна. Одахн бидн көдлмшин кергәр селәнд одсн кемд бичкдүдин садт орад, эднә өдр-бүрин тускар соньмсвидн. Мадниг орҗ ирхлә бичкдүд дигтә үдин хотан ууһад, орндан орхар белдҗәсмн. Күүнә күн орҗ ирсиг үзәд, өкәр күүкд-көвүд маднла мендлв.

Ода сурһульмудт ОБЗР болн «Технология» кичәлмүд орулгдҗана, урднь чигн сурһульчнр ирлцңгү медрл авчасмн, болв ода эн кичәлмүдт орн-нутгин болн таңһчин һардвр улм ик оньган өгчәнә. Яһад гихлә тиим кичәлмүдт арвтнриг Төрскән харслһнд белднә, күч-көлснә сурһмҗ өгнә. Түүнә тускар Әрәсән гегән-герлин Министерствин селвлцәнд тодрха күүндвр болв, түүнә йовудт цуг регионмудын, тер тоод Хальмг Таңһчин залврин, сурһуль-эрдмин министерствин һардачнр болн дааврта көдләчнр орлцв.

Элстд Хальмг ик сурһулин «Җаңһр» лагерьт иргчдән дәәчнр болх уйн наста баһчуд амрч дамшчана.

Давсн амрлһна өдрмүдт таңһчин сурһуль-эрдмин бүрдәцст «Сүл хоңхин» байр болв. Хальмг Таңһчин Толһач Хаска Бату Элстин техническ лицейд ирәд, сурһулян төгсәҗәдг баһчудыг ончта өдрлә йөрәв. Хальмг Таңһчин сурһуль-эрдмин болн номин министрин үүл дааҗадг Натра Антон, Хальмг Таңһчин Улсин Хуралын (Парламентин) депутат Цекира Зулта, сурһульчнрин эк-эцкнр байрин керг-үүлдврт бас орлцв.

Элстин политехникин колледжин ханьд ордг Яндекс лицейд экләд сурхин төлә арвтнр ноха сард марһана даалһвран күцәх.

Эндр, хөн сарин 24-д, таңһчин цуг райодын болн Элстин сурһульмудын көвүд-күүкдин төлә сүл хонх җиңнв. 11-ч болн 9-ч классмудан ирлцңгүһәр 1509 болн 3375 күн төгсәв, арвтнр сурһулин герлтә герән үлдәҗ тааста эрдмән шүүҗ авч вузд эс гиҗ колледжд орх.

Хальмг ик сурһульд баһ наста номтнриг болн багшнриг белдлһнә кергт ик оньган өгнә, эн туст кесг җилин туршарт шишлң көтлвр олзлгдҗана. Аштнь баһ наста номтнрин то цаг ирвәс өсәд йовна. Эдн аспирантуран төгсәһәд, олн зүсн төрәр диссертацан харсад, номтнр болад, соньн төрәр шинҗллтән кеҗ үүлдҗәнә.

Мөрн сарин 3-д орн-нутгин сурһуль-эрдмин бүрдәцст «Социальн Әрәсә: туслмҗ болн зуульчллһн» гидг төрәр кичәл болв. «Медрл» гидг Әрәсән олна-шаңһа гегәрлтин бүрдәц Әрәсән Орн-нутгин Хүүвин зуульчллһна комитетин ахлач, «Шин улс» партин гешүн Тарбан Саңһҗла харһлт бүрдәв. Харһлт Москва балһснд «Медрлин Герт» болв.