Малчнрин төлә 2025-2026 җилмүдин үвлзлһнә кем гүргүдән орчкв. Энүг сән аштаһар давулхин төлә фермермүд эртәснь хаша-хаацан ясад, малын хотан белдв.
Хальмгин селәнә эдл-ахун министерствин зәңглсәр, таңһчин эдл-ахуст малын хот 100 һар процентд белдгдв. Һарсн җилин намр зөвәр дулан болад, мал өдртән теегт идшләд йовв, эннь хот әрвнәр олзллһнд туслв гиҗ келх кергтә. Ветеринарн халхар болхла ирлцңгү керг-үүлдврмүд бас күцәгдв.

Туула сарин 24-әс авн 26 күртл Энткгин Дели хотл балһснд нарт-делкән бурхн-шаҗна II хург болв.

Хальмг Таңһчин Улсин Хуралын (Парламентин) Ахлач Артем Михайлов цергә шишлң керг-үүлдврт орлцҗадг нег һазра улсиг дөңнҗ буйнч седклин керг күцәдг улсиг ачлв. Тедн дунд Төрскән харсачнрин өрк-бүлмүдин хүүвин региона штабин ахлач Кокан Виталия болн «За наших 08» гидг буйнч седклин саңгин ахлач Елена Барсукова заагдв. Эднд цергә әңгүдин ханлтын бичгүд бәрүлҗ өгв.

Эн үвлин бар-туула сармуд ик цасн орад олн-әмтиг байрлулҗана. Бар сарин чилгчәр ик цасн орад, һазр цасар бүркгдәд, Шин җилин байран бидн йосн үвлинәр тосвидн. Элст балһсна һардврин зәңглсәр, коммунальн цергллтс эртәснь белдсн билә. Шишлң техник үвлин кемд белдгдәд, урдаснь ясгдв. Хаалһст хайдг элсн болн давсн бас белдгдв.

Урҗ өдр мана орн-нутгт, тер дотр Хальмг Таңһчд Төрскән харсгч Алдр дәәнә цагт Ленинград балһсиг бүслврәс сулдхсн өдрт нерәдсн санлын керг-үүлдврмүд болв. Эн санлын өдрлә ирлцҗ, Әрәсән 89 регионд «Медрл.Баатрмуд» нертә гегән-герлин керг-үүлдвр давулгдв.

Одахн Элстд «Медрл» ниицәнә седвәрәр «Негдсн Әрәсә» партин штабд баһчудын төлә кичәл болв. Әрәсән шаңһа көдләчин өдрт нерәдсн кичәлиг ниицәнә илдкәч, Хальмг Таңһчин залврин Ахлачин дарук, таңһчин то-дигин делгрлтин министр Этән Алексей давулв.

Хальмг ик сурһулин багшнр болн оютнр олн әмтнд туста кесг төсв болн керг-үүлдвр күцәнә. Тер тоод «Элстин бичкн театр» («Малый элистинский театр») төсвиг хальмг һоллгч вузин «Гармония» гидг психологин төвин көдләчнр болн оютнр бәәдл-җирһлд тохраҗана. Бичкдүдин болн арвтнрин төлә бүрдәсн керг-үүлдврт орлцачнрин түрүн харһлт «Төрскән харсачнр» таңһчин саңд болв. Түүнд уйн наста наадачнр, теднә экнр, таңһчин саңгин һардвр, багшнрин сурһуль-эрдмин дацңгин һардач, педагог номин кандидат Очра Ирина, психологин төвин һардач Бардан Нина болн волонтермудын «Цаһан седкл» клубин гешүд орлцҗ күүндвр кев.

Н. Пальмовин нертә Келн-улсин музейд дарани һәәхүл секгдв. Тернь зурач Ванькан Валентинан түрүн ик һәәхүл болҗана. Туула сарин 23–д энд цуглрсн улс зурачин зургудла таньлдв.

Шидр Москвад Sistema Gallery гидг галерейд секгдсн һәәхүл энд тәвгдсн зургуд нәрн болн соньн олн төрәр зургдснь олн хәләһәчнрин оньг авлв. Сойлын халхин залһлдана келн-улсин хоорндк хәрлцәнә ашт үүдсн тоот зурачин зургудт һол орман олсмн. Амр биш эн цагт олн келн-улс хамдан бәәдг ик нутгт учрдг тоот зурачин оньгт тусснь соньмслт үүдәнә. Цуг эн төрмүд мадниг чигн үүмүлҗәнә.

Цугәрәсән социальн-чинртә марһана хальмг региональн девсңгин шүүврин комиссь көдлмшән эклҗәнә. «Языковая арт-резиденция. Музыка слова» гидг марһанд орлцх саната улст үрвр кегдҗәнә.