Шидр Хальмгин Толһач Хаска Батун һардврт «Балһснд сән кец-таал тогталһн» төсв күцәлһнә ведомственн хоорндк таңһчин комиссин селвлцән болв. Таңһчин залврин ахлачин дарук Александр Мишаков, федеральн ах инспектор Александр Беляев, Лаганя болн Городовиковск райодын толһачнр Коган Юрий болн Абушинә Валерий, Элст балһсна һардврин ахлач Лиҗикә Алдр, министерствсин болн ведомствсин элчнр терүнд орлцв.

Әрәсән Президент Владимир Путинә седвәрәр бүрдәгдсн «Әрәсә – арһсин орн-нутг» гидг бүрдәцин медлд ордг «Талдан керг» төсв «Оньдин белн!» марһана шин девсң эклснә тускар зарлв. Хальмгин сурһульчнрт терүнд орлцх үрвр кегдҗәнә. Терүнд орлцхин төлә 14-17 наста баһчуд эрлһән орулҗ, билг-эрдмән үзүлҗ чадҗана. Эн җил терүнд 10 миңһн баһ наста күн орлцхмн, тедн дунд диилвр бәрсн баһчуд «Сенежд» сурһуль сурх зөв авхмн. Эрлһән мөчн сарин 20 күртл орулх кергтә.

Хөн сарин 23-ас авн 25 күртл Благовещенск балһснд «АмурЭкспо-2025» Әрәсән-Китдын экономическ хург давулгдв. Хол Дорд үзгин округд эн җилин чинртә керг-үүлдврмүдин негнь болна. Улсин Хуралд (Парламентд) Хальмг Таңһчин Толһачин элч Манҗин Араш, Хальмгин экономикин болн хулд-гүүлгәнә министрин дарук Ганжиган Наталья, сойлын министрин үүл дааҗадг Түрвән Саглр, Хальмг Таңһчин делгрлтин саңгин әңгин һардач Озан Делгр болн баахн артист Поштара Мазн таңһчин делегацин ханьд орв.

Шидр Әәдрхн балһснд Өмн үзгин округин мөшклһнә комитетин заллтын көдләчнрин дунд Алдр Диилврин 80 җилин өөнд нерәдсн спартакиад болв. Хальмг Таңһчар үүлддг мөшклһнә комитетин заллтын әңгин элчнр тенд бас орлцв.

Эн намрар мана таңһчд нарт-делкән шар шаҗна Чуулһн болхмн. Кесг һазрас ирх гиичнр мана таңһчд босхгдсн хурлмуд, Бодь суврһс хәләҗ, бурхн-шаҗн ямр кевәр делгрҗәхәр соньмсхнь лавта. «Геден Шеддуб Чойкорлинг» эс гиҗ талданар нерәдгддг Аршана хурл эднә оньгиг эрк биш авлхнь мөн. Эн хурл тосхлһна ормиг XIV Дала Ламин гегән 1992 җилд зааһад әрүслсмн. Дөрвн җил давад энд хурл босхгдв. Хөөннь 2004 җилд XIV Дала Ламин гегән дәкәд мана таңһчур залрҗ ирсн цагтан энд ик ном сурһаль өгсн билә. Арвн дөрвн җил хооран энд Нгаванг Лодой ламин седвәрәр зер-земшин сад суулһгдв.

Давсн амрлһна өдрмүдт таңһчин сурһуль-эрдмин бүрдәцст «Сүл хоңхин» байр болв. Хальмг Таңһчин Толһач Хаска Бату Элстин техническ лицейд ирәд, сурһулян төгсәҗәдг баһчудыг ончта өдрлә йөрәв. Хальмг Таңһчин сурһуль-эрдмин болн номин министрин үүл дааҗадг Натра Антон, Хальмг Таңһчин Улсин Хуралын (Парламентин) депутат Цекира Зулта, сурһульчнрин эк-эцкнр байрин керг-үүлдврт бас орлцв.

Эн җил мана таңһчд «Сурһуль-эрдмин халхин шинрлт» гидг орн-нутгин көтлврин йовудт болн «Негдсн Әрәсә» партин халхар сурһуль-эрдмин 12 бүрдәцд бат ясвр кегдҗәнә. Шидр Хальмг Таңһчин Улсин Хуралын (Парламентин) Ахлач Артем Михайлов таңһчин Улсин Хуралын депутат Аздора Александрла хамдан Городовиковск балһсна 3-ч тойгта дунд сурһульд кегдҗәдг ясврин көдлмшин йовудыг бүрткв.

Элстин политехникин колледжин ханьд ордг Яндекс лицейд экләд сурхин төлә арвтнр ноха сард марһана даалһвран күцәх.

Эн җилин һаха сард мана таңһчд шар шаҗна нарт- делкән ик хург болхинь цугтан күләҗәнә. Әрәсән олн һазрас болн һазадын орн- нутгудас ирсн олн гиичнр Элстд цуглрхмн, чинртә кесг керг- үүлдвр бүрдәгдх гиҗ зуралгдҗана. Тегәд эн өдрмүдт мана хотл балһснд белдврин көдлмш күцәгдҗәнә, таңһчд босхгдсн хурлмудын гермүд ясгдҗ, һаза- дотакнь цеврлгдәд, сән таал тогтагдҗана.

Тавн җил хооран мана орн-нутгт баһ тетквртә болн җирһлин күнд таалд туссн улсиг дөңнҗ олз-оруһинь икдүлхин төлә социальн бооцан батлгддг болв. «Өрк-бүл» гидг келн-улсин төсвин медлд социальн бооцана керг-үүлдврмүд күцәгдҗәнә. Мана таңһчд эн көтлврт орлцсн улсин то җил ирвәс өсәд йовхнь темдгтә. Эн җилмүдин эргцд кесг миңһн күн социальн бооца батлад, шаңһа мөңгәр эврә керг бүтәҗ эс гиҗ дөңцл эдл-аху бүрдәҗ өрк-бүлән теҗәдг, олзта-тустаһар үүлддг болв.